Efesjanenge 3
3
E Devleskoro tajno plani tano sikavdo
1Me o Pavle, sijum phandlo ko zatvor so služinava e Isuse Hristoske bašo šukaripe tumaro so sijen taro javera nacije.
2Tumen, sigurno, šungjen baši služba soj mange dendi preku i blagodat e Devleskiri baši tumenge. 3O Devel sikavgja mange pi tajna, sar so upre kratko pišingjum tumenge. 4Čitindor adava, šaj te dikhen sar me svatinava i tajna e Hristoskiri, 5savi angleder na sine sikavdi bašo anglune generacije sar soj akana sikavdi taro o Duho leskere sveto apostolenge hem e prorokonge. 6Akaja tani i tajna deka preku o evangelije o manuša taro javera nacije, zaedno e Evrejencar tane naslednikija taro adava so o Devel spremingja. Ola tane delo taro jekh telo hem zaedno delinena o vetuvanje ko Isus Hristos.
7Me ulum sluga bašo akava evangelije preku o daro tari blagodat e Devleskiri soj mange dendi preku o delujba tari leskiri sila. 8Iako me sijum najtikno taro sa e Devleskere manuša, dendi mange akaja blagodat: te propovedinav javere nacijenge o barvalipe e Hristoskoro so nane le krajo, 9hem sarinenge te sikavav i tajna, so ko anglune vremija sine garavdi ko Devel, kova sa stvoringja. 10O Devel adaleja mangla akana preku i Crkva te sikavel pi mudrost ko razna načinja bašo upravitejla hem bašo vlastija ko nebesija. 11Adava sine leskoro večno plani, so kergja preku o Isus Hristos, amaro Gospodari. 12Sebepi o Hristos hem amari vera ki leste, amen akana šaj slobodno hem bizo dar te ava anglo Devel. 13Adaleske molinava tumen te na oven obeshrabrime bašo me problemija so isi man len baši tumenge – mo pharipe tano bašo tumaro šukaripe.
E Pavleskiri molitva bašo Efesjajna
14Adaleske perava ko kočaka anglo Dad, 15so lestar sekoja familija ko nebo hem ki phuv dobinela po anav. 16Molinava man taro leskoro slavno barvalipe, preku leskoro Duho te del tumen sila andral, 17te šaj o Hristos preku i vera te živinel ko tumare vile, hem te oven korenime hem temelime ko mangipe, 18te šaj zaedno sa e Devleskere manušencar svatinena kozom tani i širina, i dolžina, i visina hem kozom tano hor e Hristeskoro mangipe, 19hem te pendžaren akava mangipe e Hristoskoro savo tano upreder sa o džandipe. Agjar ka oven pherde ko sa o pherdipe e Devleskoro.
20A okova so pe silaja kerela buti ki amende, šaj te kerel but poviše, nego so amen šaj te roda ili te mislina, 21leske neka ovel slava ki Crkva hem ko Isus Hristos preku sa o generacije ko sa o vekija! Amin.
