Dadunu 14
14
Awa mete'e duka re balisa ma rapu
1'A Musa 'o kanau toma ngowa-ngowa'a Israel rema betongo so'o ne: <<Ngini nena-ne ma tero sa'olo Ma JOU 'ai ngowa-ngowa'a nau'u, Unanga gena-ge Ma Jou'ongu Madutu ga'a ngini silamo'o re siḏubuso. Dadi wakutu ngini sanga duka re balisa sababu ngowa'a sengene, awa ni sinyaboto bolo ni ḇukuku ninga sae'e papolo toma biono ma tero ga'a bangsa-bangsa lelegu ya si'a'a. 2Ngini nena-ne ni siwola i'a di'a Ma JOU Ma Jou'ongu Madutu ga'a ngini silamo'o re siḏubuso, sa'olo Unanga gena-ge 'ai 'umata. Toma bangsa mo-moini manga sigolona toma dungia sitabi donga pa'i ngini ḇato ga'a Ma JOU nu cumutu di'a ni dadi 'Ai 'umata masiretene.>>
Haiwani ga'a oromo nyengara re oromo yoḏu'u
('Im. 11:1-47)
3<<Awa ni oromo haiwani ga'a Ma JOU basono 'a emo-emono. 4Mada'a ngini nyengara ni oromo haiwani-haiwani nena-ne: sapi nau'u, doba, 'abingi, 5manjanga ma fara mo-moini, kijang ma fara mo-moini, 'abingi nga-ngabala, sapi nga-ngabala, re doba nga-ngabala. 6Ngini nyengara ni oromo haiwani mo-moini ga'a ma kulucimi'i 'i suka re haiwani ga'a si'alusu ma ngo-ngoromo soi ḏiḏi. 7Mada'a ngini oromo yoḏu'u haiwani ma kulucimi'i 'i suka ua bolo ga'a oromo si'alusu ngo-ngoromo soi ḏiḏi ua nena-ne: Awa ni oromo unta, kalinci bolo pelanduk. Haiwani gena-ge na oromo yoḏu'u sababu kalaha si'alusu ma ngo-ngoromo soi ḏiḏi, ma kulucimi'i 'i suka ua. Dadi haiwani gena-ge 'i dadi najis di'a ngini. 8Re awa ni oromo soto, gena-ge 'i dadi najis di'a ngini sababu kalaha ma kulucimi'i suka, enanga oromo si'alusu ma ngo-ngoromo soi ḏiḏi ua. Ma la-la'eme oromo yoḏu'u, re na'o enanga gena-ge 'i sengene, ngini na cigi yoḏu'u.
9Ngini ni oromo nyengara nyao'o mo-moini ga'a rema ḇe-ḇero re ma dungi'i. 10Haiwani ga'a 'ahu toma ḇanyo mada'a ma ḇuḇutu 'i cua re ma dungi'i 'i cua; enanga gena-ge 'i dadi najis di'a ngini.
11Ngini nyengara ni oromo namo re namo diwanga mo-moini ga'a najis ua. 12Mada'a namo re namo diwanga fara muḏuo i'a ga'a na oromo yoḏu'u nena-ne: namo kareba, namo ering janggut, namo ga'a ma tero kangaisi, 13kangais kolili, kangais kotu'u re namo dendang mete'e enanga ma rupa; 14namo ḇokaka mete'e enanga ma rupa; 15namo unta, namo goro'o, namo camar re kangais mete'e enanga ma rupa; 16namo pungguk, namo goro'o ma la-lamo'o, namo goro'o buḏo; 17namo undan, namo ering re namo dendang ḇanyo, 18namo ranggung, re namo soweko mete'e enanga ma rupa, namo kasa re mano'o.
19Ngingia mo-moini ga'a rema kalatu'u gena-ge 'i najis di'a ngini, dadi na oromo yoḏu'u. 20Haiwani rema kalatu'u ga'a 'i najis ua mete'e Ma JOU, enanga gena-ge na oromo nyengara.
