Dadunu 15
15
Musungu ma soi tumudingi
('Im. 25:1-7)
1'A Musa 'o kanau moju toma ngowa'a Israel ma betongo so'o ne: <<Toma musungu ma soi tumudingi ma ḏo-ḏogumu ma jelele i'a, ngini balasu ni singi-ngiranga banyatoro. 2Rema duhu so'o ne: Ngowa'a Israel matengo re matengo ga'a 'o sibau pipisi toma ngowa'a bangsa Israel, unanga balasu 'o singi-ngiranga banyatoro gena-ge. Awa unanga 'o golo'o ngowa'a Israel ma lelegu 'o gau pipisi, sababu Ma JOU masiretene 'o soma'a banyatoro mo-moini gena-ge ri singi-ngiranga. 3Ngini nyengara ni golo'o ninga banyatoro ga'a ngini ni sibau toma ngowa'a tagi-tagi ino, mada'a ni gau pipisi yoḏu'u ga'a ngini ni sibau toma ngowa'a bangsa Israel ma lelegu.
4Mada'a ngowa'a ma dinga'unu ua ḏuanga i'a raḏi cua taninga bangsa ma sigolona sababu Ma JOU ḏuanga i'a 'O sibarakati ngini toma daeraha sa'olo warisi ga'a Ma JOU ḏuanga i'a 'A pula'a ra ngini, Unanga gena-ge Ma Jou'ongu Madutu ga'a ngini ni silamo'o re siḏubuso. 5Mada'a so'o gena-ge ḏuanga i'a 'i dadi, na'o ngini ni mete'e tau-taunu Ma JOU Ma Jou'ongu Madutu ga'a ngini silamo'o re siḏubuso, re ni mode-mode'e siḏagi mo-moini toma parenta rimoi gena-ge ma dara ga'a ngoi, Musa ta parenta ra ngini wangere nange-ne. 6Sababu Ma JOU Ma Jou'ongu Madutu ga'a ngini ni silamo'o re siḏubuso, Unanga gena-ge ḏuanga i'a 'O sibarakati ngini ma tero ga'a ro 'a'a jaji reo ngini singadolo bangsa ma repe 'aḏi bau pipisi ra ngini, mada'a ngini masiretene ni bau ua ra ananga; ngini ḏuanga i'a ni kuasa bangsa ma repe, mada'a ananga 'aḏi kuasa ra ngini ua.
7Na'o ngowa'a Israel matengo i'a taninga sigolona, unanga 'o dadi ngowa'a ma dinga'unu ua taninga limau ma dara, toma tana'a ga'a Ma JOU Ma Jou'ongu Madutu ga'a ngini silamo'o re siḏubuso Unanga ḏuanga i'a 'A pula'a ra ngini, awa ngini pa'i ni oḏi'i ninga diri masiretene singadolo ngini oḏu'u ni riono ngowa'a Israel gena-ge ga'a 'o dadi ngowa'a ma dinga'unu ua. 8Siḏibo ḏi'i, ngini balasu ni sijumu mura re dadalara ra unanga gena-ge singadolo ni sibau pipisi muḏuo i'a ga'a unanga 'a paralu. 9Ma 'istiari la awa fikirana 'i baolo taninga 'akala re sinyingara mangale ngowa'a gena-ge ngowa'a ma pa-pake ua singadolo ni fikiri so'o ne: <Musungu ma soi tumudingi, gena-ge 'i co-cori di'a singi-ngiranga banyatoro dadi ngoi ḏuanga i'a no sanga pipisi riwara.> Dadi ngini ni oḏu'u sibau pipisi singadolo ni pula'a pipisi ua ra ngowa'a Israel gena-ge ga'a 'o dadi ngowa'a ma dinga'unu ua. Gena ḏua, unanga ḏuanga i'a 'o maḏigaro'o ra Ma JOU di'a kalaki ngini re ngini reni dadi sala sababu ni si'a'a ḏosa gena-ge. 10Siḏibo ḏi'i, ngini ni pula'a pipisi pai'i ra unanga kama kangela ua mada'a ngini na pula'a reninga 'akala re sinyingara sa-sanangi. Dadi Ma JOU Ma Jou'ongu Madutu ga'a ngini silamo'o re siḏubuso ḏua, Unanga gena-ge ḏuanga i'a 'O sibarakati ninga munara mo-moini re 'oru mo-moini ngini na siḏagi. 11'Age ngowa'a ma dinga'unu ua muḏuo i'a toma ngowa'a Israel manga sigolona tau-taunu. Sababu gena-ge, ngoi to soma'a ngini <Sijumu mura re dadalara toma ngowa'a Israel ga'a 'aḏi dadi ngowa'a ma dinga'unu ua bolo ngowa'a Israel ma lelegu ga'a 'aḏi paralu ri-riono 'oru ḇato.>>
Si'a'a ma duhu toma ngowa'a budaka-budaka
