Nyo-nyoimi 11
11
Ma JOU 'ai u'u
11:1-3
1Toma 'orasa rimoi bangsa Israel 'aḏi kuḏubungu ra Ma JOU 'ai momina mangale 'aḏi 'ahu kangela, re wakutu Ma JOU 'a 'isene, 'Ai duruta ga'a ma tero sa'olo u'u, enanga 'i leja-lejanga. Dadi, Unanga 'ai u'u 'i lejanga ra ananga manga sigolona singadolo u'u 'i siro'u manga suyu'u ma balangu ma 'uḏu. 2Ḏua bangsa gena-ge 'aḏi maḏigaro'o ra Musa kara unanga 'o manyiata ra Ma JOU. Ḏua ma u'u gena-ge 'i sengene. 3Sababu gena-ge, ngowa'a ya si'aro'o ngi'i gena-ge Tabera, sababu Ma JOU 'ai u'u ri lejanga ra ananga manga sigolona.
Ma JOU 'o cumutu ngowa'a nga nyagi tumudingi
11:4-23
4Ngowa-ngowa'a ga'a ngowa'a sa-sapolo ino 'age ra ngowa'a Israel manga sigolona, ananga gena-ge ngowa'a da-danata ga'a nyafusu oromo haiwani ma la'eme lai siḏi; re ngowa'a Israel 'aḏi 'aḏi re 'aḏi kanau: <<Matengo i'a mai ua 'o pula'a haiwani la'eme di'a ngene wa oromo! 5Ngene wo 'elingi nyao'o ga'a ngene wo oromo toma Mesir wa fangu ceka'a i'a mai ua, 'o timu re samaka, ḇawanga kolili re ḇawanga buḏo. 6Mada'a nange-ne ngene nanga jolo'oro 'i dudungu lai siḏi; nanga ngo-ngoromo 'ori i'a ceka'a i'a mai cua, ḏuga-ḏuga pa'i manna nena-ne ḇato ga'a wa oḏi'i.>> 7Manna gena-ge ma tero sa'olo ketumbar re ma tana'a ma tero sa'olo buḏo capuru ḇauru. 8Ngowa'a Israel 'aḏi tagi i'a re ino di'a iḏi'i manna, kara ya si'alusu reo gulinga maḏi bolo ya tutu'u toma ḏiḏisongo ate. Ananga ya sa'ai toma giu'u re ya 'a'a dadi roti ḇululu; ma rasa ma tero momami kama gula ua ga'a 'i sisa'ai reo goroho zaitun. 9Toma 'orasa ma lobi'i wakutu gagini 'uci toma suyu'u ma daeraha, ma manna mai turono ḏi'i. 10Wakutu Musa 'o 'isene bangsa gena-ge, ngowa-ngowa'a ga'a toma rera rimoi-rimoi 'aḏi toma suyu'u ma ngalana ma da-daku, si'a'a Ma JOU 'Ai duruta ga'a ma tero sa'olo u'u, enanga 'i leja-lejanga kara 'a Musa 'ai 'akala re sinyingara 'i kangela. 11Musa 'o kanau ra Ma JOU: <<No 'a'a cira tani falalomu nena-ne! Ngoi to sanga dadalara re cocatu ua Tani momina, singadolo na dogo bangsa nena-ne mo-moini ma susa re sangisara ra ngoi, enanga gena-ge ma tero sa'olo gina ma ḏubuso! 12Ngoi ua 'ari po'olo tegoro bangsa nena-ne mo-moini re ta'u siḏe-ḏegoro i'a ua ananga! Mada'a Ma JOU no kanau ra ngoi toti'i ananga ma tero ḇaḇa 'o toti'i ngowa'a 'olo ceka'a re gasa ananga toma tana'a ga'a Ngoi reto si'a'a jaji rema sasi tamanga ngi-ngimono! 13Sanga ua ngoi to oro haiwani ma la'eme le'a bolo le'a di'a sipula'a bangsa nena-ne mo-moini di'a 'aḏi oromo! Sababu ananga 'aḏi 'aḏi re sigaḏi betongo ra ngoi: <Pula'a haiwani ma la'eme, la ngomi ma oromo.> 14Ngoi pa'i to matengo ḇato, sanga ua ta palihara bangsa nena-ne mo-moini, sababu ananga gena-ge ma tero gina ma ḏubuso ga'a lai tubuso woḏi di'a ngoi. 15Na'o Ma JOU no si'a'a so'o gena ra ngoi, jobilaha na'o No dadalara ngoi, No sisengene ngoi ḇato; la ngoi ta basono awa susa re sangisara nena-ne.>>
