Dadunu 16
16
Paskah ma wangere lamo'o
Sup. 12:1-20
1'A Musa 'o kanau moju toma ngowa'a Israel rema betongo so'o ne:<<Ngini balasu ni silamo'o Ma JOU Ma Jou'ongu Madutu ga'a ngini silamo'o re siḏubuso toma Paskah ma laya toma ngara Abib ga'a ngara ma mulaingi. Silamo'o Unanga gena-ge, sababu Unanga 'o sigasa ngini supu toma Mesir toma 'orasa lobi'i rimoi, toma ngara gena-ge ma dara. 2Tagi toma ngi'i ga'a Ma JOU ra sitantukanga di'a silamo'o re siḏubuso Unanga gena-ge Ma Jou'ongu Madutu ga'a ngini ni silamo'o re siḏubuso. Toma ngi'i gena-ge, ngini ni tola'a ninga 'abingi, doba taninga duo-duo bolo ninga sapi rimoi kara na sidoa'a sa'olo Paskah ma jou-jou. Rema duhu so'o gena-ge, ngini ḏuanga i'a ni silamo'o Ma JOU. 3Paskah ma jou-jou gena-ge ma la-la'eme, awa ngini na sioromo reo roti ga'a si'a'a rema ragi. Mada'a siḏibo ḏi'i, ma di'ara wangere tumudingi ngini balasu na oromo ma la-la'eme gena-ge rema roti ga'a kama ragi ua ma tero sa'olo ngini na si'a'a wakutu ni jau-jau sisoi'i tala toma nagara Mesir. Ngini ni oromo roti gena-ge, roti ga'a 'i silomanga roti sangisara, la taninga 'ahu ma giḏanga ngini ni 'elingi ma wangere ngini ni sisoi'i tala Mesir, ngi'i ga'a ngini ni sanga sangisara. 4Ma di'ara wangere tumudingi taninga daeraha, matengo i'a mai ua 'o gogono ragi taninga daeraha mo-moini. Haiwani ma la-la'eme ga'a 'i sidoa'a sa'olo ninga jou-jou toma 'orasa lobi'i ma mulaingi balasu na oromo simoini toma utu gena-ge ḏua.
5Haiwani ga'a di'a Paskah ma jou-jou, awa na sitola'a toma limau-limau ga'a Ma JOU ḏuanga i'a 'O pula'a ra ngini, Unanga gena-ge Ma Jou'ongu Madutu ga'a ngini silamo'o re siḏubuso, 6mada'a toma ngi'i ga'a Ma JOU ḏuanga i'a 'A sitantukanga di'a ni silamo'o re siḏubuso Unanga ga'a Ma Jou'ongu Madutu ga'a ngini ni silamo'o re siḏubuso. Toma ngi'i gena-ge, ngini balasu sidoa'a Paskah ma jou-jou toma 'orasa ma wangere 'i soḏu, ma 'orasa ma tero sa'olo ngini ni sisoi'i tala tana'a Mesir. 7Sa'ai haiwani ma la-la'eme gena-ge re na oromo toma ngi'i ga'a Ma JOU ḏuanga i'a 'A sitantukanga, Unanga gena-ge Ma Jou'ongu Madutu ga'a ngini ni silamo'o re siḏubuso. Re ma da-daini i'a ni maḏibo taninga suyu'u. 8Ma di'ara wangere rarama, ngini balasu ni oromo roti kama ragi ua. Toma wangere ma soi tumudingi, ngini balasu ni malomu di'a silamo'o re siḏubuso Ma JOU Ma Jou'ongu Madutu ga'a ngini ni silamo'o re siḏubuso. Awa ni munara 'oru ḇato toma wangere gena-ge.>>
Migu Tumudingi ma laya lamo'o
(Sup. 34:22; 'Im. 23:15-21)
9Ni roimi toma migu tumudingi ma dara, mulaingi toma wangere ma mulaingi ngini ni 'utu'u gandum, 10kara ni si'elingi 'a'a Migu Tumudingi ma laya lamo'o di'a silamo'o Ma JOU Ma Jou'ongu Madutu ga'a ngini silamo'o re siḏubuso. Toma wangere gena-ge ni gasa ngini masiretene ninga bu-bula'a sa'olo jou-jou sababu 'akala re sinyingara sa-sanangi ra Ma JOU, mete'e barakati ma repe ga'a Unanga gena-ge Ro pula'a ra ngini. Unanga gena-ge Ma Jou'ongu Madutu ga'a ngini ni silamo'o re siḏubuso. 11Re ngini mamete'e reninga ngowa-ngowa'a: bae nau'u bolo were'a, reninga budaka-budaka: bae nau'u bolo were'a re ngowa'a suku Lewi ga'a tegoro taninga limau, ngowa'a tagi-tagi ino, ngowa'a daga re balo-balo ga'a 'aḏi tegoro taninga sigolona, ngini gena-ge mo-moini balasu ni maroanga ra Ma JOU 'ai momina toma ngi'i ga'a Unanga ḏuanga i'a 'A sitantukanga di'a silamo'o re siḏubuso Unanga. Unanga gena-ge Ma Jou'ongu Madutu ga'a ngini silamo'o re siḏubuso. 12'Elingi ma siḏa ngini ni sipakisa di'a munara tubuso sa'olo budaka toma Mesir. Sababu gena-ge, ngini balasu ni siḏagi tau-taunu Ma JOU 'ai parenta mo-moini gena-ge.
