Génesis 1

Diospa tukuy ima ruwasqanmanta

1Señor Diosmi qallariypi hanaq pacha cielota hinallataq kay hallp'a pachatawan ruwarqa. 2Kay hallp'a pachaqa ch'usaq shapusqan kasharqa. Hach'aqtaq tapaykusharqa uku-ukupi yaku kaqta. Yakuq hawan patanpin Diospa Espiritun kayman waqman kuyuykachasharqa.

3Hinaqtinmi Diosqa kamachirqa:

—K'anchay kachun, nispa.

Chaymi k'anchayqa rikurirqa. 4Hinaqtinmi Diosqa rikurqa chay k'anchayqa allin kasqanta. Hinaqtinmi k'anchayta tutamanta t'aqarqa.

5K'anchaytan Diosqa suticharqa “p'unchaw” nisqata; hach'aqtataq “tuta” nisqata suticharqa. Hinan ch'isiyaykurqa hinallataq paqarimurqanpas. Kaymi qallariy p'unchawqa karqa.

6Chay hinaqa Diosmi kamachirqa:

—Yakukunata t'aqaqqa ch'usaq kachun, shaynapi yakukuna t'aqasqa kananpaq, nispa.

7Diosmi ruwarqa rakina ch'usaqta, hinan wakin yakuqa t'aqaq ch'usaqpa urayninpi karqa. T'aqakusqan ch'usaqpa patanpitaq wakin yaku qeparqa. Chay hinan karqa. 8Diostaq t'aqaq ch'usaqta suticharqa “hanaq pacha”, nisqata. Hinan ch'isiyaykurqa hinallataq paqarimurqanpas. Kaymi iskay kaq p'unchaw karqa.

9Shaynallataqmi Diosqa nirqa:

—Hanaq pachaq uranpi yakukuna hukllaman huñukuchunku, hinaspa ch'aki hallp'a rikurichun, nispa.

Shayna nisqanman hinapunin karqa. 10Hinaspan Diosqa kay ch'aki kaqta sutincharqa “hallp'a” nisqata. Yaku huñusqatataq sutincharqa “lamar qocha” nisqata. Hinaspan Diosqa rikurqa allinpuni kasqanta.

11Hinaspan Diosqa nillarqataq:

—Hallp'a pachapi wiñachun llapa qorakuna layanman hina, mukhuyoqkama. Shaynallataq yurakunapas wiñachun layanman hina, mukhuyoqkama, shaynapi qorakunapas hinallataq yurakunapas mukhunman hina kay pachapi wiñananpaq, nispa.

Chay hinan karqa. 12Chaymi hallp'aqa tukuy laya qorakunata mukhuyoqtakama wiñachimurqa hinallataq llapan yurakunatapas ruruyoqtakama. Hinaspan Diosqa rikurqa allin kasqanta. 13Hinan ch'isiyaykurqa hinallataq paqarimurqanpas. Kaymi kimsa kaq p'unchaw karqa.

14Diosmi nillarqataq:

—Hanaq pachapi k'anchaykuna kachun, p'unchawta tutamanta t'aqananpaq. Chay k'anchaykunan huk señalkuna hina kanqaku, imay tiempokunas, imay p'unchawkunas, imay watas kasqanta runakuna yachananpaq. 15Shaynallataqyá kachun hanaq pacha cielopipas inti, killa shaynallataq qoyllorkunapas, kay pachata k'anchamunanpaq, nispa.

Chay hinan karqa. 16Diosmi iskay hatun k'anchaykunata ruwarqa, hatun k'anchaqta p'unchawta k'anchananpaq, huch'uy k'anchaqtataq tutata k'anchananpaq. Diosqa ruwallarqataqmi qoyllorkunatapas. 17Hinaspan Diosqa hanaq pachapi k'anchaykunata churarqa, kay pachata k'anchaspa, 18p'unchawtapas tutatapas k'anchamunanpaq, shaynapi p'unchawta tutatawan rakinanpaq. Hinaspan Diosqa rikurqa allin kasqanta. 19Hinan ch'isiyaykurqa hinallataq paqarimurqanpas. Kaymi tawa kaq p'unchaw karqa.

20Diosmi nirqa:

—Yaku ukupi paqarimuchun kawsashaq animalkuna; hallp'a pachaq alton cielokunapitaq phawaq animalkunapas phawachun, nispa.

21Hinaspan Diosqa hatun lamar qochaqpa ukunpi kawsaq hatun animalkunata hinallataq tukuy laya animalkunatapas ruwarqa, yakupi kawsanankupaq. Shaynallataqmi alton phawaq tukuy laya animalkunatapas ruwarqa. Hinaspan Diosqa rikurqa allin kasqanta. 22Hinaspan Diosqa chaykunata bendecispa khaynata nirqa:

—Ashkhaman miraychis; lamar qochaman hunt'aychis; phawaq animalkunapas kay pachapi ashkhayachun, nispa.

23Hinan ch'isiyaykurqa hinallataq paqarimurqanpas. Kaymi pishqa kaq p'unchaw karqa.

24Chaymantan Diosqa nillarqataq:

—Hallp'api rikurichun tukuy laya kawsaq animalkuna uywana animalkuna, shallqa animalkuna hinallataq pampallanta suchuspa puriq animalkunapas, nispa.

Hinaqtinmi shayna karqa. 25Diosmi tukuy laya animalkunata ruwarqa: shallqata, uywa animalkunata, hinallataq pampallanta suchuspa puriq animalkunata. Hinaspan Diosqa allin kasqanta qawarirqa.

26Hinaspanmi Diosqa nirqa:

—Runata ruwasunchis noqanchisman rikch'akuqta rikch'ayninchisman hina kananpaq. Paymi lamar qochapi challwakunata, alton phawaq animalkunata, uywana animalkunata, shallqa animalkunata hinallataq llapallan pampallanta suchuspa puriq animalkunatapas dominanqa, nispa.

27Hinaspan Diosqa runata ruwarqa, payman rikch'akuqta qarita warmitawan.

28Diostaq paykunata bendecispa khaynata nirqa:

—Ashkha wawayoqkuna kaychis; hinaspa miraychis; kay pachaman hunt'aychis;

chaypi munayniyoq kaychis; dominaychistaq lamar qochapi kaq challwakunatapas,

alton phawaq animalkunatapas hinallataq kay pachapi puriq llapallan animalkunatapas, nispa.

29Diosmi nillarqataq:

—¡Qawariychis! Qankunamanmi mikunaykichispaq qoykichis kay pachantinpi llapallan mukhuyoq yurakunata hinallataq llapallan ruruq yurakunatapas. 30Ichaqa llapallan shallqa animalkunaqpa, alton phawaq animalkunaqpa hinallataq kay pachapi puriq llapallan animalkunaqpa mikunanpaqtaqmi llapallan verde yurakunaqa kanqa.

Chay hinan karqa. 31Hinaspan Diosqa ruwasqanta rikurqa alli-allinpuni kasqanta. Hinan ch'isiyaykurqa hinallataq paqarimurqanpas. Kaymi soqta kaq p'unchaw karqa.

Currently Selected:

Génesis 1: QXU

Highlight

Copy