16Ḏua Ma JOU 'o kanau moju ra Musa: <<Cumutu di'a Ngoi ngowa'a Israel ma bi-biri'i ma repe nga nyagi tumudingi, ga'a na'u nana'o di'a sibi-biri'i sa'olo bangsa nena-ne ma mandur-mandur. Gasa ananga toma Suyu'u 'Ofi-'Ofi, la ananga 'aḏi sapolo da'a talaḏi ra ngana. 17Dadi Ngoi ḏuanga i'a to 'uci re ma'u kanau ra ngana da'a. Gena ḏua Ngoi Ta 'oro 'Ai kuasa ma balangu ra ngana ino kara Ngoi ḏuanga i'a Ta pula'a ra ananga, singadolo ananga nyengara 'aḏi mamete'e ra ngana ni doiti bangsa gena-ge manga gina ma ḏubuso, dadi ngana na doiti masiretene riwara. 18Mada'a ngana balasu kanau toma bangsa gena-ge so'o ne: Siwola i'a ninga diri di'a wangere da-daini, re ngini ḏuanga i'a ni oromo haiwani la'eme. Sababu ngini reni 'aḏi rerese ma gaḏi talaḏi ra Ma JOU re ni kanau, <<Matengo i'a mai ua 'o pula'a haiwani la'eme di'a ngomi ma oromo! Toma Mesir ngene nanga 'ahu 'i sanangi masala. Sababu gena-ge, Ma JOU ḏuanga i'a 'o pula'a haiwani la'eme di'a ngini na oromo. 19Na oromo pa'i wangere moi ḇato ua, pa'i wangere ḏiḏi ḇato ua, pa'i wangere romotoa ḇato ua, pa'i wangere nyagi moi ḇato ua re pa'i wangere nyagi romoḏiḏi ḇato ua, 20mada'a sitotomo ma di'ara ngara moi, singadolo ngini na singunanga re ni emono enanga gena-ge. Gena-ge 'i dadi sababu ngini reni itomo Ma JOU ga'a 'age ra ngini ninga sigolona re ngini ni 'aḏi rerese ma gaḏi talaḏi ra Musa re ni kanau: Ma faeda cua ngene wo supu toma Mesir!>> 21Mada'a Musa 'o kanau: <<Bangsa ga'a mamete'e ra ngoi nena-ne manga repe nga cala latu rarama (600.000) ga'a 'aḏi tagi rou, re Ma JOU no kanau: <Haiwani ma la'eme, Ngoi ḏuanga i'a Ta pula'a di'a ananga, re 'i totomo ngara moi ananga ḏua ya oromo!> 22Sanga ua, 'abingi, doba, re sapi 'i sitola'a di'a ya oromo singadolo wunusu! Sanga ua, 'aḏi lomu nyao'o mo-moini toma ngoloto ma dara di'a ya oromo singadolo wunusu!>> 23Re Ma JOU 'o kanau ra Musa, <<Sanga ua Ngoi 'ari giama ma kuasa 'i kuranga! Nange-ne ngana ḏuanga i'a na oḏi'i 'Ari demo-demo, enanga 'i dadi ra ngana bolo ua.>>
Ngowa'a bi-biri'i nga nyagi tumudingi
11:24-30
24'A Musa 'o supu sisoi'i tala Suyu'u 'Ofi-'Ofi gena-ge, re unanga 'o singadolo Ma JOU 'ai demo-demo gena-ge toma bangsa Israel. Unanga 'o lomu ngowa'a Israel manga bi-biri'i nga nyagi tumudingi gena-ge re 'o soma'a 'aḏi made-de'oso sigoloḏi Suyu'u 'Ofi-'Ofi. 25Ḏua Ma JOU 'o 'uci toma kakamo ma dara re 'o kanau ra Musa. Gena ḏua Ma JOU 'o 'oro 'Ai kuasa ma balangu ra Musa ino re 'a sigare toma ngowa'a bi-biri'i nga nyagi tumudingi gena-ge. Toma 'orasa kuasa gena-ge 'i dongosama ra ananga gena-ge, ananga 'aḏi kanau ma tero nabi. Mada'a palisi'i i'a, ananga gena-ge 'aḏi 'a'a so'o gena-ge riwara.
