Nyo-nyoimi 14
14
Ngowa-ngowa'a Israel 'aḏi ma lawana
14:1-38
1Ḏua ngowa'a Israel ma toropo mo-moini, ananga gena-ge 'aḏi poa'a siduga-duga re 'aḏi sigaḏi betongo toma utu moi siwangere gena-ge. 2Ngowa'a Israel ma toropo mo-moini 'aḏi kuḏubungu ra Musa re Harun; re 'aḏi kanau so'o ne: <<Ah, jobilaha ngomi mi sengene toma tana'a Mesir, bolo toma daeraha baulaco nena-ne! 3Ma JOU 'o gasa ngomi toma daeraha nena-ne, la ngomi sengene toma samaranga, re minga were'a re ngowa'a 'olo 'aḏi dadi dawana! Jobilaha ngomi mi ḏibo ḇato toma Mesir!>> 4Re ananga 'aḏi ma kanau matengo re matengo: <<Jobilaha ngene wo cumutu nanga bi-biri'i matengo di'a wo maḏibo toma Mesir.>>
5Gena ḏua, 'a Musa re Harun 'aḏi mapagara manga biono ngadolo toma tana'a talaḏi toma ngowa'a Israel ma toropo mo-moini ga'a ma lomu toma ngi'i gena-ge. 6Mada'a 'a Yosua, unanga gena-ge 'a Nun 'ai ngowa'a nau'u re 'a Kaleb, unanga gena-ge 'a Yefune 'ai ngowa'a nau'u, ananga ḏi'i gena-ge ngowa'a tamo-tamolo toma daeraha gena-ge, re 'aḏi 'acingi manga pakeanga, 7kara 'aḏi kanau toma ngowa'a Israel ma toropo mo-moini: <<Daeraha ga'a ngomi ma tola'a i'a di'a disa waro gena-ge lai rousu madutu. 8Na'o Ma JOU 'o sanangi ḏuanga i'a 'o gasa ngene wo osama toma daeraha gena-ge re 'o sipula'a ra ngene, daeraha ga'a ma tana'a lai rousu ga'a ri romanga reo haiwani piara re tana'a ma hasili lai repe. 9Pa'i gena-ge, Awa wo malawana Ma JOU, re awa mojongo daeraha gena-ge ma manusia, sababu ananga ngene wa'u nyamolo simoini. Ananga raḏi sanga saolo riwara. Mada'a Ma JOU 'o mamete'e ra ngene; mojongo ananga awa.>> 10Ḏua ngowa'a Israel ma toropo mo-moini 'aḏi mau poini ngowa'a nga muḏiḏi gena-ge reo maḏi. Mada'a kage-kage Ma JOU 'ai mulia 'i waiti toma Suyu'u Lo-lomu toma ngowa'a Israel mo-moini.
Musa 'o manyiata di'a 'umata Israel
11Re Ma JOU 'o kanau moju ra Musa: <<Bangsa nena-ne 'aḏi sipa-pake Ngoi ua togumu ua! Kalaha ma didina'o heranga mo-moini ga'a Ta si'a'a ra ananga manga sigolona, ananga gena-ge 'aḏi sigare ngo-ngaku ra Ngoi nyangu! 12Ngoi ḏuanga i'a Ta'u singa'unu si-siḏi eno'o re Ta'u singi-ngiranga ananga, mada'a ngana Tini si'a'a bangsa ga'a lebe lamo'o re lebe te'e reo ananga.>>
13Musa 'o kanau ra Ma JOU: <<Na'o hali gena-ge ngowa'a Mesir ya 'isene, kalaha Ma JOU no singata'a bangsa nena-ne Rani de-de'e ra ananga manga sigolona, 14ananga ḏuanga i'a ya sijarita toma daeraha nena-ne ma manusia, ga'a raḏi 'isene mangale Ma JOU, 'age toma bangsa nena-ne manga sigolona, re Ma JOU no masijumu 'Ani diri ra ananga ma'u talaḏi biono, re 'Ani kakamo 'i te'oso ra ananga manga re'u. Re No tagi si-siḏa ra ananga: toma 'orasa wa-wangere toma kakamo ma ngasu'u ma dara re toma 'orasa lobi'i toma ngasu'u u'u ma dara. 15Dadi na'o Ma JOU 'o sisengene ananga singadolo moini, ḏua bangsa-bangsa 'aḏi 'isene mangale Ma JOU, ananga ḏuanga i'a 'aḏi kanau: 16<Ma sababu Ma JOU nga'unu ua 'O sigasa bangsa nena-ne osama toma daeraha ga'a Unanga masiretene ro 'a'a jaji rema sasi ra ananga, dadi Unanga 'o sisengene ananga toma daeraha baulaco. 