Efesjanenge 4
4
Edinstvo ko telo e Hristeskoro
1Adaleske me, so sijum phandlo bašo Gospodari, molinava tumen te živinen dostojno ko adava so sijen vikime. 2Ki celo poniznost hem krotkost, trpelivo podnesinen jekh jekhe ko mangipe. 3Trudinen tumen te ikeren o edinstvo ko Duho, preku o mir so spojnela tumen. 4Jekh telo tano hem jekh Duho, sar soj jekh nada, ki savi o Devel vikingja tumen. 5Jekh tano o Gospodari, jekh vera, jekh krstiba, 6jekh Devel hem jekh Dad sarinengoro. Ov tano upreder sa, preku sa hem ko sarinen.
7Sarinenge amenge tani dendi i blagodat doborom kozom so o Hristos odredingja. 8Soske pišimo tano ko Sveto Lil:
“Koga uklingja ko učipe,
lela peja bute phandlen,
hem dengja e manušenge poklojna.”#Ps 68:18.
9A adava “uklingja”, značinela deka angleder hulingja ko telune thana e phuvijakere. 10Okova so hulingja tano okova so uklingja po upre taro sa o nebesija, te šaj te pherel sa. 11Ov dengja jekhen bašo apostojla, a javeren bašo prorokija, nesave bašo evangelizatojra, a javeren bašo pastojra hem učitejla, 12te spreminen e Devleskere manušen baši služba, te šaj o telo e Hristoskoro te izgradinel pe, 13dži kote sarine na resaja o edinstvo ki vera hem ko pendžariba e Devleskere Čhave, hem na ovaja zrela manuša, sa dži na ovaja sovršena sar o Hristos. 14Togaš amen nane te ova više tikne čhave, sar o talasija so khelena peske lencar hem so upre tele frdela len sekoja bavlal taro učibe e lošno manušengoro, so šunena pe hovajbaja so legarela len ko lošno drumo. 15Nego, vakerindor o čačipe ko mangipe, ko sa ka bajrova ko Hristos, soj tano o Šero. 16Taro Hristos, celo telo bajrola hem gradinela pe ko mangipe, hem agjar o zglobija ikerena o telo zaedno, a sekova delo kerela pi buti.
Nevo životo ko Hristos
17Adaleske vakerava tumenge hem opomeninava tumen ko Gospodari: te na živinen više sar okola so na džanena e Devleske, so lengere misle bašo ništo nane šukar. 18Lengiri godi tani ki temnina, hem ola tane odvime taro životo e Devleskoro sebepi so na džanena hem sebepi pumare barale vile. 19Našavge o oset baši ladž hem mukhle pe ko grešna želbe, a taro želbe iklola sekoja lošno buti.
20Ama tumen adava na siklilen e Hristostar. 21Ako čače šungjen e Isusestar hem siklilen deka ki leste o čačipe, 22togaš hulaven tumendar o purano životo, e purane manušeja soj ki tumende, so perela bašo hovavne želbe. 23Mukhen tumaro duho te obnovinel tumaro razmisliba. 24Uraven tumen e neve manušeja, soj kerdo spored o Devel ki čačutni pravednost hem svetost.
25Adaleske frden tumendar sekova hovajbe hem “vakeren o čačipe jekh jekheske”#Zah 8:16. soske sarine amen sijem delo taro jekh isto telo. 26“Koga holanena, ma grešinen.”#Ps 4:4. Ma mukhen o kham te perel, a tumen te ačhoven holame, 27ni ma den than e Bengeske. 28Koj čorgja, ma te čorel više, nego neka kerel buti, kerindor šukaripe pe vastencar, te šaj te ovel le so te del okolenge kas so nane.
29Nisavo lošno lafi te na iklol taro tumare muja, nego samo šukar lafi korisno bašo izgradibe kote so trebela, te šaj te del blagodat okolen so šunena. 30Hem ma keren tažno o Sveti Duh e Devleskoro, soleja sijen zapečatime bašo o Dive taro tumaro otkup. 31Ciden tumendar sekova kerkjipe, holi hem gnev, vikiba hem akošiba, hem sekova javer lošnipa. 32Oven šukar hem milostliva jekh jekheske hem oprostinen jekh javereske sar so o Devel oprostingja tumenge ko Hristos.
