Dadunu 17
17
1'A Musa 'o kanau moju toma ngowa'a Israel rema betongo so'o ne: <<Awa ni pula'a ninga jou-jou sapi ma nau'u bolo doba ga'a lolara ua ga'a rema cira 'oru ḇato ra Ma JOU Ma Jou'ongu Madutu ga'a ngini silamo'o re siḏubuso, sababu jou-jou gena-ge Unanga 'a emo-emono.
2Si'ade-'ade ngini ni 'isene taninga limau rimoi i'a rema ngowa'a matengo i'a: bae na-nau'u bolo we-were'a ga'a 'a'a ḏosa ra Ma JOU 'ai momina, Unanga gena-ge Ma Jou'ongu Madutu ga'a ngini ni silamo'o re siḏubuso sababu ananga 'aḏi palene Ma JOU 'ai jaji ga'a Unanga 'a 'a'a di'a ngini, 3sababu 'aḏi mete'e jou'ongu ma somoara ma mau re ḏi'i 'aḏi silamo'o re siḏubuso jou'ongu ma somoara bolo wangere ma la'o, ngara bolo mumuḏungu-mumuḏungu, mo-moini ga'a Ngoi, Ma JOU 'a simaha ua, 4re na'o limau ma bi-biri'i bolo pagawe, ngini gena-ge ni 'isene habari mangale ngowa'a matengo i'a 'o 'a'a so'o gena-ge, ngini balasu disa waro la-la. Na'o habari gena-ge 'i banari re mode-mode'e ngowa'a matengo gena-ge 'o si'a'a ga'a toma ngowa'a Israel manga sigolona ga'a Ma JOU 'a emo-emono, 5ngowa matengo bae na-nau'u bolo we-were'a, ananga gena-ge ga'a 'aḏi 'a'a ga'a Ma JOU 'a emo-emono, ngini balasu na'u sisupu toma limau ma ḏuḏunu kara ananga gena-ge bae na-nau'u bolo we-were'a, ngini na'u poini reo maḏi singadolo 'aḏi sengene. 6Ngowa'a gena-ge sanga hukumu sengene yoḏu'u na'o ma sakisi pa'i matengo ḇato. Mada'a ngowa'a gena-ge nyengara sanga hukumu sengene na'o rema sakisi nga muḏiḏi bolo nga ḏu'ange. 7Sakisi-sakisi balasu 'aḏi poini ma mulaingi reo maḏi toma ngowa'a matengo ga'a 'o 'a'a gena-ge ga'a Ma JOU 'a emo-emono kara ngowa'a repe 'aḏi simete'e. Rema duhu gena-ge, ngini ni singi-ngiranga kajahatana gena-ge.
'Imam re juruhakimi manga putusanga
8Na'o ngini sa'olo bi-biri'i taninga limau, 'age rema hali ga'a ngini na putusu yoḏu'u sababu lai kangela, ma tero sa'olo sengene ngowa'a rema rancana bolo rancana ua, bolo hali mangale harata bolo ma'u oto lese, bi-biri'i balasu 'o tagi toma ngi'i ga'a Ma JOU ḏuanga i'a 'A sitantukanga, Unanga gena-ge Ma Jou'ongu Madutu ga'a ngini ni silamo'o re siḏubuso. 9Toma ngi'i gena-ge, ngini balasu ni talaḏi toma ngowa'a suku Lewi ga'a 'aḏi dadi 'imam-'imam re juruhakimi, ananga ga'a 'aḏi munara toma 'orasa gena-ge re ni siajele hali gena-ge ra ananga gena-ge re ananga 'aḏi singadolo manga putusanga ra ngini. 