JOHAN 20

Herau Mrwa kedi

(Mat. 28:1-8; Mrk. 16:1-8; Luk. 24:1-12)

1Mtaknai tingcang nuge, mui bamreu kecu dau, Mary Magdalene, herau ga mie ge ntsuqang be kimui gade pwagi kedi ngau lu. 2Pa Simon Peter nah Jisu hungkela ledeukelu kedabe da pak mie delü penai dage rang gai, “Penui Rampaube de herau gade pwateu dida, nah penui daiga ge pecu kaizeu bi anui ci meda!” 3Pecai Peter nah ledeukelu kedabe herau ga mie. 4Penui hang na pak la, dede ledeukelu kedabe Peter swa pak rai di delü herau ga miecang rai lu. 5Pa keumie ge kehezui langhcim pai dung ngau lu, dede pa pelung ga lüt ma. 6Pecaine Simon Peter gwang lu, nah pa herau lung ga nzui mie. Pa kehezui langhcim pai dung cika bam eh ngau lu, 7nah Jisu peu kehezui pai de. Cide kehezui langhcim pai dung de ncüt bam ma dede pekatei tsam eh mraa mpet bam. 8Pecai ledeukelu kedabe, herau ga mie rai kelube, de cika lüt; pa ngau lü nlum lu. 9(Penai au kesanglaisiu de pa ketsai gade cuh maisia lie rang kenzeu de ci la mereu.) 10Pecai ledeukelume caili kilung gwang di.

Jisu Mary Magdalene ze Pecu peu kengau

(Mat. 28:9,10; Mrk. 16:9-11)

11Mary herau gole sap eh hap. Pa hap bamreu kecune, pa keumie herau lung ga pie gai 12nah cika tinggimgwame hang na paiha teu eh, Jisu paau kekai ni de ga ntum eh ngau lu, hang ge pe peu lam nah hang ge pe pi lam eh. 13Penai pecu keteu, “Mipoe, nang daitei hap lano?” dedi. Pa keli gai, “Penui a Rampaube de pwatet dida, nah penui pecu daiga ge kai di debi I ci meda!” dedi. 14Pecai pa nreu gwang ge Jisu cika sap eh ngau lu; dede pa cide Jisu lie kecu ci ma. 15Jisu pecu keteu, “Mipoe, nang daitei hap lano? Nang cau de peei lano?” dedi. Pa pecu le hegurie kekwabe lie cet ti, cine pa peda ge rang gai, “Kedihbo, nang pecu pwateu di cai, nang daiga ge pecu kaizeu dibi ada ge ranglia lo, ciciu de I mie pecu peei luzie.” 16Jisu peda ge, “Mary!” de eh rang gai. Pa pelam nreu gwang eh peda ge Ibrime led gade rang gai, “Rabboni!” (Aide pekieh, “Keledeubo”.) 17Jisu peda ge rang gai, “Acu gaai pwa helo, kedanemene I a Pei da caili nghang mereu kecune. Dede a siname da mie I a Pei nah penui Pei, a Tinggwang nah penui Tinggwang da caili gwang dai dilau delie kecu pao beu lo” dedi. 18Cine Mary Magdalene mie ledeukelume dage pa Rampaube de ngau delie pau beu nah pa peda ge rang kebeu de penui dage pao beudi.

Jisu Ledeukelume ze peu Pecu ngau kegai

(Mat. 28:16-20; Mrk. 16:14-18; Luk. 24:36-49)

19Cipau mtaknai tinghegi kekamle mie ge, ledeukelume kikam nkui pung eh nkwa bam, kedanemene penui Judahme kenkieng de hing kedine. Pecai Jisu gwang penui dwa ga sap lu. Pa rang gai, “Lungciep de peu nnui da bam lu.” 20Aide rang gai eh, pa penui de pe ba kena nah pe hejak liah gai. Ledeukelume Rampaube de ngau eh penui sui keyi le puih di. 21Jisu penui dage rang gai dai, “Lungciep de peu nnui da bam lulo. Peibe acu langkegai nzwa, I de nnui de lang gaila.” 22Pecai pa penui reu gage ngngih gai eh rang, “Kemci Rabe luu lulo. 23#Mat. 16:19; 18:18.Nnui mina dung mau gi beu cai, cidung de gi beuzie; nnui penui mau gi beu mecai, penui mau gi beulak.”

Jisu nah Thomas

24Ledeukelume hang ge, Thomas (Nedui lie qu kelabe), Jisu kegwang dau penui de ngngwa bam ma. 25Cine ledeukelu kedame dung peda ge pau beu, “Anui Rampaube de ngau da!” Thomas penui dage rang gai, “I pe ba ga gojal zam ngau eh cika ge a zurang kai nah a ba pe hejak zam gage kai mai, I nlum gailak.” 26Mtakkak ge cai ledeukelume kilung ga nkwa dai bam, nah Thomas penui de ngngwa bam. Kikam dung cap pwabam, dede Jisu penui kak ga gwang sap lu delü rang, “Nnui da lungciep bam lulo.” 27Pecai pa Thomas dage rang gai, “N zurang aika ge kai lu, delü a ba kena pie lulo; pecai n ba keto pet a hejak gage kai lu. Nang lunghau talu, nah nlum lu!” 28Thomas pe sam keli gai, “A Rampaubo nah a Tinggwang!” 29Jisu peda ge rang gai, “Nang acu kengau ziemne nlum ni? Acu ngau mene nlum kelume au dai kenzwa gede samlam pung no!”

Laisiukwak aide rau kegai Kieh

30Laisiukwak aika rau lu kemak miswa kega bata kekiee ge Jisu au ledeukelume dwa gade tei gai. 31Dede aidung de rauzeu kelu Jisu au Messiah, Tinggwang Nabe lie kecu nah nnui pecu nlum#20:31. nlum lu; Laisiu kesa ga bam nlum jüja lu. kelu gade kering ngau lulie kecu nnui de peu nlum lu kerane lie.

Currently Selected:

JOHAN 20: ZemeNB

Highlight

Copy