17Sababu gena-ge nange-ne golo'o Ma JOU no sijumu kuasa ga'a ma pari cua, mete'e 'Ani jaji masiretene re Ro kanau so'o ne: 18Ma JOU 'o ruta caiti ua re 'O romanga reo dadalara ga'a 'i ngali ua re No singi-ngiranga ga'a ma rapu re ga'a ma lawana. Mada'a sanga ua ngowa'a ga'a remanga sala, Unanga ya'u sibebasa toma hukumana. Re Unanga to singe-ngeta'a hukumana toma ḇaḇa matengo tai ngowa-ngowa'a re danongo singadolo toma ju'uda ma soi ro'ange re soi rata. 19Pahala No singi-ngiranga ananga awa mete'e ananga gena-ge manga ga'a ma rapu. Ma sababu Ma JOU 'ani dadalara ga'a 'i ngali ua, ma lamo'o ma pari cua. Ma sababu gena-ge ma tero ḏi'i wakutu Ma JOU reno singi-ngiranga ngowa'a Israel gena-ge manga ga'a ma rapu mulaingi toma Mesir singadolo 'orasa nange-ne.>> 20Ma JOU 'o kanau: <<Ngoi ḏuanga i'a To singi-ngiranga ananga ua mete'e sa'olo ninga go-golo'o. 21Kalaha so'o gena, Ngoi to masisasi rari diri masiretene re 'Ari mulia ga'a 'i romanga toma dungia sitabi donga, 22ngowa'a mo-moini ga'a raḏi oḏi'i 'Ari mulia re didina'o heranga ga'a Ngoi ta si'a'a toma Mesir re toma daeraha baulaco, mada'a ananga 'aḏi togumu ua 'aḏi tai'i Ngoi singadolo soi nyagi moi re 'aḏi 'isene Ngoi ua, 23ananga tantu ḇato 'aḏi oḏi'i ua daeraha gena-ge ga'a Ngoi to 'a'a jaji ḏua rema sasi tamanga ngimo-ngimono, ananga gena-ge mo-moini ga'a 'aḏi sipa-pake Ngoi ua, ananga 'aḏi oḏi'i ua daeraha gena-ge. 24Mada'a 'Ari falalomu 'a Kaleb so'o gena ua sababu unanga 'o 'isene Ngoi mode-mode'e, Ngoi ḏuanga i'a to gasa unanga osama toma daeraha ga'a ya disa waro pasala ḏua, daeraha gena-ge di'a 'ai ju'uda sa'olo warisi. 25Ngowa'a Amalek re ngowa'a Kanaan, ananga gena-ge 'aḏi tegoro toma picaru-picaru. Sababu gena-ge da-daini ni tagi maḏibo toma daeraha baulaco, papolo Ngoloto Teberau.>>
Ma JOU sihukumu bangsa Israel sababu 'aḏi kuḏubungu
26Ma JOU 'o kanau moju ra Musa re Harun, 27<<Ti'ara woḏi ngowa-ngowa'a ma jira gena-ge ma toropo 'aḏi kuḏubungu ra Ngoi! Re Ngoi reta 'isene 'oru ḇato gena-ge ga'a ngowa'a Israel raḏi kuḏubungu ra Ngoi, Ma JOU! 28Siajele ra ananga: Ngoi, Ma JOU 'o kanau so'o ne: <Ngoi to masisasi rari diri masiretene mode-mode'e Ngoi ḏuanga i'a to 'a'a ra ngini mete'e sa'olo ngini ninga demo ga'a Ngoi ta 'isene ḏua.#Nyo. 14:2 29Toma daeraha baulaco nena-ne ninga mayeti-mayeti matai are, gena-ge ngini mo-moini ga'a ninga 'umuru nyagi romoḏiḏi re sie ga'a manga lomanga 'i silefo ḏua, sababu ngini reni kuḏubungu ra Ngoi. 30Ngini nena-ne matengo i'a mai ua ḏuanga i'a ni osama ua toma daeraha ga'a Ngoi reto 'a'a jaji rema sasi ga'a Ta pula'a di'a ngini na ḏegoro, ḏuga-ḏuga pa'i 'a Kaleb , unanga gena-ge 'a Yefune 'ai ngowa'a nau'u re 'a Yosua, unanga gena-ge 'a Nun 'ai ngowa'a nau'u! 31Ngini ni kanau ḏua mangale ninga ngowa-ngowa'a ḏuanga i'a ngowa'a ya'u gasa sa'olo dawana. Mada'a ananga Ngoi ta'u sigasa osama toma daeraha gena-ge. Ananga