Nyo-nyoimi 12
12
Ngo Miryam re 'a Harun 'aḏi lawana ra Musa
12:1-16
1Ngo Miryam re 'a Harun 'aḏi go-go'oro 'a Musa ma sababu 'o molo'ara we-were'a Kush. Sababu mode'e unanga ro 'oro we-were'a Kush. 2Ananga 'aḏi kanau: <<Ma JOU 'o kanau pa'i mete'e 'a Musa ḇato ua, ngene ḏi'i mai nyengara singadolo Ma JOU 'ai demo.>> Ma JOU 'o 'isene ananga manga demo-demo gena-ge. 3'A Musa, unanga ga'a 'o maholo tai 'akala re sinyingara, lebe reo ngowa'a lelegu mo-moini toma dungia nena-ne ma dara. 4Kage-kage Ma JOU 'o kanau ra Musa, Harun re ngo Miryam so'o ne: <<Ngini nga ḏu'ange ni tagi toma Suyu'u Lo-lomu.>> Re ananga gena-ge 'aḏi toma Suyu'u Lo-lomu 5Ḏua Ma JOU 'o 'uci toma kakamo ga'a ma duhu saolo ngasu'u, re made-de'oso toma Suyu'u Lo-lomu gena-ge ma biono, re 'o 'aro'o 'a Harun re ngo Miryam kara ananga nga muḏiḏi 'aḏi sapolo maco-cori talaḏi ra Ma JOU. 6Ma JOU 'o kanau: <<'Isene 'Ari demo nena-ne: Na'o ra ngini ninga sigolona rema nabi matengo. Dadi Ngoi, Ma JOU to masijumu ra unanga toma tingoḏi'i, Ngoi to makanau ra unanga tai nanele ma dara. 7Mada'a so'o gena ua 'a Musa 'Ari falalomu. Unanga pa'i matengo ḇato ga'a Ngoi Tu sigare 'Ari ngo-ngaku Tari wala ma dara. 8Ngoi ra unanga ma'u kanau ma'u talaḏi biono, kama gogono ua, pake cumu-cumu mai ua, re unanga 'o oḏi'i Ngoi Ma JOU 'ari duhu. Ngini nau'u madutu di'a kanau so'o gena-ge mangale 'a Musa 'Ari falalomu.>> 9Sababu gena Ma JOU 'ai duruta ga'a ma tero sa'olo u'u, enanga 'i leja-lejanga ra ananga. Gena ḏua, Unanga ro tagi. 10Re wakutu ma kakamo ri pere tamanga Suyu'u Lo-lomu ma re'u, ngo Miryam mo nga'unu si-siḏi eno'o, 'i buḏo ma tero salju. Re wakutu Harun 'o oḏi'i ngo Miryam, munanga re mo nga'unu sisiḏi eno'o! 11Harun 'o kanau ra Musa: <<Ah 'ari tuanga, awa no singe-ngeta'a hukumana ra ngomi, sababu minga ga'a toma haga ma dara. 12To golo'o awa sieanga i'a munanga ma tero ngowa'a kiau ga'a sengene toma po'olo ma dara moju kara wakutu siḏe-ḏegoro i'a ma lese sengene re ma kaci moi ri wejere.>> 13Ḏua 'a Musa 'o maḏigaro'o ra Ma JOU: <<Ya Ma Jou'ongu Madutu, pahala si-la munanga.>> 14Re Ma JOU 'o kanau ra Musa: <<Na'o ḇaḇa 'o obi'i tami biono, munanga ḏuanga i'a ma doiti ma mara'a ma di'ara wangere tumudingi. Sieanga i'a mo supu toma suyu'u ma daeraha ma ḏuḏunu ma di'ara wangere tumudingi re palisi'i i'a kara munanga nyengara mo maḏibo ino.>> 15Dadi munanga mo supu toma suyu'u ma daeraha ma ḏuḏunu ma di'ara wangere tumudingi, re bangsa gena-ge 'aḏi tagi yoḏu'u moju na'o ngo Miryam mo ḏibo ino nyangu. 16Gena ḏua, bangsa gena-ge 'aḏi tagi moju re sisoi'i tala Hazerot re 'aḏi side'oso manga suyu'u toma daeraha baulaco Paran.
2025 Indonesian Bible Society (LAI)