JOHN 9
9
Jisu Ma Achhat Majû Mitdoak Dela Wãtheh Sênsiet
1Jisu dânkhôam poatko, tema achhat majû mitdoak chhat wah dela wãtheh lep khêwah. 2Ate dijûnte hehma tenâng chhîen wah, “Hêthôte, Hẽn pap jũnma te a mitdoak chha ekah a? Ate dede pap jũnko ale ate nyõng awã heh pap jũnko mitdoak chha ekah a?”
3Jisu ma dânthâng wah, “Ate mitdoak pa ate pap jũnma mĩn dangmah ngãle ate nyõng awã heh pap jũnma mĩn dangmah. Ate mitdoak ekah pa tenâng Joban chân ma mo lahma jîenkhê rãng doak ekah. 4Rangwô poatko, nãngma ngã chîenkatte moatlem pa moatmin; rangnyek pa lâhû erah, ere poatko hẽnma mĩn lajîen motû min. 5Ngã a hahtokkhoh ko dângpoat ko, Hahtokkhoh rãngma wẽnphiak.”
6Tema epa ngat diko, Jisu ma hahko thoakkah thoak lahma hahwah ngeknyet wah; ngãle tema ere hahngek pa mihwã mit ko hutkoh wah 7ngãle tenâng ngatwah, “Nang thhen pa Silom bin ko mutphe kã oh.” (Are ngãekah pa “achîen chhôan” ngãma ngãekah.) Ephûmma mihwã pa kã lahma ate thhen pa mutphê kat wah, eko mitma jîenkhẽ lahma ngakwâng wah.
8Ate tok akhũng wah hehma, ngãle khhama ko chutphhek chhah khẽtah mihnyãn hehma ngatwah, “Are mihnyãn pa tong lahma chitha phhekchhah tah pa ladangnẽ?”
9Khãka ma, “Danga” ngatwah, ngãle khãka ma, “Ate dangmah; rohkomĩn ate rãngrãng jô” ngãma ngatwah.
Ephûmma mihwã pumma ate dedema hôngngat wah, “Ngã ere mihnyãn pa dangang”
10Thinma chhîen wah, “Nangma athâng heh chenroh dang lohma jîenkhẽ eko a?”
11Tema dânthâng wah, “Mihnyãn wãtheh ate mîn pa Jisu, tema hahngek ngeknyet lahma ngãmit ko hutkoh ehang, ngãle tema nang thhen pa Silom bin ko mutphe kã oh ngãma chîen wah. Ephûmma ngã kã lakma mutphê kat wah, ngãle ngãma mutphê rienrien ko jîenkhẽ ekãng.”
12“Ate chenko a?” ngãma thinma thôngphâ wah.
“Ngãma jetmek,” ngãma dânthâng wah.
Pharisee Hehma Khoanchhet Mêsiet Jũnma Lêmte
13Ediko mitdoak dangtah mihwã pa thinma Pharisee heh tânâng siet hokwah. 14Jisu ma hahngek ngeknyet lahma ate mitdoak sensiettah jâ pa Joban pîentông jâ dâng wah. 15Ediko Pharisee hehma mihwã ko atemit pa chenroh jîen hõngsen tah a epa ngak thôngphâ wah. Tema thin nâng thôkoh wah, “Tema ngãmit ko hahngek hutkoh wah; ediko ngãma thhen mutphe lakma jîenkhê wah.”
16Pharisee khũtheh ma ngatwah, “Are moatte mihnyãn pa Joban tâwah ladang min, chenrãngma ngãko tema Pîentông nîem pa kepmah.”
Ahân hehma aroh ngatwah, “Are rãngrãng patritli moatlem heh papi mihnyãn ma chenroh ejîenmo a?” Ngãle thin tung komĩn mâmâ khũkhũ dangjâ wah.
17Ephûmma Pharisee hehma ere mihwã ko wîen ngak chhîen wah, “Nangma nang mit pa tema sensiet ehang ngãeko —sen a, eroh madang ako nangma te a hẽn ngãma ngãeko a?”
“Te a mõng,” ngãma mihwã pumma dânthâng wah.
18Rohkomĩn Jews heh thôte jabte hehma ate nyõng awã heh roo mako te a mitdoak dâng wah jîenkhẽ ekah ngãma lapũtẽ dâng wah 19ngãle thinma ate nyõng awã hehnâng chhîen wah, “Apa nê chha nẽ? ngãle nêma te a mitdoak chhat wah nẽ; eroh madang ako, tema athâng heh chenroh jîenkhẽ ekah a?”