Wangere lamo'o Da-daḏusu ma laya
('Im. 23:33-43)
13'A Musa 'o kanau moju toma ngowa-ngowa'a Israel rema betongo so'o ne: 'A Musa 'o kanau moju toma ngowa'a Israel rema betongo so'o ne: <<Ni 'utu'u ninga gandum ma hasili taninga ngi'i taro-taro'o togumu i'a re ni co'o ninga 'anggur ma hasili toma 'anggur ma sowo'o ma jo-jo'o ma duso'o togumu ia, ngini balasu ni 'a'a Wangere lamo'o Da-daḏusu ma laya#16:13 Da-daḏusu ga'a 'i si'a'a reo ate ma so'a ma di'ara wangere tumudingi. 14Ngini balasu ni maroanga reninga ngowa-ngowa'a: bae na-nau'u bolo we-were'a, ninga budaka-budaka: bae na-nau'u bolo we-were'a, ngowa'a suku Lewi, ngowa'a tagi-tagi ino, ngowa'a daga re balo-balo ga'a 'aḏi tegoro taninga limau-limau ma dara. 15Ma di'ara wangere tumudingi, ngini balasu ni 'a'a laya gena-ge di'a silamo'o Ma JOU Ma Jou'ongu Madutu ga'a ngini silamo'o re siḏubuso toma ngi'i ga'a Ma JOU ḏuanga i'a 'A sitantukanga. Ngini mo-moini mode-mode'e nyengara ni maroanga ma'u mete'e, sababu Ma JOU Ma Jou'ongu Madutu ga'a ngini silamo'o re siḏubuso, Unanga gena-ge Ro sibarakati ninga tana'a ma hasili mo-moini re ninga galasau'u ma duduala mo-moini.
16Musungu ma jelele i'a 'age wangere lamo'o ro'ange ga'a ngowa'a Israel ma na-nau'u mo-moini balasu 'aḏi sapolo toma ngi'i Ma JOU ḏuanga i'a 'A sitantukanga. Nena-ne wangere lamo'o ro'ange: Roti kama ragi ua ma laya, Gutu'u ma laya re Da-daḏusu ma laya. Toma 'orasa gena-ge, ananga matengo re matengo balasu 'aḏi gasa ninga jou-jou ra Ma JOU 'ai momina, Unanga gena-ge Ma Jou'ongu Madutu ga'a ngini ni silamo'o re siḏubuso. 17Ngowa'a na-nau'u matengo re matengo 'aḏi pula'a mete'e ninga dinga'unu re mete'e ninga hasili ma repe ga'a Ma JOU Ma Jou'ongu Madutu ga'a ngini silamo'o re siḏubuso, Unanga gena-ge ra pula'a ra ngini.>>
Siḏagi 'adili ma duhu
16:18-20
18'A Musa 'o kanau moju toma ngowa-ngowa'a Israel rema betongo so'o ne: <<Ngini balasu ni sitede ninga bi-biri'i—bi-biri'i re manga pagawe toma suku mo-moini ma sigolona. Ananga gena-ge ḏuanga i'a 'aḏi sijuruhakimi ngowa'a rema 'adili toma limau mo-moini ga'a Ma JOU 'A pula'a ra ngini. Unanga gena-ge, Ma Jou'ongu Madutu ga'a ngini ni silamo'o re siḏubuso. 19Wakutu juruhakimi ni singeta'a putusanga, awa ngini gena-ge na 'a'a kama 'adili ua: Awa ni pa'ala kaci moi. Awa ni dawongo pipisi sepa, sababu enanga gena-ge 'i 'a'a juruhakimi ga'a 'akala soro'unu ngini ninga manga la'o 'i dadi hafu singadolo ngini gena-ge ni singeta'a putusanga rapu di'a ngowa'a manga hali ga'a kamanga sala ua. 20Ngini balasu ni singeta'a putusanga taunu ga'a pa'i 'adili ḇato, la ni 'ahu re ḏegoro toma tana'a ga'a ti'ara ua Ma JOU 'a pula'a ra ngini. Unanga gena-ge Ma Jou'ongu Madutu ga'a ngini ni silamo'o re siḏubuso.
Simaha ua silamo'o re siḏubuso jou'ongu ma somoara re awa sidoa'a jou-jou ga'a lolara ua
16:21-17:1
21Awa ngini ni 'a'a side'oso dulada ate Asyera ma ngasu-ngasu'u toma jou-jou ma ngi'i ma gagoro ga'a ngini na 'a'a di'a Ma JOU Ma Jou'ongu Madutu ga'a ngini ni silamo'o re siḏubuso. 22Re ḏi'i awa ni side'oso ngasu'u maḏi 'oru ḇato di'a silamo'o re siḏubuso jou'ongu ma somoara, sababu Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'O emono ngasu'u maḏi gena-ge.
Currently Selected:
Dadunu 16: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