gena-ge ḏuanga i'a ya basono daeraha ga'a ngini na dawongo ua. 32Mada'a mangale ngini, ninga mayeti-mayeti ḏuanga i'a 'i matai are toma daeraha baulaco nena-ne. 33Re ninga ngowa-ngowa'a ḏuanga i'a 'aḏi dadi ma tero sa'olo sowohi toma daeraha baulaco ma di'ara musungu nyagi rata. Sababu ngini reni 'isene Ngoi, Ma JOU riwara, ananga ḏuanga i'a sanga bahala ma tero sa'olo doiti gina ma ḏubuso, singadolo ngini mo-moini ni dadi mayeti toma daeraha baulaco. 34Mete'e wangere ma repe ga'a ngini disa waro daeraha gena-ge, enanga gena-ge wangere nyagi rata, wangere moi siroimi ma tero musungu rimoi. Dadi ma di'ara musungu nyagi rata ngini balasu na basono bahala ma tero sa'olo doiti gina ma ḏubuso sababu ninga ga'a ma rapu, la ngini mode-mode'e ni waro ma duhu sa'olo na basono wakutu Ngoi, Ma JOU to mamete'e ngini ua. 35Ngoi nena-ne Ma JOU to kanau so'o gena-ge. Ngoi ḏuanga i'a to si'a'a mo-moini gena-ge toma ngowa'a Israel ma toropo gena-ge mo-moini ga'a kajahatana ga'a marimoi lawana Ngoi. Toma daeraha baulaco nena-ne ananga ḏuanga i'a 'aḏi moini ḏua, re toma ngi'i nena-ne ananga ḏuanga i'a 'aḏi sengene.>> 36Ngowa'a tamo-tamolo ga'a Musa ya'u 'utusu di'a disa waro daeraha gena-ge kara raḏi ḏibo re si'a'a 'umata 'aḏi kuḏubungu ra Musa sababu 'aḏi siajele habari sa-sakala mangale daeraha gena-ge, 37ngowa'a nau'u ga'a singadolo habari sa-sakala gena-ge 'aḏi nga'unu bahala singadolo sengene talaḏi ra Ma JOU. 38Mada'a toma ngowa'a tamo-tamolo manga sigolona ino ga'a tagi disa waro daeraha gena-ge pa'i 'a Yosua, unanga gena-ge Nun 'ai ngowa'a nau'u re 'a Kaleb, unanga gena-ge 'a Yefune 'ai ngowa'a nau'u, ananga nga muḏiḏi 'aḏi 'ahu moju.
Ngowa'a Israel sanga ta'aloko toma parangi papolo kore sara
14:39-45
39Togumu i'a, 'a Musa 'o singadolo demo-demo gena-ge toma ngowa'a Israel mo-moini, ngowa-ngowa'a gena-ge 'aḏi duka lai siḏi. 40Ma da-daini i'a moju, ananga raḏi momi'i re 'aḏi ḏu-ḏuanga ḏua di'a pere sie toma kie. Re ananga 'aḏi kanau so'o ne: <<Tero mode'e ngene rewo 'a'a ḏosa. Mada'a nange-ne, ngene wo ḏu-ḏuanga ḏua di'a tagi toma daeraha ga'a Ma JOU ro 'a'a jaji rema sasi di'a 'A sipula'a ra ngene.>> 41Mada'a Musa 'o kanau: <<I'a sa'olo mau ni lawana Ma JOU 'ai parenta sababu ninga rancana gena-ge ma hasili cua? 42Awa ni tagi, ninga lawana 'aḏi sita'aloko ngini sababu Ma JOU 'o cua taninga sigolona. 43Sababu ngowa'a Amalek re ngowa'a Kanaan ananga gena-ge da'a taninga biono re ananga ḏuanga i'a 'aḏi sisengene ngini reo samaranga. Ma JOU 'o mamete'e ra ngini riwara; sababu ngini reni celolo ḏuḏunu ra Unanga.>> 44Kalaha so'o gena, ananga 'aḏi maputusu moju di'a tagi toma daeraha kie-kie gena-ge. Mada'a Musa unanga sisoi'i tala ua suyu'u ma daeraha bolo Ma JOU 'ai burua jaji ḏi'i. 45Ḏua ngowa'a Amalek re ngowa'a Kanaan ga'a 'aḏi tegoro toma kie gena-ge 'aḏi sapolo parangi ngowa'a Israel re 'aḏi sita'aloko re kunu'i ngowa'a Israel singadolo toma limau Horma.
2025 Indonesian Bible Society (LAI)