20Ate nyõng awã hehma dânthâng wah, “Nima jet te a nichha, ngãle nima jet te a mitdoak chhat wah. 21Rohkomĩn athâng heh tema chenroh jîenkhẽ ekah a epa nima mĩn jetmih, ngãle ate mitdoak pa hẽnma sensiet tah a epamĩn nima jetmih. Tenâng chhîen en; te a phânnang lâdang tah, ate rãngma ate dede majô ejîen dânthâng hen” 22Ate nyõng awã hehma epa Jews heh thôte jabte heh ranchê ma ngatwah, chenrãngma ngãko Jews heh thôte jabte hehma hẽnhẽn ma Jisu nâng te a Messiah ngãma pũtẽ dâlem ekah a ereheh synagogue wah jûnloat min ngãma ngĩnpat wah. 23Eroh wah ate nyõng awã hehma, “Te a phânnang lâdang tah; tenâng thôngphâ en!” ngãma ngatwah.
24Ediko mĩn mitdoak dâng wah sentah pa rektheh ngakroo lahma tenâng ngatwah, “Joban mathah ko toangtang thô ang ngãma tôamsem oh! Nima jet are nang sênsiette mihnyãn pa papi mihnyãn.”
25Mihwã pumma dânthâng wah, “Ngãma te a papi dang ale dangmah a epa jetmek” “Ngãma wantheh lôlôbã jet ang: Ngã mitdoak dâng wah, ade phûmma ngãma lâjîen khẽ tek.”
26Thinma thôngphâ wah, “Tema nangnâng chenni rẽ thoh a? nang mitdoak pa chenroh sensiet thoh a?”
27Tema dânthâng wah, “Ngãma thôko tah, rohkomĩn nêma pũtẽ met. Chenrãngma ngaktat hûn ekẽn a? Nêmĩn ate dijûnte dânghûn ekẽn ã?”
28Thinma tenâng dûmmek lahma ngatwah, “Nanga ere mihnyãn dijûnte; rohkomĩn ni a Moses dijûnte. 29Nima jet Moses demnâng Joban jabmîn rêwah; phûmma are mihnyãn pa chenwah hûerah a epa nima ajetjô lẽmjet mih!”
30Mihwa pumma dânthâng wah, “Apa chentô patritli ngĩn a! Nêma ate chenwah hûerah a epa jetmet, rohkomĩn tema ngã mitdoak pa sensiet ehang! 31Nãngma jet Joban ma papi mihnyãn hehnâng jetat mah; Ate ran chête le tema hûn ekah moatlem moatte mihnyãn hehnâng bã tema jetat ekah. 32Rangbêng hahbêng thû wah achhat ma mitdoak chhatte nâng hẽnma mĩn mit sensiet lahma mãthat chohtat ekĩ. 33Eroh wah are mihnyãn pamĩn Joban tâwah kat ladang nâng, tema are rãngrãng pa lata momin”
34Thinma dânthâng wah, “Nanga achhat majû papi chha ehoh —phûmma nangma ninâng hêthô hûn ehĩ ã?” Ephûmma thinma te a synagogue wah jûnloat wah.
Ju Nâng Mitdoak
35Ere ngĩn pa Jisu ma chohtat diko, tema mihwã pa chohmîn lahma tenâng chhîen wah, “Nangma Mihnyãn Chha nâng pũtẽ dâlem ekole?”
36Mihwã pumma dânthâng wah, “Hêthôte, Te a hẽn a epa ngãnâng thôkoh hang, ephûmma ngãma tenâng epũtẽ dâlem ang!”
37Jisu ma tenâng ngatwah, “Nangma ate lâkhẽ toh, ngãle epa athâng heh nang demnâng jabmîn ehoh pa.”
38Mihwã pumma ngatwah, “Teso!, ngãma pũtẽ dâlem ekãng,” eroh ngã lahma Jisu mathah ko khupjup wah.
39Jisu ma ngatwah, “Ngã are hahtokkhoh ko achhih asen rên rãng kãerâng, eroh wah mitdoak hehma ejîenkhẽ a, ngãle hẽnhẽn ma jîenkhẽ ekah a ereheh mitdoak rãng edanga.”
40Ate demwah Pharisee khũtheh dangtah hehma epa tat lahma tenâng ngatwah, “Nangma ninâng mĩn mitdoak ngãehĩ ã?”
41Jisu ma dânthâng wah, “Nê a mitdoak dâng nôma ko nê nâng pap ahõ dângmin wah; rohkomĩn nêma ni a mitdoak dangmih ngãma ngatdĩ, nê nâng pap tong ehen.”
Currently Selected:
JOHN 9: Nokte
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
