Dadunu 18
18
'imam re ngowa'a suku Lewi manga hasili
1'A Musa 'o kanau toma ngowa'a Israel moju ma betongo so'o ne: <<Ngowa'a suku Lewi ma nau'u mo-moini ḏuanga i'a 'aḏi dadi Ma JOU 'ai 'imam. Sababu gena-ge, ananga gena-ge sanga balangu tana'a ua sa'olo manga warisi sa'olo ngowa'a Israel toma suku lelegu ḏuanga i'a sanga. Siḏibo ḏi'i, ngowa'a suku Lewi ḏuanga i'a 'aḏi oromo Ma JOU 'ai jou-jou tau'u ma balangu re jou-jou ma lelegu di'a ananga. Mo-moini gena-ge 'i dadi manga warisi.#Dad. 18:3 2Ananga sanga tana'a yoḏu'u sa'olo warisi sa'olo suku-suku ma lelegu ḏuanga i'a sanga, sababu Ma JOU 'o dadi ananga manga warisi mete'e Ma JOU 'ai jaji ga'a Unanga ra si'a'a di'a ananga.
3Wakutu ngowa'a Israel 'aḏi sidoa'a manga jou-jou sapi ma nau'u bolo doba ra Ma JOU, tamanga jou-jou gena-ge 'imam manga balangu so'o ne: ma busuu'u romoḏiḏi toma biono, ma bobo'olo re ma po'olo. 4Ḏi'i, ma hasili ma mulaingi toma gandum, 'anggur ma ḇanyo, zaitun ma goroho re doba ma gogo taninga duo-duono, gena-ge ngini na pula'a toma 'imam, 5sababu Ma JOU Ma Jou'ongu Madutu ga'a ngini ni silamo'o re siḏubuso, Unanga ro cumutu suku Lewi re manga ju'uda toma suku Israel mo-moini, la ananga gena-ge 'aḏi dadi 'imam ga'a 'aḏi siḏagi Unanga gena-ge ma mau di'a kasingado-ngadolo i'a.
6Na'o ngowa'a Lewi matengo 'ai 'asala toma limau le'a ḇato toma Israel, unanga 'o nyanyaḏi malage tai limau toma ngi'i ga'a Ma JOU ḏuanga i'a 'A sitantukanga di'a silamo'o re siḏubuso Unanga, ḏua unanga 'o sapolo di'a mau tegoro toma ngi'i gena-ge, 7unanga nyengara 'o malage re siḏagi munara sa'olo Ma JOU 'ai 'imam, Unanga gena-ge Ma Jou'ongu Madutu ga'a unanga ḏi'i 'o silamo'o re siḏubuso. Enanga gena-ge ma tero sa'olo ngowa'a suku Lewi ma lelegu ga'a 'aḏi siḏagi 'imam manga munara talaḏi Ma JOU toma ngi'i gena-ge. 8Sababu gena-ge, unanga gena-ge balasu sanga balangu di'a oromo ma tero ngowa'a suku Lewi ma lelegu. Sidogo ḏi'i, pipisi ga'a unanga 'a sanga sababu 'o wu'unu 'ai ngitu re ngale manga harata.>>
Mete'e awa ngowa'a najis manga duhu ga'a Ma JOU 'a emo-emono
9Ti'ara ua, wakutu ngini ni osama toma daeraha ga'a Ma JOU ḏuanga i'a 'A pula'a ra ngini, Unanga gena-ge Ma Jou'ongu Madutu ga'a ngini ni silamo'o re siḏubuso, awa ni cuḏuḏu'u bangsa-bangsa ga'a 'aḏi tegoro 'age ananga manga 'ahu ma ngo'omo ga'a Ma JOU 'a emo-emono. 10Awa taninga sigolona rema ngowa'a ga'a sidoa'a manga ngowa'a bae na-nau'u bolo we-were'a sa'olo jou-jou tau'u. Re awa matengo i'a 'o dadi tukanga mamaisi, tukanga sarati, tukanga ga'a disa didina'o ma ngale, tukanga jampi-jampi 11tukanga siiranga ngowa'a manga 'akala tukanga ngidu, ngowa'a ga'a 'aro'o ngowa'a se-sengene manga roh bolo ngowa'a ga'a sano toma ngowa'a se-sengene manga roh. 12Ngowa'a ga'a 'aḏi 'a'a so'o gena-ge, Ma JOU 'a emo-emono. Ma sababu gena-ge, Ma JOU, Ma Jou'ongu Madutu ga'a ngini ni silamo'o re siḏubuso, Unanga ḏuanga i'a 'o dusu'u bangsa-bangsa gena-ge taninga biono. 13Dadi awa ngini ni 'a'a ga'a so'o gena-ge, la ngini ni dadi kaninga sala ua talaḏi Ma JOU Ma Jou'ongu Madutu ga'a ngini ni silamo'o re siḏubuso, 14sababu bangsa-bangsa toma tana'a ga'a ti'ara ua, ngini ḏuanga i'a na'u dusu'u, ananga gena-ge 'aḏi mete'e tuka-tukanga mamaisi manga duga re domolo re tukanga ga'a 'aḏi disa didina'o ma ngale. Mada'a Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'o simaha ua ngini ni si'a'a so'o gena-ge.