10Toma ngi'i gena-ge ga'a Ma JOU ḏuanga i'a ra sitantukanga, ananga ḏuanga i'a 'aḏi singadolo manga putusanga re 'oru ga'a ngini sa'olo bi-biri'i balasu na siḏagi. Gena ḏua, ngini ni maḏibo kara ngini sa'olo bi-biri'i balasu ni siḏagi mode-mode'e mo-moini gena-ge. 11Ngini balasu ni siḏagi mo-moini mete'e ananga gena-ge manga putusanga re bererongo. Kalaha pa'i 'ori i'a ma je-jeka'a madutu ḇato tamanga putusanga ma dara, awa na siḏagi ua. 12Na'o bi-biri'i matengo i'a toma limau gena-ge ga'a momole singadolo 'o mete'e ua juruhakimi bolo 'imam ga'a 'o siḏagi Ma JOU 'ai mau, Unanga gena-ge Ma Jou'ongu Madutu ga'a ngini ni silamo'o re siḏubuso, bi-biri'i gena-ge ngini balasu nu sihukumu sengene. Rema duhu gena-ge, ngini ni singi-ngiranga kajahatana toma Israel manga sigolona. 13Ngowa'a mo-moini ḏuanga i'a ya 'isene hali ga'a ri dadi gena-ge re 'aḏi dadi mojongo singadolo matengo i'a mai ua mau 'o si'a'a so'o gena-ge.>>
'Atoranga mangale ma 'olana
14'A Musa 'o kanau moju toma ngowa'a Israel rema betongo so'o ne: <<Ngini ḏuanga i'a ni osama toma tana'a ga'a ti'ara ua Ma JOU 'A pula'a ra ngini, Unanga gena-ge Ma Jou'ongu Madutu ga'a ngini re ni silamo'o, re siḏubuso kara na ḏegoro re tegoro toma tana'a gena-ge. Gena ḏua, ngini ḏuanga i'a ni kanau so'o ne: <Ngomi mau mi sitede ngowa'a matengo sa'olo ninga 'olana ma tero bangsa-bangsa ga'a 'aḏi tegoro sigoloḏi ngini.> 15Ngini nyengara ni sitede ngowa'a matengo i'a sa'olo ninga 'olana mada'a Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge balasu 'o cumutu 'olana gena-ge re matengo i'a ga'a 'o dadi ninga 'olana pa'i taninga bangsa masiretene ḇato; awa ni cumutu ngowa'a tagi-tagi ino di'a 'o dadi ninga 'olana. 16Sidogo ḏi'i, awa 'olana masiretene sanga jarana ma repe re awa 'o soma'a ngowa'a Israel 'aḏi maḏibo toma Mesir di'a tibo jarana di'a unanga, sababu Ma JOU ro kanau mangale 'Ai 'umata raḏi maḏibo yoḏu'u toma nagara gena-ge. 17Awa 'olana sanga 'ai were'a ma repe, la unanga gena-ge 'o celolo ḏuḏunu awa ra Ma JOU bolo awa ḏi'i unanga masiretene 'o sanga guraci re salaka ma repe woḏi.
18Toma 'orasa unanga matengo i'a 'o sisolano sa'olo 'olana, unanga ngowa'a balasu 'u pula'a boku rimoi ga'a ma dara 'i silefo hukumu nena-ne. Boku gena-ge 'i silefo mete'e toma boku ma mulaingi ga'a 'imam-'imam ngowa'a suku Lewi ya gogono. 19Ma boku gena-ge balasu 'i cori taunu ra ma 'olana re unanga balasu 'a baca tai 'ahu ma giḏanga, la 'o madoto'o di'a 'o dadi 'olana ga'a 'o silamo'o re mojongo Ma JOU, Ma Jou'ongu Madutu ga'a unanga 'o silamo'o re siḏubuso singadolo unanga ḏuanga i'a 'o siḏagi hukumu re 'atoranga mo-moini tau-taunu, 20la awa unanga 'o mafikiri 'ai diri lebe la-lamo'o i'a reo ngowa'a Israel lelegu, re unanga ḏuanga i'a 'o palene ua Ma JOU 'ai parenta gena-ge rimoi i'a mai ua. Dadi unanga rai ju'uda ḏuanga i'a 'aḏi parenta sa'olo bangsa Israel 'ai 'olana di'a ju'uda tala.>>
Currently Selected:
Dadunu 17: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
