JOHAN 14

Jisu au Peibe da kegwang Lampuibe

1Jisu penui dage rang beu, “Nnui lung keherei diso nah keheitei diso. Tinggwang ze nlum#14:1. Nlum; mede Nang nlum lu. lu nah acu de nlum bam lu. 2A pei ki ga kibung bam süt, nah I nnui ziemne heni ge telei lai eh bam. Ciciu melie cai I nnui dage aide rang lak nage.#14:2. Bam lie... melie cai; mede A pei ki ga kibung bam süt; ciciu melie cai, I gwang eh nnui ziemne heni telei zie lie nnui dage rang zie ni? 3Nah kedanemene pa nnui de ngngwa la nah nnui lung ga bam. I mie nnui ziemne heni ge telei lude, I caili gwang eh nnui de ada ngngwa gwang luzie, ciciu eh nnui I kebam ga bam luzie. 4I miedi lai eh kebam heni lampui de nnui ci bam.” 5Thomas peda ge rang gai, “Rampaubo, nang daiga mie lau bi anui au ci bam ma; cine dainzwa anui cika kemie lampui ci lu laino?”

6Jisu pe sam keli gai, “I lampui be, kesangbe, nah keringbe da; migede ada de maige Peibe da gwang lu lama.” 7Pa penui dage rang gai, “Cu au nnui acu ci bam kedine, nnui a Pei dede ci#14:7. Cu au nnui acu ci bam kedine... nnui ci zie; Laisiu kesa bam Nnui acu ci lu decai... nnui ci luzie lu zieda, nah cu gade nnui pecu ci bam dida nah pecu ngau luda.”

8Philip peda ge rang di, “Rampaubo, Peibe de anui de pwalia lo; anui cide teu maikesia pelane da.”

9Jisu keli gai, “Peting ketie ge I nnui pelane de ngngwa la dida; dede nang acu ci meni, Philip? Acu ngau kedibe a Pei ze de ngau dida. Cine, daitei nnui ‘Anui de Peibe de pwalia lo’ de eh rang lano? 10Philip, nang nlum meni, I au Peibe lung ga bam nah Peibe au a lung ga bam kecu de?” Jisu pa ledeukelume dage rang gai, “I nnui dage rang kegai sam dung au ada de gwang ma. Peibe, a lung ga kebambe ne pekatei pe ta teila. 11I Peibe lung ga bam lie kecu nah Peibe a lung ga bam lie kecu I rang kegai dau nlum lulo. Mecai, I tei kelabe ziemne de nlum lulo. 12I nnui dage kesangbe rang la: acu nlum kelu keheibe de I keteibe tei zie — yeo, pa au dihki kecu dung de tei zie, kedanemene I Peibe da gwang di lai eh bam di delu. 13Nah nnui a zi gade kie kegai leune I tei beuzie, ciciu eh Peibe kendube Nabe dade liah gai kerane. 14Nnui a zi gade makeheibe kie liede#14:14. Laisiu kesa ga bam ma ada de., I cide tei beuzie.

Kemci Rabe kai beu kera Sampet

15“Nnui acu ku lalie cai, nnui a sam dung mzai zie. 16I Peibe dade kie zie, nah pa nnui de kengha keda ge peu zie, pa kelungta nnui da lazie. 17Pa au Rabe Tinggwang ha kesangbe liah gai kelabe lie. Kideube pecu luu lu gailak, kedanemene cide pecu ngau gailak mede ci gailak. Dede nnui pecu ci bam, kedanemene pa nnui de ngngwa lala nah#14:17. au; Laisiu kesa ga bam luzie. nnui lung ga bam.

18“I tetti de, nnui de peu nnuikatei dilak; I nnui da caili gwang zie. 19Matie mene kideube acu ngau sita dizie, dede nnui acu ngau luzie; nah I ring kelane, nnui de ring luzie. 20Cipau tingba de gwang de, nnui au I Peibe lung ga kebam nah nnui a lung ga kebam ci luzie, I nnui lung ga kebam nzwa eh.

21“A sam dung luu kelu keheibe de nah cidung de mzai kelame acu ku kelabe da. Acu hung kelame de Peibe ne hung zie; I de pecu hung zie nah akatei acu peda ge liah gaizie.”

22Judas (Judas Iscariot kemakbe) rang di, “Rampaubo, nang nkatei ncu kideube dage mene anui de liah gaibeu kera cide dainzwa lu laino?”

23Jisu pe sam keli gai, “Keheibe de acu hung kelame a keledeu mzai zie. A pei pecu hung zie, nah a Pei anai peda gwang eh pecu ngngwa lungh zie. 24Acu hung la kemakme a keledeu mzai lama. Nah keledeu nnui nkieng kelu de au a sam ma, dede acu langkegaibe, Peibe, dade gwang.

25“I aide nnui de ngngwa kebam dau ge nnui de ranglia dida. 26Kenghabe, Kemci Rabe, pecu a zi gade Peibe ne lang gaibeu kerabe de, nnui de maleune ledeu beuzie nah I nnui dage rang kebeu leune peu nsung luzie.

27“I nnui de lungciep kaidiak beula; I a gu lungciep kaidiak beula; I a gu lungciep nnui de peu la. Kideube kepeu nzwa eh I cide nnui de peu lama. Helung keherei nah lungnaang diso; ngngi diso. 28I nnui da rang eh nnui siu luda, ‘I tetti zie, dede I nnui da caili gwang zie.’ Nnui acu hung la cai, I Peibe da gwang di lai kezeu ne nnui suiyi luzie; kedanemene pa au a swa dihki kecune. 29I cu cidung pelane tei kedi dwa nnui dage rang gai dida, ciciu eh cide tei kegwang dau, nnui nlum lu kerane. 30I nnui dage marang tie gai lakta, kedanemene kideu aide reu kedibe gwang la delu. Pa au a reu ga kenkieng ga, 31dede kideube au I a Pei de hungkela de ci maisia; cine pa ada ge rang kebeu leune I teila.

“Gwang lu, anui heni aika de tet cuhgo.

Currently Selected:

JOHAN 14: ZemeNB

Highlight

Copy