Dadunu 12
12
Ngowa'a Israel manga ngi'i di'a silamo'o re siḏubuso Ma JOU
1'A Musa 'o kanau moju toma ngowa'a Israel ma betongo so'o ne: <<Nena-ne huku-hukumu re 'atoranga-'atoranga ga'a ngini balasu na siḏagi tau-taunu taninga 'ahu ma giḏanga toma tana'a ga'a Ma JOU, Ma Jou'ongu Madutu ga'a ninga ngimo-ngimono 'aḏi silamo'o re siḏubuso, Unanga gena-ge ga'a Ro pula'a tana'a gena-ge ra ngini di'a na ḏegoro. 2Bangsa-bangsa ga'a ngini ḏuanga i'a na'u dusu'u, ngini balasu ni siwejere ananga manga ngi'i mo-moini ga'a ya sipake di'a siḏagi manga jou'ongu ma somoara ma mau: bae toma kie-kie ma tubu, bae toma sau-sau bolo toma ate-ate lamo'o ma 'aḏu. 3Siruba manga jou-jou ma ngi'i re siwejere ma ngasu-ngasu'u maḏi ga'a ya ta'ajiri 'ofi-'ofi. Tau'u ngasu-ngasu'u ate di'a jou'ongu ma somoara we-were'a ngo Asyera. Tawele dulada-dulada ate ma duhu 'oru ḇato. Singi-ngiranga ananga gena-ge manga jou'ongu ma somoara singadolo ngi'i gena-ge rimoi i'a mai riwara.
4Toma 'orasa ngini ni silamo'o re siḏubuso Ma JOU, Ma Jou'ongu Madutu ga'a ngini silamo'o re siḏubuso, awa ni mete'e ananga gena-ge manga duhu di'a silamo'o re siḏubuso manga jou'ongu ma somoara. 5Toma suku-suku Israel manga daeraha ma sigolona, Ma JOU, Ma Jou'ongu Madutu ga'a ngini ni silamo'o re siḏubuso, Unanga ḏuanga i'a 'O sitantukanga ngi'i rimoi, la ngini na sapolo di'a ni silamo'o re siḏubuso Unanga. 6Toma ngi'i gena-ge, ngini balasu ni gasa jou-jou tau'u re jou-jou ma lelegu, ninga balangu moi toma balangu nyagi moi re bu-bula'a ma lelegu, jou-jou ga'a siwola i'a, jou-jou di'a 'o sitotomo ninga jaji ra Ma JOU, jou-jou sababu ninga 'akala re sinyingara sa-sanangi re sapi ma ngowa ma jomolo taninga duo-duo re 'abingi bolo doba ma ngowa ma jomolo taninga duo-duo. 7'Age ḏi'i toma ngi'i gena-ge ra Ma JOU 'ai momina, Unanga gena-ge Ma Jou'ongu Madutu ga'a ngini silamo'o re siḏubuso, ngini reninga ngitu re ngale balasu ni oromo la-la'eme taninga jou-jou re ḏi'i ni maroanga taninga munara ma hasili sababu Ma Jou'ongu Madutu ga'a ngini silamo'o re siḏubuso, Unanga gena-ge 'O sibarakati ngini.
8Toma 'orasa ngini ni osama re tegoro toma tana'a gena-ge re ngini mau ni sidoa'a ninga jou-jou ra Ma JOU, awa ngini ni 'a'a ma tero ngene wo 'a'a mo-moini nange-ne so'o ne: singadolo wangere nena-ne, ngini matengo re matengo sidoa'a jou-jou ra Ma JOU le'a ḇato mete'e ninga 'akala re sinyingara ma mau, 9sababu ngini ni osama nyangu toma tana'a ga'a Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge 'A pula'a ra ngini sa'olo ninga warisi, la ni 'ahu kama mojongo ua. 10Ḏuanga i'a ngini ni iwanga i'a ḇanyo Yordan re ni tegoro toma tana'a ga'a Ma JOU ḏuanga i'a 'O pula'a ra ngini sa'olo ninga warisi. Unanga gena-ge, Ma Jou'ongu Madutu ga'a ngini ni silamo'o re siḏubuso. Re wakutu Ma JOU ḏuanga i'a 'O saolo ngini taninga lawana mo-moini ga'a nu'u sigoloḏi singadolo ngini ni parangi ananga gena-ge riwara re ni 'ahu kama mojongo ua, 11ngini balasu ni sapolo toma ngi'i gena-ge ga'a Ma JOU ḏuanga i'a 'A sitantukanga