(Sup. 21:1-11)
12'A Musa 'o kanau moju toma ngowa'a Israel rema betongo so'o ne:<<Na'o na-nau'u matengo bolo we-were'a taninga suku 'Ibrani, ananga gena-ge 'aḏi siwu'unu manga diri#15:12 Bolo ngowa'a 'aḏi wu'unu ananga ra ngini singadolo 'aḏi dadi ninga budaka re 'aḏi de-de'oso ngini ma di'ara musungu rarama. Gena ḏua, toma musungu ma soi tumudingi ananga gena-ge ngini balasu na'u sibebasa. 13Wakutu ngini ni sibebasa budaka gena-ge, awa simaha 'o maḏibo 'ai giama ma dara cua. 14Siḏibo ḏi'i, ngini balasu ni pula'a ma balangu taninga haiwani taninga duo-duo ra unanga reninga mura re dadalara so'o ne: bae doba bolo 'abingi, bolo pula'a taninga guḏa ma hasili so'o ne: bae gandum toma ngi'i taro-taro'o bolo 'anggur ma ḇanyo ma hasili toma 'anggur ma sowo'o ma jo-jo'o ma ngi'i. Na'o Ma JOU Ma Jou'ongu Madutu ga'a ngini silamo'o re siḏubuso, Unanga gena-ge Ro pula'a barakati ma repe ra ngini, ḏua, ngini ni pula'a balangu gena-ge ma repe ḏi'i ra ananga. 15'Elingi ma siḏa, ngini ni sipakisa di'a munara tubuso sa'olo budaka toma Mesir ḏua Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'O tuusu ngini. Ma sababu gena-ge, Ngoi, Ma JOU, To pula'a parenta gena-ge ra ngini.
16Mada'a budaka gena-ge ngini nu si'a'a rema la-la singadolo unanga 'o dadalara ngini re ninga ngitu. Dadi ḏa unanga 'o kanau ra ngini so'o ne: <Ngoi oḏu'u to sisoi'i ngini.> 17Gena ḏua, ngini balasu ni gasa budaka gena-ge taninga wala ma ngalana ma biono re ni oro do-dopo'o kara ni sitopo'o budaka gena-ge 'ai ngau'u taninga wala ma ngalana. Dadi unanga 'o dadi ninga budaka tai 'umuru ma giḏanga. So'o gena ḏi'i ngini ni siḏagi ma tero toma budaka we-were'a. 18Na'o ngini ni sibebasa budaka matengo, awa ni basono manyasala, sababu ma di'ara musungu rarama unanga ro munara di'a ngini re 'o sanga 'ai ngogele ma tero falalomu matengo 'ai ngogele kaci moi. Na'o ngini ni siḏagi parenta gena-ge, Ma JOU ḏuanga i'a 'O sibarakati ninga munara mo-moini. Unanga gena-ge Ma Jou'ongu Madutu ga'a ngini ni silamo'o re siḏubuso.>>
Haiwani ma jomolo
15:19-23
19<<Sapi ma nau'u, 'abingi ma nau'u bolo doba ma nau'u, mo-moini gena-ge ga'a ma jomolo, ngini balasu na siwola i'a di'a Ma JOU, Ma Jou'ongu Madutu ga'a ngini silamo'o re siḏubuso. Sapi gena-ge na sipake yoḏu'u di'a mapajeko, re doba gena-ge taninga duo-duo, ngini na ḇukuku ma gogo yoḏu'u. 20Siḏibo ḏi'i, musungu ma jelele i'a ngini reninga ngitu re ngale balasu ni oromo haiwani ma jomolo ma la-la'eme ra Ma JOU 'ai momina toma ngi'i ga'a Unanga ḏuanga i'a 'A cumutu. Unanga gena-ge Ma Jou'ongu Madutu ga'a ngini ni silamo'o re siḏubuso. 21Mada'a na'o ma haiwani gena-ge ma jomolo ma lese 'i lolara ua, sa'olo 'i te'uru bolo ma la'o hafu bolo 'i cira madutu 'oru ḇato, ngini na sidoa'a yoḏu'u sa'olo ninga jou-jou ra Ma JOU Ma Jou'ongu Madutu ga'a ngini silamo'o re siḏubuso. 22Ngini matengo re matengo, bae ga'a ni 'ofi bolo ni najis ra Ma JOU 'ai momina, ngini nyengara ni oromo toma wala, sa'olo ni oromo manjanga ma la-la'eme bolo kijang ma la-la'eme. 23Pa'i ma ngaunu ḇato na oromo yoḏu'u, mada'a balasu na pa'ala toma tana'a ma tero ḇanyo.>>
Currently Selected:
Dadunu 15: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
