JOHAN 13

Jisu ledeukelume Pi Kehui

1Cu au Kahkegwang Ngyi dwa lang nai ge benai Jisu au pa kideu aide püt di eh Peibe da gwang di kera bamdapkak be gwang bam kedi ci lu. Pa kideu ga pe gu mede hung lamuih eh gwang, nah pa penui de penlih ga kecang de hung gwang. 2Jisu nah ledeukelume matyei bam. Herakesiabe ne Simon Iscariot napei Judas lung gage Jisu ze tuih gaibeu kera lungcet kai beu eh ladi.#13:2. Herakesiabe... Jisu de tuih kera teila; mede Herakesiabe au peu Simon Iscariot napei Judas de Jisu de tuih gaibeu kera tiak mning lü ladi. 3Jisu au Peibe pecu kenkieng peu cangsiak kecu ci bam; pa au Tinggwang da gwang di lai kebam ci bam. 4Cine pa kaira gade cuh lü pe pai ra di delü pai ge nkahng lu. 5Pecai pa hekwak ge gage dui rui gailu delü ledeukelume pi huilü pe qia ga kaang pwa kela pai le cidung de noi cahng di. 6Pa Simon Peter da gwang, pa peda ge rang, “Rampaubo, nang a pi hui launi?” 7Jisu pe sam keli gai, “I tei kebam de nang cu ci ma, dede nane nang ci luzie.” 8Peter mdu gai, “Madaude nang a pi huilak!” Jisu keli gai, “I n pi hui mecai, nang au a gu ledeukelume tei si gailak.” 9Simon Peter keli gai, “Rampaubo, ciciu cai a pi rünne hui so! A ba nah a peu de silo!” 10Jisu rang gai, “Duipia kedibe keheibe de nci cang bam dida nah pecu duipia dai mede yida, pe pi gwale.#13:10. Laisiu kesa ga bam ma pe pi gwale. Nnui pelane nci, hang ge gwale.” 11(Jisu au cau bene pecu tuih gai beuzie bi ci bam di; cine pa rang di, “Nnui pelane nci hang ge gwale.”) 12#Luk. 22:27.Jisu penui pi hui dige, pa pe pai bah dai lu delü kaira ga pe bahm ga caili gwang lu. Pa keteu, “Nnui I cu tei kegai de ci lu demi? 13Nnui acu le keledeubo nah Rampaubo de eh qu la, nah nnui cide petau da, kedanemene I cipau de delu. 14I, nnui Rampaube nah keledeube, nnui pi cune hui dida. Nnui de, cine, hang gege pi hui maisia. 15I nnui ziemne puisau tei lia dida, ciciu eh nnui I cune tei kegai de tei lu kerane. 16#Mat. 10:24; Luk. 6:40; Jhn. 15:20.I nnui dage kesangbe ranglia la. Kilabaang gede pe mpaube swa dihki ma, nah samgwame gede pecu langkegaibe swa dihki ma. 17Cu nnui kesang aide ci lu delu, nnui cide tei mzai lie cai nnui samlam pungtu delie! 18#Lei. 41:9.I nnui pelane ha rang bam ma; I au I kedetkelume de ci bam. Dede kesanglaisiu rang kela de teicang maisia, ‘A taktyei puk mzi ketyeibe de acu cwa di.’ 19I cu cide tei kedi dwa nnui dage ranglia la, ciciu eh cide tei kecu dau, nnui au ‘I au I’ kecu nlum luzie. 20#Mat. 10:40; Mrk. 9:37; Luk. 9:48; 10:16.I nnui dage kesangbe ranglia la: I langkegai keheibe de luu kelube acu de luu lula; nah acu luu kelube acu langkegaibe dede luu lula.”

Jisu pecu Tuih gai kera Mrai Kerang

(Mat. 26:20-25; Mrk. 14:17-21; Luk. 22:21-23)

21Jisu aide rang kegai cai, pa pe lung keherei süt ti nah mdudie eh rang gai, “I nnui dage kesangbe ranglia zeu lie: nnui hang ge acu tuih gaibeu lai bam.” 22Ledeukelume hang ge gede pie gai, pa cau be ha rang zeu bi kecu penui de kebwak süt eh. 23Ledeukelume hang ge, Jisu hungkelabe, Jisu tai ga ntum bam. 24Simon Peter peda ge maciem tei gai eh rang di, “Pa cau be ha rang bam bi pecu keteu gailo.” 25Cine ledeukelu cipau de Jisu tai ga mna eh keteu di, “Rampaubo, cide cau no?” 26Jisu keli gai, “I giidui gage nku mpung lü cide pecu peu zie; mina cipau deda.” Cine pa nku ket keu lu, cide mpung lu, delü cide pwa Judas, Simon Iscariot, napei de peu gai. 27Judas nku tyeilu kerikezi Satan pelung ga lüt ti. Jisu peda ge rang gai, “Nang teilai kebam de mzet lulo!” 28Table ga kebamme migede Jisu aide daitei peda ge rang bi ci ma. 29Judas au rangkang bung keteube kecune, ledeukelume midung ge Jisu au peda de penui hengyi ziemne teu maikesia mie lui kerame de kegame de mapeu gailo rang zeu lie cet ti. 30Judas nku luu lu delü hegole tet zette miedi. Cide tingmui di.

Aja Keheci

31Judas tet kedi cai, Jisu rang gai; “Cu au Mina Nabe kendu keulia zeuda; cu au Tinggwang kendu peda de keulia zeuda. 32Nah Tinggwang kendu peda de keulia di cai, pecai Tinggwang ne mina kendu de peda de keulia gaizie, nah pa tei zette gaizie. 33#Jhn. 7:34.A name dung I nnui de ngngwa bam tie lakta, nnui acu peei zie, dede I Judahme kenkieng dung dage kerang nzwa nnui dage rang gaila, “Nnui au I kemie ga mie gailak. 34#Jhn. 15:12,17; 1 Jn. 3:23; 2Jn. 5.Nah I cu nnui de aja keheci ge peu gaila: hang ge gede hung lu. I nnui de keku nzwa eh, nnui de hang ge gede hung lu maisia. 35Nnui hang ge gede keku bam cai, mileune nnui au a caisuime kecu ci luzie.”

Jisu Peter Mlai kera Rang kenswa

(Mat. 26:31-35; Mrk. 14:27-31; Luk. 22:31-34)

36Simon Peter pecu keteu, “Nang daiga mie launo, Rampaubo?”

“I daiga mie zie bi nnui a caisui gailak, dede kekamle nnui a caisui zie,” de eh Jisu keli gai.

37Peter keteu di, “Rampaubo, I daitei eh cu n caisui gailak no? I n ziemne tsaibeu kera ntei luda!”

38Jisu keli gai, “Nang a ziemne tsaibeu kera ntei kesang lu deni? I nda ge kesangbe rang gaila: nrui kekoah dwa nang acu ci melie eh pia cum rang dizie.”

Currently Selected:

JOHAN 13: ZemeNB

Highlight

Copy