Génesis 2
2
1Shaynapin Señor Diosqa hanaq pachata, kay hallp'a pachata hinallataq tukuy kaqkunatapas ruwayta usharqa. 2Qanchis kaq p'unchawpin Diosqa samarqa, tukuy ruwasqankuna ushasqaña kasqanrayku. 3Hinaspan Diosqa qanchis kaq p'unchawta bendecispa kikinpa p'unchawninpaq sapaqcharqa, chay p'unchawpi tukuy ima ruwasqanmanta ushaspa samasqanrayku. 4Shaynatan Señor Diosqa ruwarqa hanaq pachata hinallataq kay pachatawan ima.
Edén huertapi Adán Evawan tiyasqankumanta
Señor Diosmi hanaq pacha cielota hinallataq kay hallp'a pachatawan ruwarqa. 5Ichaqa manaraqmi kay hallp'a pachapiqa ni ima yurakunapas nitaq ni ima qorakunapas wiñamurqaraqchu, Señor Dios manaraq parachimusqanrayku. Nitaqmi ni runapas karqaraqchu chakrapi llank'ananpaqpas. 6Aswanmi kay hallp'a pachamantaqa yakuqpa wasphiynin lloqsimuspa, enteron kay hallp'a pachata qarparqa. 7Hinaqtinmi Señor Dios polvo hallp'amanta runata ruwarqa. Hinaspan kawsay samayta senqanman samaykurqa, chaymi runaqa kawsashaq kapurqa.
8Chaymantan Señor Diosqa Edén huertata plantarqa, intiq lloqsimunan ladopi. Hinaspan ruwasqan runata chayman churarqa. 9Shaynallataqmi Señor Diosqa tukuy laya sumaqllaña yurakunata wiñachirqa. Chay yurakunaqa qawarinapaq hinallataq mikunapaqpas sumaqllaña ruruyoqmi karqa. Hinaspan chay huertaqpa chawpinpi kawsay qokuq yurata churarqa. Hinaspapas churallarqataqmi huk yuratapas; chay yuran karqa allin kaqta hinallataq mana allin kaqta yachanapaq yura.
10Chay Edén nisqa lugarmantan huk mayu lloqsimurqa; hinaspan chay enteron huertata qarparqa. Hinaspataq chay mayuqa tawa mayukunaman rakikurqa. 11Primer kaq mayuqpa sutinmi karqa Pisón. Kay mayun enteron Havila sutiyoq hallp'ata muyurirqa. Chay hallp'apin karqa qori. 12Chay qoriqa sumaq ch'uyan karqa. Chaypiqa kallantaqmi ónice sutiyoq alhaja rumipas hinallataq sumaq asnaq bedelio yurakunaqpa weqenpas. 13Iskay kaq mayuqpa sutinñataqmi karqa Gihón. Chay mayun llapallan Cus nisqa hallp'anta purirqa. 14Kimsa kaq mayuqpa sutinñataqmi karqa Tigris. Chay mayun Asiriaq inti lloqsimuynin kinrayninta purirqa. Tawa kaq mayuqpa sutinñataqmi karqa Éufrates.
15Señor Diosqa chay Edén nisqa lugarpi huertamanmi runata churarqa, chaypi llank'ananpaq hinallataq allinta cuidananpaq ima. 16Hinaspan Señor Diosqa runata kamachirqa khaynata:
—Huertapi llapallan yurakunaqpa rurunmi mikunaykipaq kashan. 17Ichaqa aman mikunkichu allin kaqta hinallataq mana allin kaqta yachanapaq yuraqpa ruruntaqa. Sichus mikurunki chayqa, cheqaqtapunin wañunki, nispa.
18Chaymantan Señor Diosqa nillarqataq khaynata:
—Manan allinchu runa sapallan kasqanqa. Aswanyá huk warmita ruwapusaq payta yanapananpaq, nispa.
19Señor Diosqa hallp'amantan ruwarqa shallqa animalkunata hinallataq alton phawaq animalkunatapas. Hinaspan Señor Diosqa chay llapallan animalkunata Adanman apamurqa, sutinta churananpaq. Chaymi Adanqa llapallan animalkunaman sutinta churarqa; chay sutin churasqanwanmi llapallan kawsaq animalkunaqa reqsisqa karqa. 20Shaynapin Adanqa llapallan animalkunaman sutinta churarqa, uywana animalkunaman, alton phawaq animalkunaman hinallataq llapa shallqa animalkunamanpas. Ichaqa Adanpaqmi mana karqachu yanapaqnin. 21Chaymi Señor Diosqa Adanta mishk'ita puñurqachirqa. Hinaspan puñushanankama huknin kaq waqtanpa thullunta orqoruspa, aychantaqa kaqllata wishq'arapurqa.
22Hinaspan Señor Diosqa runaqpa chay huknin kaq waqta thullun orqosqanmanta huk warmita ruwarqa. Hinaspan payman pusamurqa. 23Hinaqtinmi Adanqa khaynata nirqa:
—¡Waw, kayqa thulluymanta hinallataq aychaymanta kasqa!
Paypa sutinmi kanqa “warmi”,
noqaqpa cuerpoymanta ruwasqa kasqanrayku, nispa.
24Chayraykun qariqa papantapas mamantapas saqespa warminman hukllanchakapunqa. Shaynapin iskayninku huk ch'ulla runa hinallaña kapunqaku.
25Adanpas hinallataq warminpas iskayninkun q'alalla kasharqaku. Ichaqa q'alalla kashaspankupas, manan p'enqanakurqakuchu.
Currently Selected:
Génesis 2: QXU
Highlight
Share
Copy
Want to have your highlights saved across all your devices? Sign up or sign in
© 2025 AIDIA
© 2025 Seed Company