Ma Jou'ongu Madutu 'o 'a'a jaji di'a sitede nabi matengo
15'A Musa 'o kanau moju toma ngowa-ngowa'a Israel rema betongo so'o ne: Siḏibo ḏi'i, tananga bangsa masiretene Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'O sitede nabi matengo ma tero sa'olo ngoi, 'a Musa, di'a ngini taninga ioronongoḏu masiretene, re ngini balasu ni 'isene unanga gena-ge.
16Gena-ge 'i mete'e wakutu toma 'orasa ngini malomu toma kie Sinai, ngini ni golo'o ra Ma JOU Ma Jou'ongu Madutu ga'a ngini ni silamo'o re siḏubuso so'o ne: <<Pahala awa wo 'isene Ma JOU, Ma Jou'ongu Madutu ga'a ngene wo silamo'o re siḏubuso, Unanga gena-ge 'o kanau moju re awa ḏi'i ni oḏi'i Unanga 'o sapolo toma u'u leja-lejanga, sababu na'o so'o gena-ge, ngene ḏuanga i'a wo sengene.>> 17Sababu gena-ge, Ma JOU 'o kanau ra ngoi, <'Oru ga'a ananga raḏi kanau, mo-moini gena-ge 'i banari.>> 18Dadi tamanga bangsa masiretene Ngoi, Ma JOU ḏuanga i'a to cumutu nabi matengo ma tero sa'olo ngana. Re Ngoi ḏuanga i'a to siajele ra unanga 'oru ga'a balasu unanga 'a sikanau ra ananga. Dadi unanga ḏuanga i'a 'o singadolo 'Ari parenta mo-moini toma bangsa gena-ge. 19Nabi ga'a aro sitede gena-ge, unanga ḏuanga i'a 'o kanau pake 'Ari lomanga, re Ngoi, Ma JOU ḏuanga i'a To sihukumu 'a guna ḇato ga'a 'isene unanga ua. 20Mada'a na'o nabi matengo 'o nau'u madutu singadolo bererongo rimoi pake 'Ari lomanga, momongolo ua Ngoi, Ma JOU to soma'a si'a'a so'o gena ua, unanga gena-ge ḏuanga i'a 'o sengene. So'o gena-ge ḏi'i, nabi matengo ga'a 'o kanau pake jou'ongu ma somoara ma lomanga, unanga gena-ge ḏuanga i'a 'o sengene ḏi'i.>
21Na'o ngini ni masano taninga 'akala re sinyingara ma dara so'o ne: <Ngomi ma waro le'a ino nabi matengo 'ai bererongo ma 'asala ra Ma JOU bolo ua?> 22Na'o nabi matengo 'o kanau pake Ma JOU 'ai lomanga, mada'a 'oru ga'a unanga 'o sikanau, gena-ge 'i dadi ua bolo demo-demo 'i sitotomo ua. Dadi bererongo gena-ge ma 'asala ra Ma JOU tala ua. Nabi gena-ge 'o kanau pake pa'i 'ai lomanga masiretene ḇato re unanga awa ngini nu mojongo ma ceka'a i'a mai ua.>>
Currently Selected:
Dadunu 18: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
