Nyo-nyoimi 13
13
Ngowa'a tamo-tamolo nga nyagi moi re nga muḏiḏi
13:1-33
1Ma JOU 'o kanau ra Musa: 2<<Cumutu na-nau'u nga muḏuo i'a di'a disa waro tana'a Kanaan, ga'a Ngoi ḏuanga i'a Ta sipula'a di'a ngowa'a Israel. Re tamanga ngimo-ngimono manga suku, cumutu suku rimoi matengo re suku rimoi matengo, matengo re matengo gena-ge bi-biri'i tamanga suku rimoi re rimoi.>> 3Dadi Musa 'o 'utusu ananga gena-ge 'aḏi tagi mulaingi toma daeraha baulaco Paran, mete'e Ma JOU 'ai parenta. Ananga mo-moini gena-ge bi-biri'i nga nyagi moi re nga muḏiḏi toma ngowa'a Israel manga sigolona. 4Nena-ne ananga manga loma-lomanga: Toma suku Ruben ino: 'a Syamua, unanga gena-ge 'a Zakur 'ai ngowa'a nau'u; 5toma suku Simeon ino: 'a Safat, unanga gena-ge 'a Hori 'ai ngowa'a nau'u; 6toma suku Yehuda ino: 'a Kaleb, unanga gena-ge 'a Yefune 'ai ngowa'a nau'u; 7toma suku Isakhar ino: 'a Yigal, unanga gena-ge 'a Yusuf 'ai ngowa'a nau'u; 8toma suku Efraim ino: 'a Hosea, unanga gena-ge 'a Nun 'ai ngowa'a nau'u; 9toma suku Benyamin ino: 'a Palti, unanga gena-ge 'a Rafu 'ai ngowa'a nau'u; 10toma suku Zebulon: 'a Gadiel, unanga gena-ge 'a Sodi 'ai ngowa'a nau'u; 11toma suku Yusuf ino, gena-ge toma suku Manasye ino: 'a Gadi, unanga gena-ge 'a Susi 'ai ngowa'a nau'u; 12toma suku Dan ino: 'a Amiel, unanga gena-ge 'a Gemali 'ai ngowa'a nau'u; 13toma suku Asyer ino: 'a Setur, unanga gena-ge 'a Mikhael 'ai ngowa'a nau'u; 14toma suku Naftali ino: 'a Nahbi, unanga gena-ge 'a Wofsi 'ai ngowa'a nau'u; 15toma suku Gad ino: 'a Guel, unanga gena-ge 'a Makhi 'ai ngowa'a nau'u. 16Gena-ge ngowa-ngowa'a manga lomanga ga'a Musa ya'u soma'a di'a disa waro daeraha gena-ge; re 'a Musa 'o silomanga 'a Hosea, unanga gena-ge 'a Nun 'ai ngowa'a nau'u gena-ge 'a Yosua. 17'A Musa 'o 'utusu ngowa'a bi-biri'i gena-ge nga nyagi moi re nga muḏiḏi di'a 'aḏi disa waro tana'a Kanaan, 'o kanau ra ananga: <<Ni tagi papolo kore sara toma Negeb kara ni pere toma kie-kie ma daeraha, 18re tailako la-la daeraha gena-ge, ngowa'a ga'a ya tegoro laḏi te'e bolo ua, ananga laḏi repe bolo repe ua; 19re tailako la-la daeraha gena-ge ga'a ya tegoro, enanga gena-ge 'i rousu bolo ua, ma ngowa-ngowa'a 'aḏi 'ahu toma limau rema ge-gelo bolo ua, 20re ma tana'a ma duhu sa'olo: enanga gena-ge 'i gaji bolo ua, 'age rema ate-ate bolo cua. Site'e tala ninga 'akala re sinyingara, re 'oro ceka'a ua daeraha gena-ge ma hasili.>> Wakutu gena-ge 'anggur ma 'orasa ma 'utu'u ma mulaingi. 21Ananga 'aḏi tagi si'a, kara disa waro daeraha gena-ge mulai toma daeraha baulaco Zin papolo kore sara singadolo toma limau Rehob papolo kore mie, co-cori ngo'omo osama toma limau Hamat. 