di'a ngini Nu silamo'o re siḏubuso, Unanga gena-ge, Ma Jou'ongu Madutu ga'a ngini ni silamo'o re siḏubuso. Toma ngi'i gena-ge ngini balasu ni tagi gasa mo-moini ga'a ngoi, Musa, reto parenta ra ngini so'o ne: ngini ninga jou-jou tau'u re ninga jou-jou ma lelegu, ninga balangu moi toma balangu nyagi moi re ninga bu-bula'a ga'a reni sidodahe di'a Ma JOU re ḏi'i ninga jou-jou lai rousu mo-moini di'a sitotomo ninga jaji di'a Ma JOU. 12Re toma ngi'i gena-ge ḏi'i, ngini balasu ni maroanga ra Ma JOU 'ai momina, Unanga gena-ge Ma Jou'ongu Madutu ga'a ngini ni silamo'o re siḏubuso, ngini gena-ge mamete'e ḏi'i reninga ngowa-ngowa'a bae nau'u bolo were'a, reninga budaka-budaka bae nau'u bolo were'a re ḏi'i ngowa-ngowa'a suku Lewi ga'a 'aḏi tegoro taninga limau-limau, sababu ngowa'a Lewi 'aḏi sanga balangu tana'a ua sa'olo manga warisi taninga daeraha.#Dad. 10:8-9 13'Elingi la-la ino, ngini ni sidoa'a yoḏu'u ninga jou-jou tau'u 'oru ḇato da'a kaci moi toma ngi'i ga'a ngini masiretene na sitantukanga, 14mada'a sidoa'a jou-jou gena-ge toma ngi'i ga'a Ma JOU ḏuanga i'a 'A sitantukanga taninga suku rimoi ma daeraha. Pa'i toma ngi'i gena-ge ḇato ngini ni sidoa'a ninga jou-jou tau'u re ni si'a'a ma lelegu mo-moini ga'a ngoi, Musa, ta parenta ra ngini.
15Mada'a ngini nyengara ni tola'a ninga haiwani re na oromo enanga ma la-la'eme toma ngi'i le'a ḇato ga'a ngini na tegoro. Ngini nyengara ni tola'a haiwani re oromo ma la-la'eme ma repe mete'e Ma JOU 'ai barakati ra ngini, Unanga gena-ge Ma Jou'ongu Madutu ga'a ngini ni silamo'o re siḏubuso. Ngowa'a matengo re matengo bae najis bae ga'a 'ofi ra Ma JOU 'ai momina, ngini nyengara ni oromo haiwani ma la-la'eme gena-ge, ma tero ngini nyengara ni oromo haiwani nga-ngabala ma la-la'eme sa'olo 'o kijang bolo manjanga. 16Pa'i ma ngaunu ḇato, ngini na oromo yoḏu'u, mada'a balasu na pa'ala toma tana'a ma tero sa'olo ḇanyo. 17Ra ngini masiretene ngi'i le'a ḇato ga'a ni tegoro, ngini ni oromo yoḏu'u ninga balangu moi toma balangu nyagi moi so'o ne: bae taninga gandum, 'anggur, bolo taninga zaitun ma goroho. Ḏi'i ngini ni oromo yoḏu'u sapi bolo 'abingi re doba ga'a ma jomolo taninga duo-duo, bolo jou-jou di'a sitotomo ninga jaji ra Ma JOU, jou-jou sababu ninga 'akala re sinyingara sa-sanangi bolo ngini masiretene ninga bu-bula'a ma lelegu. 18Siḏibo ḏi'i, pa'i toma ngi'i ḇato ga'a Ma JOU ḏuanga i'a 'A sitantukanga, Unanga gena-ge Ma Jou'ongu Madutu ga'a ngini ni silamo'o re siḏubuso. Re pa'i Tai momina ḇato, ngini reninga ngowa-ngowa'a, bae nau'u bolo were'a, ninga budaka-budaka bae nau'u bolo were'a, re ngowa-ngowa'a suku Lewi ga'a 'aḏi tegoro taninga limau, mo-moini gena-ge balasu 'aḏi oromo bu-bula'a gena-ge. Re ḏi'i pa'i toma ngi'i gena-ge ḇato, ngini balasu ni maroanga sababu ninga munara ma hasili mo-moini ra Ma JOU ino, Unanga gena-ge Ma Jou'ongu Madutu ga'a ngini ni silamo'o re siḏubuso. 19Ngini ni jaga la-la ino, awa singadolo taninga 'ahu ma giḏanga ni sioḏi'i ua ngowa-ngowa'a suku Lewi toma daeraha gena-ge.