21Haiwani ga'a 'i sengene masiretene, ngini na oromo yoḏu'u, mada'a nyengara na pula'a toma ngowa'a sapo-sapolo ino ga'a tegoro ra ngini, la ya oromo nyengara, bolo nyengara na wu'unu toma ngowa'a tagi-tagi ino. Sababu Ma JOU Ma Jou'ongu Madutu ga'a ngini silamo'o re siḏubuso, Unanga ro siwola i'a ngini nena-ne ḏua sa'olo 'ofi-'ofi di'a Unanga.
<<'Abingi ma ngowa bolo doba ma ngowa, awa na sa'ai sicapuru rema ngina ma susu.>>#Sup. 23:19
'Atoranga mangale jou-jou nyagi moi ma balangu rimoi
22<<Musungu ma jelele i'a ngini balasu na siwola i'a nyagi moi ma balangu rimoi taninga tana'a ma hasili. 23Ḏua ngini balasu na gasa enanga gena-ge toma ngi'i ga'a Ma JOU, Ma Jou'ongu Madutu ḏuanga i'a 'A sitantukanga di'a ngini Nu silamo'o re siḏubuso. Toma ngi'i gena-ge ngini balasu ni oromo ninga balangu moi toma balangu nyagi moi: gena-ge gandum, 'anggur, zaitun ma goroho re sapi ma nau'u ma ngowa re ninga doba re 'abingi ga'a ma jomolo taninga duo-duo, la ngini ḏuanga i'a ni silamo'o re mojongo tau-taunu Ma JOU Ma Jou'ongu Madutu ga'a ngini silamo'o re siḏubuso. 24Mada'a na'o Ma JOU Ma Jou'ongu Madutu ga'a ngini silamo'o re siḏubuso, Unanga gena-ge ḏuanga i'a 'A sitantukanga ma ngi'i di'a silamo'o re siḏubuso Unanga, re ma ngi'i gena-ge 'i kiḏanga woḏi taninga wala, singadolo ma tana'a ma hasili di'a jou-jou nyagi moi ma balangu rimoi ga'a Ma JOU Ra pula'a sa'olo 'Ai barakati ra ngini, ngini na gasa yoḏu'u toma ngi'i gena-ge. Na'o so'o gena-ge, 25ngini balasu na wu'unu ninga tana'a ma hasili gena-ge, re na sao pipisi gena-ge taninga ḇa'a kara na gasa toma ngi'i ga'a Ma JOU ḏuanga i'a 'A sitantukanga di'a silamo'o re siḏubuso Unanga ga'a Ma Jou'ongu Madutu ga'a ngini ni silamo'o re siḏubuso, 26re ni sitibo reo pipisi gena-ge di'a 'oru ḇato ga'a ngini na mau: sapi ma nau'u bolo 'abingi, doba, 'anggur, bolo ka'e-ka'e ga'a 'etolo, 'oru ḇato ngini na nyafusu. Gena ḏua, toma ngi'i gena-ge, ngini reninga ngitu re ngale balasu ni si'a'a laya mamete'e reo monere, sitalaḏi Ma JOU Ma Jou'ongu Madutu ga'a ngini ni silamo'o re siḏubuso.
27Awa ni sidaioranga di'a riono ngowa'a suku Lewi ga'a 'aḏi tegoro taninga limau. Ngini balasu ni 'elingi ananga sababu ananga gena-ge kamanga tana'a masiretene ua sa'olo manga warisi. 28Toma musungu ro'ange ma ḏo-ḏogumu ma jelele i'a, ngini balasu ni gasa jou-jou ga'a ninga balangu moi toma balangu nyagi moi taninga tana'a ma hasili re na lomu toma ngi'i taninga limau-limau ma dara. 29Ngo-ngoromo gena-ge di'a ngowa'a suku Lewi sababu ananga kamanga tana'a ua sa'olo manga warisi, re di'a ngowa'a tagi-tagi ino, ngowa'a daga, re balo-balo, ga'a 'aḏi 'ahu taninga limau-limau ma dara. Ananga gena-ge 'aḏi sapolo nyengara 'aḏi 'oro re oromo singadolo ḏugala. Na'o ngini si'a'a so'o gena, Ma JOU Ma Jou'ongu Madutu ga'a ngini silamo'o re siḏubuso, Unanga gena-ge ḏuanga i'a 'O sibarakati ninga munara mo-moini ma hasili.>>
Currently Selected:
Dadunu 14: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