22Ananga 'aḏi tagi mete'e Tana'a Negeb, ḏua 'aḏi ngadolo toma limau Hebron. Toma limau gena-ge 'age 'a Ahiman, Sesai re Talmai, ananga gena-ge Enak 'ai ju'uda ga'a laḏi te'e re kau'u. (Limau Hebron side'oso lebe siḏa reo Soan toma Mesir.) 23Wakutu ananga 'aḏi ngadolo toma Picaru Eskol, ananga 'aḏi tola'a ma umanga rimoi rema 'anggur ma sowo'o ma 'oki moi kara ngowa'a nga muḏiḏi ya doiti; re ḏi'i 'aḏi gasa delima ma sowo'o re ate ara ma sowo'o muḏuo i'a. 24Ngi'i gena-ge ngowa'a ya silomanga Picaru Eskol, sababu ngowa'a Israel 'aḏi 'oro 'anggur ma sawo'o ma 'oki moi da'a. 25Palisi'i wangere nyagi rata 'aḏi ma togumu disa waro daeraha gena-ge kara 'aḏi maḏibo, 26re 'aḏi sapolo ra Musa re 'a Harun re toma ngowa'a Israel mo-moini toma limau Kadesh, toma daeraha baulaco Paran. Ananga 'aḏi gasa habari ra Musa re 'a Harun re toma ngowa'a Israel ma toropo mo-moini gena-ge, re 'aḏi sijumu daeraha gena-ge ma hasili. 27Ananga ya sijarita mo-moini rema betongo so'o ne: <<Ngomi rema dongosama daeraha gena-ge, le'a ḇato ga'a ngana no 'urusu ra ngomi, mode'e daeraha gena-ge tana'a lai rousu ga'a ri romanga reo haiwani piara re tana'a ma hasili lai repe re enanga nena-ne ma joro ma sowo'o. 28Mada'a ngowa-ngowa'a ga'a tegoro toma daeraha gena-ge ananga 'aḏi te'e re manga limau rema ge-gelo dounu re lai lamo'o. Sidogo ḏi'i, ngomi oḏi'i da'a rema ngowa'a Enak 'ai ju'uda ga'a laḏi te'e re kau'u. 29Ngowa'a Amalek tegoro toma Tana'a Negeb. Ngowa'a Het, ngowa'a Yebus re ngowa'a Amori tegoro toma kie-kie. Re ngowa'a Kanaan tegoro toma ngoloto ma 'uḏu re toma Ḇanyo Yordan ma 'uḏu.>>
30Gena ḏua, 'a Kaleb 'o siogoro bangsa Israel talaḏi ra Musa 'ai biono, unanga gena-ge 'o kanau so'o ne: <<Ua! Ngene wo tagi re wa'u parangi ananga re wa ḏegoro daeraha gena-ge, sababu tantu ḏua ngene wo nga'unu wa 'utungu!>> 31Mada'a ngowa-ngowa'a nau'u ga'a 'aḏi tagi mamete'e ra Kaleb, ananga 'aḏi kanau so'o ne: <<Ngene wo tagi di'a parangi bangsa gena-ge yoḏu'u, sababu ananga lebe te'e reo ngene.>> 32Re ḏi'i ananga 'aḏi singadolo habari sa-sakala mangale daeraha gena-ge ga'a ya disa waro ḏua, ananga 'aḏi kanau so'o ne: <<Daeraha ga'a ngomi rema dongosama di'a disa waro gena-ge, sanga bahala ma duhu ma repe singadolo matengo i'a mai ua ga'a ya tegoro basono 'amana, re ngomi oḏi'i da'a gena-ge ngowa'a mo-moini manga lese laḏi kau-kau'u. 33Re ḏi'i ngomi oḏi'i rema ngowa'a raksasa (gena-ge ngowa'a Enak ga'a laḏi te'e re kau-kau'u, ananga gena-ge manga 'asala toma ngowa-ngowa'a raksasa) re ngomi basono minga diri ma tero sa'olo sasaba re so'o gena-ge ḏi'i ananga 'aḏi 'odi'i ngomi.>>
2025 Indonesian Bible Society (LAI)