Efesjanenge 2
2
Taro meriba ko životo
1A tumen sijen sine mule bašo tumaro neposlušnost hem grevija, 2ko save nekat živingjen sar so živinela akava sveto. Sijen sine poslušna e Bengeske, o vodači e lošno duhongoro ko vozduh, so akana kerela buti maškar okola so nane poslušna e Devleske. 3Hem sarinen amen nekat živingjem sar lende, palo želbe amare teloskere hem kerindor adava so mangla amaro telo hem amari godi. Hem amen pali priroda zaslužingjem i holi e Devleskiri, sar o javera. 4Ama o Devel, soj barvalo so milost, taro po baro mangipe prema amende, 5kergja amen dživde e Hristoja, koga sijem sine mule sebepi o grevo. Spasime sijem preku i blagodat e Devleskiri. 6O Devel vazdingja amen taro mule e Hristoja hem čhigja amen ko nebesija e Isuse Hristoja. 7Adava kergja te šaj ko vremija so avena te sikavel o but baro barvalipe tari leskiri blagodat ko šukaripe prema amende ko Isus Hristos. 8Soske pali blagodat sijen spasime preku i vera – hem adava nane tumendar – adavaj e Devleskoro poklon. 9Na sijen spasime sebepi tumare dejla, te našti nikoj te falinel pe. 10Adaleske so amen sijem leskoro delo, kerde ko Isus Hristos bašo šukar dejla so o Devel angleder spremingja len baši amenge.
Jekh ko Hristos
11Adaleske setinen tumen deka nekat sijen sine bijame sar o manuša taro javera nacije hem sijen sine vikime “biobrezime”, taro Evreja soj tane vikime “obrezime” ko telo taro manušikane vasta. 12Ma bistren deka ko adava vreme sijen sine bizo Hristos, cidime tari e Izraeleskiri zaednica hem sijen sine jabandžije bašo zavet taro vetuvanje, bizo nada hem bizo Devel ko sveto. 13Ama akana ko Isus Hristos, tumen so nekat sijen sine dur taro Devel, ulen paše preku o rat e Hristoskoro.
14Soske o Hristos tano amaro mir. Ov kergja e Evrejen hem e javere nacijen te oven jekh hem pe teloja rušingja o zido taro dušmalnuko so delingja len. 15E Evrejengoro Zakoni sine le but zapovedija hem pravila, ama o Hristos uništingja len te šaj taro duj grupe manuša te kerela ki peste jekh nevo narodo hem te anel mir. 16Pe meribaja ko krsto, o Hristos čhinagja o dušmalnuko taro solduj strane hem kergja len te oven jekh telo. Agjar o solduj strane smirisalile e Devleja. 17Ov alo hem propovedingja o mir tumenge so sijen sine dur e Devlestar hem amenge e Evrejenge so sijem sine paše. 18Soske preku leste akala da hem okola da šaj avena e Dadeste ko jekh Duho.
19Adaleske na sijen više jabandžije ni sar okola so ale tari javer phuv, nego gragjajna zaedno e sveto manušencar hem delo tari familija e Devleskiri. 20Tumen sijen zidime ko temeli e apostolengoro hem e prorokongoro, a korkori o Isus Hristos tano o najvažno bar e temeleskoro. 21Ki leste celo zgrada tani spojmi hem bajrola ko sveto hrami e Gospodareskoro. 22Ki leste tumen da sijen zidime ko Hrami kote so živinela o Devel preku po Duho.
