JOHAN 15

Jisu au Kubebang kesangbe

1“I kubebang kesangbe, nah a Pei au hegurie keteibe. 2Ada kebam petsi buih lula kemakbe kiak leune pa suu dila, nah petsi buih lu kela kiak leune pa mzwak gai beula, ciciu de cide nci eh petsi buih kiee lu kerane. 3I keledeu nnui de kepeu dene nnui de tei nci pwabam dida. 4Ada ket tei bam lu, ciciu de I nnui da ngngwa ket tei bam luzie. Pekiak ge pekatei petsi buih gailak; cide kubebang ga bam kelu rünne gade petsi buih luzie. Cinzwa eh nnui ada bam lu mecai, nnui tsi buih gailak.

5“I au kubebang lie, nnui au pe kiak dung lie. Keheibe de ada bam kelume, nah I peda bam kelume, petsi buih süt luzie; kedanemene nnui au acu simai magede tei gailak. 6Keheibe de ada bam lu kemakme de au pe kiak ge nzwa kelien gidi eh kih dila; cikenzwa kiak dung de au hekwa lü mi gage kelien gai dila, cika de cidung de ru dila. 7Nnui ada bam lu cai nah a sam dung nnui lung ga bam lu cai, ciciu cai nnui au nnui suibe keheibe de kie zie, nah nnui cide ngau luzie. 8Nnui tsi buih süt kelu gade a Pei kendu pwalia luzie; nah ainzwa nnui a gu ledeukelume tei luzie. 9Peibe acu keku nzwa I nnui de ku la; a keku ga bam lu. 10Nnui a aja dung mzai la cai, nnui a keku ga bam luzie, I Peibe aja dung mnei lü pe keku ga bam kelu nzwa.

11“A suiyi de peu nnui lung ga bam lu nah nnui suiyi de peu cangsiak lu kerane I aide nnui dage rang gaidi delie. 12#Jhn. 13:34; 15:17; 1 Jn. 3:23; 2Jn. 5.A aja au aide da; hang ge gede hung lu, I nnui de keku siakge eh. 13Mige pe zangme de keku dihtube bam lu kera au penui ziemne pe teilung peu kegai deda. 14Nah I nnui de rang kebeube teila cai nnui au a zangname da. 15I nnui de kilame lie qu si lakta, kedanemene kilame ge au pe mpaube tei kebam de ci lama. Meliene, I nnui de zangname lie qu zieda, kedanemene I a Pei dade siu kelube leune nnui dage rang beudi delu. 16Nnui ne acu kedet luma; mie petsi buih süt lu kera, nah petsi bam tielu kelabe mie buih süt lu kerane I ne nnui de kedet lu nah kelang lu. Nah cine Peibe nnui ma keheibe de a zi gade peda de kie kelabe nnui de peu zie. 17Cine, aide, I nnui de aja kaila: hang ge gede hung lu.

Kideube Nkau kera

18“Kideube nnui de nkau cai, cide acu nkau rai di delie kecu nsung lu. 19Nnui kideube gulie cai, ciciu cai kideube nnui de pe gulie eh ku luzie nage. Dede I kideu aika de nnui de kedet luda, nah nnui au cide gu teila meda; cine kideube nnui de nkau la. 20#Mat. 10:24; Luk. 6:40; Jhn. 13:16.I nnui dage rang kebeu de nsung lulo: ‘Kilabe au pe mpaube swa dihki ma.’ Penui acu sa lie cai, nnui dede sa zie; penui a keledeu mzai lie cai, penui nnui sam de mzai zie. 21Dede penui au nnui dage ma aidung pelane tei gaizie kedanemene nnui au a gu kecune; penui au acu langkegaibe de ci la kemakne. 22I penui da gwang eh penui de rang beu melie cai, penui au kemau gade mau dilak nage; rang beu kedi nzwa eh, penui au penui mau gade kebia kelu gede gada. 23Keheibe de acu nkau kelabe a Pei dede nkau la. 24Penui kak gade migede tei gai kemak I tei gai melie cai penui au kemau gade mau dilak nage; dede penui I tei kegai de ngau da, nah penui acu nah a Pei anai hang na de nkau la. 25#Lei. 35:19; 69:4.Dede aide tei gwang bih zie ciciu eh penui Zai ga raupwa kela de teicang lu kerane: ‘Pekieh gah zing kecu gade penui acu nkau dida.’

26“Kenghabe gwang zie — Peibe dade kegwang Rabe, pa Tinggwang ha kesangbe keulia kelabe. I Peibe dade pecu lang gai beuzie, nah pa a ha rang zie. 27Nah nnui de a ha rang zie, kedanemene nnui raitu gade acu ngngwa kelane.

Currently Selected:

JOHAN 15: ZemeNB

Highlight

Copy