Dadunu 13
13
1Si'ade-'ade i'a 'age rema nabi matengo bolo tukanga nanele taninga sigolona, re unanga 'o singadolo ga'a 'i hera-heranga bolo didina'o heranga, 2re ga'a 'i hera-heranga bolo didina'o heranga gena-ge ri dadi, kara unanga gena-ge 'o kanau ra ngini so'o ne: <Ino ngene wo silamo'o re siḏubuso jou'ongu ma somoara re siḏagi enanga ma mau.> mada'a jou'ongu ma somoara gena-ge ga'a ngini na nana'o ua. Kalaha 'oru ga'a 'i kanau gena-ge mode-mode'e 'i dadi, 3awa ni 'isene nabi bolo tukanga nanele manga demo, sababu Ma JOU Ma Jou'ongu Madutu ga'a ngini ni silamo'o re siḏubuso, Unanga gena-ge 'o pake tukanga nanele gena-ge, la 'o tai'i ngini di'a disa waro 'oru ngini mode-mode'e ni dadalara Ma JOU reninga 'akala re sinyingara mo-moini re fikirana mo-moini bolo ua, Unanga gena-ge, Ma Jou'ongu Madutu ga'a ngini ni silamo'o re siḏubuso. 4Ngini balasu ni mete'e Ma JOU Ma Jou'ongu Madutu ga'a ngini ni silamo'o re siḏubuso. Unanga gena-ge, ngini balasu Nu silamo'o re mojongo re siḏagi 'Ai parenta re mete'e 'Ai demo-demo. Re ngini balasu ni mete'e Unanga 'ai mau re macako'o namo-namoto tau-taunu Unanga gena-ge. 5Mada'a nabi bolo tukanga nanele, ngini balasu nu sisengene sababu unanga 'ai maksudu di'a ngini ni lawana Ma JOU Ma Jou'ongu Madutu ga'a ngini silamo'o re siḏubuso, Unanga gena-ge ga'a sigasa ngini supu toma Mesir, re 'O tuusu ngini ga'a ni dadi budaka. Dadi nabi bolo tukanga nanele gena-ge, unanga mau ngini ni macelolo ḏuḏunu taninga 'ahu ma ngo'omo ga'a Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'A parenta ḏua. Sababu gena-ge, ngini balasu ni sisengene nabi bolo tukanga nanele gena-ge, la ni singi-ngiranga kajahatana gena-ge taninga sigolona.
6Na'o 'ani ioro nau'u bolo nongoḏu nau'u bolo 'ani ngowa'a nau'u bolo ngowa'a were'a, bolo 'ani were'a ga'a nimi dadalara, bolo 'ani ḏagilomu co-cori, ananga gena-ge 'aḏi baja ngini rema duhu siogo-ogoro, re 'aḏi kanau so'o ne: <Ino ngene tagi di'a wo siḏagi jou'ongu ma somoara ma mau> enanga gena-ge ga'a ngini bolo ninga ete re dotumu mai ya nana'o ua. 7Ḏa jou'ongu ma somoara gena-ge toma bangsa-bangsa ga'a 'aḏi sigoloḏi ngini bae cori bolo kiḏanga, bolo le'a ḇato toma dungia sitabi donga, 8awa ni mete'e ananga bolo awa ni dowanga ananga manga bo-baja. Re ḏi'i awa ni basono dadalara di'a ananga bolo ni sijumu 'akala re sinyingara ma la-la ra ananga re awa ni sigogono manga ga'a gena-ge. 9Mada'a ananga gena-ge, ngini balasu na'u poini reo maḏi singadolo sengene. Ngowa'a ga'a sanga baja gena-ge, unanga balasu 'o poini maḏi ma mulaingi, kara rayata mo-moini balasu 'aḏi poini reo maḏi ḏi'i. 10Ngowa'a ga'a rai sala gena-ge, ngini balasu nu sisengene, sababu unanga 'o tai'i sikiḏanga ngini ra Ma JOU Ma Jou'ongu Madutu ga'a ngini silamo'o re siḏubuso, Unanga gena-ge ga'a sigasa ngini supu toma Mesir, supu toma nagara gena-ge ga'a ngini ni dadi budaka. 11Dadi bangsa Israel mo-moini ḏuanga i'a ya 'isene mangale 'oru 'i dadi toma ngowa'a gena-ge, ananga 'aḏi dadi mojongo, singadolo matengo i'a mai ua 'o 'a'a kajahatana moju so'o gena-ge.
12Si'ade-'ade i'a ngini ḏuanga i'a ni 'isene habari mangale limau rimoi, ga'a Ma JOU Ma Jou'ongu Madutu ga'a ngene wo silamo'o re siḏubuso, Unanga gena-ge ro pula'a limau ra ngini, 13habari gena-ge mangale ngowa'a ma pa-pake ua nga muḏuo i'a taninga sigolona, ananga gena-ge raḏi sikiḏanga limau masiretene ma manusia ra Ma JOU, ananga 'aḏi kanau so'o ne: <Ino ngene wo tagi di'a siḏagi jou'ongu ma somoara ma mau> enanga gena-ge ga'a ngini na nana'o ua. 14Wakutu ngini ni 'isene ma habari so'o gena-ge, balasu ni sano di'a disa waro mode-mode'e mangale 'oru limau ma manusia 'aḏi si'a'a ga'a gena-ge bolo ua. Na'o ga'a ma emo-emono gena-ge mode-mode'e ri dadi taninga sigolona, 15ḏua ngini balasu ni oro ninga samaranga re ni sisengene limau gena-ge ma manusia mo-moini singadolo matengo i'a mai riwara ga'a 'ahu re manga haiwani, ngini na sisengene ḏi'i singadolo rimoi i'a mai riwara ga'a 'ahu. 16Limau gena-ge ma manusia manga 'ori i'a rana balasu 'i silomu re sitounu tala toma limau ma lapanga, kara ma limau rema 'ori i'a rana balasu na tau'u 'i dadi sa'olo jou-jou tau'u ga'a 'i ti-tiai di'a Ma JOU Ma Jou'ongu Madutu ga'a ngini ni silamo'o re siḏubuso. Mo-moini gena-ge 'i dadi to-tounu di'a kasingado-ngadolo i'a re dadunu simomi'i limau gena-ge ri yoḏu'u. 17'Ori i'a rana gena-ge ga'a Ma JOU 'o sitantukanga enanga balasu 'i siwola i'a di'a singi-ngiranga ti-tiai, awa ni 'oro re sigogono rimoi i'a di'a ninga diri masiretene. Na'o ngini ni si'a'a so'o gena-ge, Ma JOU 'Ai duruta ga'a ma tero sa'olo u'u ma leja-lejanga, enanga 'i iranga re Unanga 'a sijumu 'Ai 'akala re sinyingara ma la-la re 'Ai dadalara lai lamo'o ra ngini singadolo ni sanga ngowa-ngowa'a lai repe re ngini ganapu ma dogo-dogo mete'e 'Ai jaji ga'a Unanga 'a si'a'a ḏua rema sasi taninga ngimo-ngimono. 18Ma JOU ḏuanga i'a 'o si'a'a so'o gena-ge, na'o ngini ni mete'e Ma JOU, Ma Jou'ongu Madutu ga'a ngini ni silamo'o re siḏubuso, re ni siḏagi Ma JOU 'ai parenta mo-moini ga'a ngoi Musa ta singadolo wangere nange-ne, re siḏagi 'oru ga'a banari ra Unanga 'ai momina.>>
Currently Selected:
Dadunu 13: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