26Rema ngowa'a ngamu ḏiḏi moju ga'a tegoro moju toma suyu'u ma daeraha ma dara: matengo 'ai lomanga Eldad, matengo ḏi'i 'ai lomanga Medad. Ananga nga muḏiḏi gena-ge manga lomanga sanga lefo ḏua sa'olo bi-biri'i ga'a Musa ya'u cumutu, mada'a sapolo ua toma Suyu'u 'Ofi-'Ofi. Kuasa gena-ge 'i dongosama ra ananga ngamu ḏiḏi ḏi'i singadolo 'aḏi kanau ma tero sa'olo nabi toma suyu'u ma daeraha. 27Gena ḏua, tubaie matengo da'a 'o lalara i'a ra Musa re 'o kanau,<< 'a Eldad re Medad 'aḏi kanau ma tero nabi toma suyu'u ma daeraha.>> 28Dadi Yosua 'a Nun 'ai ngowa'a nau'u, wakutu unanga 'o raramasa ie moju 'o dadi 'a Musa 'ai so-soma'a, unanga gena-ge 'o kanau: <<'Ari tuanga Musa, sitogumu ananga!>>
29Mada'a Musa 'o sangoro ra unanga, <<Ngana no dodato ngoi awa. Nyengara gari'a Ma JOU 'o pula'a 'Ai kuasa tegoro toma ngowa'a Israel mo-moini singadolo 'aḏi kanau sa'olo nabi!>> 30Gena ḏua 'a Musa 'o maḏibo i'a da'a toma suyu'u ma daeraha, unanga mamete'e reo ngowa'a Israel manga bi-biri'i ḏi'i.
Namo puyuh
11:31-35
31Gena ḏua, Ma JOU 'o sisapolo karawiana 'i wusu singadolo 'i sigasa namo puyuh toma ngoloto re 'i sieta'a matai are toma sigoloḏi suyu'u ma daeraha. Namo puyuh gena-ge 'i eta'a ma giḏanga ḏa ḏo-ḏagi wange moi toma suyu'u ma daeraha re enanga gena-ge ma tounu ma gau'u toma tana'a ma re'u ḏa metere rimoi. 32Dadi toma wangere gena-ge re ma lobi'i tala singadolo da-daini wange moi, ngowa-ngowa'a 'aḏi matai lomu namo-namo puyuh gena-ge, matengo re matengo lomu ma repe ḏa kaḏu nyagi moi. Ananga ya oele toma suyu'u ma daeraha mo-moini. 33Mada'a wakutu ma la'eme gena-ge aro ya goḏi, Ma JOU 'ai duruta ma tero sa'olo u'u, enanga 'i leja-lejanga toma bangsa gena-ge singadolo Ma JOU 'o singa'unu bahala lai lamo'o. 34Sababu gena-ge ngi'i gena-ge 'i silomanga Kibrot-Taawa, sababu toma ngi'i gena-ge siotomo ngowa-ngowa'a da-danata gena-ge. 35Toma Kibrot-Taawa ananga 'aḏi tagi toma Hazero, re 'aḏi tegoro 'age.
2025 Indonesian Bible Society (LAI)