20Wakutu Ma JOU Ma Jou'ongu Madutu ga'a ngini silamo'o re siḏubuso, palisi'i i'a Unanga 'o silamo'o ninga daeraha ma bati-bati, mete'e Unanga 'ai jaji ga'a Ro si'a'a ra ngini, re ngini ni mau oromo haiwani ma la-la'eme, ngini nyengara na oromo toma 'orasa 'oru ḇato mete'e ninga 'akala re sinyingara ma mau. 21Na'o Ma JOU Ma Jou'ongu Madutu ga'a ngini ni silamo'o re siḏubuso, Unanga ḏuanga i'a 'o sitantukanga ngi'i di'a ngini ni silamo'o re siḏubuso Unanga mada'a ngi'i gena-ge 'i kiḏanga woḏi ra ngini, ngini nyengara ni tola'a sapi rimoi, doba bolo 'abingi taninga duo-duo ga'a Ma JOU ra pula'a ra ngini, re na oromo ma la-la'eme taninga limau reninga 'akala re sinyingara ma mau. Hali gena-ge ga'a ngoi, Musa, reto kanau ra ngini.#Dad. 12:15 22Ngowa'a matengo re matengo bae najis bae ga'a 'ofi ra Ma JOU 'ai momina, ngini nyengara ni oromo haiwani ma la-la'eme gena-ge, ma tero ga'a ni oromo haiwani nga-ngabala ma la-la'eme sa'olo kijang bolo manjanga. 23Mada'a totoho la-la, haiwani ga'a ma ngaunu rema enanga moju na oromo yoḏu'u, sababu ma ngaunu ga'a 'i sipula'a 'ahu. Dadi ngini na oromo yoḏu'u ngaunu simete'e rema la-la'eme. 24Ma ngaunu ngini mode-mode'e na oromo yoḏu'u, mada'a balasu na pa'ala toma tana'a ma tero sa'olo ḇanyo. 25Ma ngaunu ngini mode-mode'e na oromo yoḏu'u. Na'o ngini ni si'a'a so'o gena-ge ga'a banari ra Ma JOU 'ai momina, ngini re ninga ju'uda ḏuanga i'a ni 'ahu la-la kama kuranga ua. 26Mada'a ninga jou-jou ga'a na siwola i'a di'a Ma JOU re ninga jou-jou di'a sitotomo ninga jaji ra MA JOU, ngini balasu na gasa toma ngi'i ga'a Ma JOU ḏuanga i'a 'A sitantukanga. 27Ninga jou-jou tau'u, gena-ge ma la-la'eme re ngaunu, enanga mo-moini ngini balasu na tau'u simoini toma jou-jou ma ngi'i ma re'u ga'a di'a Ma JOU, Ma Jou'ongu Madutu ga'a ngini ni silamo'o re siḏubuso. Mada'a jou-jou sababu ngini dadunu ni marimoi moju ra Ma JOU, jou-jou gena-ge ma ngaunu balasu ya sipa'ala toma jou-jou ma ngi'i ma re'u di'a Ma JOU, Ma Jou'ongu Madutu ga'a ngini ni silamo'o re siḏubuso. Mada'a ḏi'i jou-jou gena-ge ma la-la'eme, ngini nyengara na oromo. 28Totoho la-la ino, 'ari demo-demo mo-moini ga'a ngoi, Musa, ta parenta ra ngini. Na'o ngini ni siḏagi gena-ge ga'a rousu re banari ra Ma JOU 'ai momina, Unanga gena-ge Ma Jou'ongu Madutu ga'a ngini ni silamo'o re siḏubuso, ngini re ninga ju'uda ḏuanga i'a ni 'ahu la-la kama kuranga ua di'a kasingado-ngadolo i'a.>>
Si'elingi toma ngowa'a ga'a silamo'o re siḏubuso jou'ongu ma somoara
29'A Musa 'o kanau moju toma ngowa'a Israel ma betongo so'o ne: <<Wakutu Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge 'O singi-ngiranga bangsa-bangsa ga'a tegoro toma tana'a gena-ge taninga biono, singadolo ngini nyengara ni dusu'u ananga re ḏegoro tamanga tana'a gena-ge, 30wakutu Ma JOU ro singi-ngiranga bangsa-bangsa gena-ge togumu i'a, ngini balasu ni ma'istiari ino, awa ngini ni mete'e ananga manga duhu di'a silamo'o re siḏubuso manga jou'ongu ma somoara gena-ge ma tero sa'olo ni sado toma jojoḏi. Awa ni sano ra guna ḇato mangale manga jou'ongu ma somoara rema betongo so'o ne: <Ma duhu sa'olo bangsa gena-ge mete'e manga jou'ongu ma somoara ma mau? Sababu ngoi mau to mete'e ananga manga duhu ḏi'i.> 31Bangsa-bangsa gena-ge 'aḏi silamo'o re siḏubuso manga jou'ongu ma somoara, enanga ma duhu, awa na cuḏuḏu'u di'a silamo'o re siḏubuso Ma JOU Ma Jou'ongu Madutu ga'a ngini ni silamo'o re siḏubuso, sababu bangsa-bangsa gena-ge 'aḏi siḏagi ga'a mo-moini ma kajahatana ga'a Ma JOU 'a emo-emono. Sidogo ḏi'i, manga ngowa-ngowa'a masiretene, bae nau'u bolo were'a ananga ya'u tau'u toma jou-jou tau'u ma ngi'i sa'olo manga jou-jou di'a manga jou'ongu ma somoara.
32<<Siḏagi mo-moini ga'a ngoi, Musa, ta parenta ra ngini. Awa na dogo bolo sikuranga. >>
Currently Selected:
Dadunu 12: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
