JOHAN 21

Jisu Ledeukelume Sena ze peu Pecu ngau kegai

1Aipau cai, Tiberius Jaai gade Jisu ledeukelume de peu pecu ngau dai gai. Cide ainzwa tei di. 2Simon Peter, Thomas, (Nedui lie qu kelabe), Nathanael (Galilee ga Cana gade kegwangbe), Zebedee na kena, nah Jisu ledeukelu keda kena si eh pelane cika bam. 3#Luk. 5:5.Simon Peter kedame dage rang, “I heka tuih kera mie zie.” Penui peda ge rang di, “Anui de ncu ngngwa mie zie” dedi. Cine penui lim ge gade tetpet, dede cipau ziu pelane penui magede tuih luma. 4Tingnaimik cuh di zeu ge, Jisu duikuung ga sap lu, dede ledeukelume cide Jisu lie kecu ci ma. 5Pecai pa penui de keteu di, “Rehang medung, nnui magede tuih lu meni?”

Penui keli gai, “Magede ma,” dedi.

6 # Luk. 5:6. Pa penui dage rang gai, “Nnui lim zetle ge nnui langh sam gailo, ciciu de nnui kesa tuih luzie,” debeu. Cine penui relangh sam mpet gai nah cide teu nlüt gailak di, penui heka kekiee ge tuih kelu ne.

7Ledeukelu Jisu pecu hungkelabe Peter dage rang gai, “Cide au Rampaube lie!” Cide Rampaube lie kecu Peter siu luge, pa pe paini keu lü (Pa pe paini ra di eh kelane) dui ga nsau lüt ti. 8Ledeukelu kedame dung lim gade kecang ga mpet lu, relangh be ga heka puihting eh teu lü. Penui au kecang gade dei lama, metre 100 kenzwa kedei gage. 9Penui kecang ga tetpet luge, penui cika mimang ga heka nah nku kesa bam eh ngau lu. 10Pecai Jisu penui dage rang gai, “Nnui cune tuih kelu heka kesa keu gwang lu,” debeu.

11Simon Peter cika lüt lü heka kedibe puihting eh relangh be kecang ga teu mpet lu, pelane ge 153; cika kekiee ge bam liede, relangh be hak dima. 12Jisu penui dage rang gai, “Gwang eh tyeilu.” Ledeukelume migede pecu, “Nang cau no?” de kecu keteu lu kera kekuu gah di, penui cide Rampaube kecu ci bam kedine. 13Cine Jisu nreu gwang lu, nku keu lu, delü cide penui de peu; nah pa heka de keupwa ciciu gai.

14Aide, Jisu ketsai gade pecu teucuh kelu cai ledeukelume dage peu pecu ngau kegai pia pekecumbe.

Jisu nah Peter

15Penui matyei luge, Jisu Simon Peter dage marang di, “Johan napei Simon, nang aidung kedame swa acu kuki lami?” dedi.

Pa keli gai, “Yeo, Rampaubo, I ncu hungkela nang ci lie” dedi.

Jisu peda ge rang gai, “A meurün dung mapie lulo,” dedi. 16Pia pekenabe Jisu peda ge rang di; “Johan napei Simon, nang acu ku lami?” dedi.

Pa keli gai, “Yeo, Rampaubo, I ncu hungkela nang ci lie,” dedi.

Jisu peda ge rang gai, “A Meurün dung mapie lulo,” dedi. 17Pia pekecumbe Jisu rang gai, “Johan napei Simon, nang acu ku lami?” dedi.

Jisu pia cum “Nang acu ku lami?” de keteu kedine Peter pelung sia di, cine pa peda ge rang gai, “Rampaubo, nang maleune ci bam; I ncu hungkela nang ci bam lie!” dedi.

Jisu peda ge rang gai, “A meurün mapie lulo. 18I nda ge kesangbe rang gaila: nang hena dau, nang ntei lü nang mie keneu leu ga mieda; dede nang cing dide, nang n ba kena keto gaizie nah mi kedame ne ncu kaanglü nang mie neu kemak ga ncu ngngwa mie zie.” 19(Aide rang eh, Jisu au Peter tsai kera ha nah Tinggwang ze tei ndu kera ha ranglia gai bam.) Pecai Jisu peda ge rang gai, “A caisui lu!”

Jisu nah Ledeukelu Kedabe

20 # Jhn. 13:25. Peter nreu togwa gaige pecai ga ledeukelu kedabe de bam eh ngau lu, Jisu pecu hungkelabe matyei kebam gade Jisu ze mna eh peda de, “Rampaubo, cau ne ncu tuih gaibeu laino?” de eh keteu kecu bede. 21Peter pecu ngau luge, pa Jisu ze keteu di, “Rampaubo, mina aipau de ha dainzwa no?” dedi.

22Jisu pe sam keli gai, “I gwang kemaktane pecu peu lungh bam neu liede, cide nda de daino? A caisui lulo!” dedi.

23Cine ledeukelube aipau de tsaidi laklie kecu Jisu caisuime kak gade sam teuzang ladi. Dede Jisu au pa tsai laklie kecu au rang ma; pa rang gai, “I gwang kemakta pecu peu lungh bam neu liede, cide nda de daino?” dedi.

24Pa au ledeukelube aidung de rang kegaibe delie, pa ne cidung dede rang gaida; nah pa kerangbe au kesang kecu anui ci bam.

Kekambe

25Cu, Jisu tei kegai makeda kekiee gede bam. Cidung de ket cai ket eh pelane rau gai cai, I cet kecu au laisiukwak rau gai kera de au kideu pelane ga bam daulak lie.

Currently Selected:

JOHAN 21: ZemeNB

Highlight

Copy