JOHN 8
8
Dihiak nyũ Dela Demnâng Kaam Chhih moatte Chohloat
1Ediko angã ngã hum nâng chhôan wah, rohkomĩn Jisu Olive hahhô nâng wângwah. 2Edijâ rangkhah rangkho ma Jisu Rangsôamhum nâng ngakkat wah. Phûmma mihnyãn heh phangtang ate tûmlit ko khhôantông wah ngãle temĩn tong lahma thin nâng hêthô wah. 3Nîem hêthôte ngãle Pharisee hehma dihiak nyũ dela demnâng kaam chhih moatte lõhû lahma, thin phangtang mathah ko chepthuk wah. 4Thinma Jisu nâng ngatwah, “Hêthôte, are dihiak nyũ pa dela demnâng kaam chhih mo lahma chohlõ ekĩ. 5Nãng Nîem jũnko are rãngrãng dihiak nyũ pa lõngma ritpetmin ngãma Moses ma chîen wah. Phûmma nangma chenroh ngãeko a?” 6Thinma apa Jisu bukrîî thuk lahma tenâng athẽ jîenloat rãng ngatwah. Rohkomĩn Jisu ma kunkã lahma ate deksu ma hahko raang lahma dâng wah. 7Mihnyãn heh ere theko chep lahma tenâng ngĩn thôngphâ poatko, tema tõanchep lahma thin nâng ngatwah, “Nê wah hẽnma pap mãthat mote a epumma tenâng bângpet en.” 8Ediko mĩn tema ngak kunkã lahma ate deksu ma hahko raang lahma tôngwah. 9[Chenthû mihnyãn hehma are ngĩn pa tat phûmma phânnang thhôan pumma thun lahma wãtheh wãtheh ma phangtang thhôanchhôan wah. Ere theko Jisu lôlô dihiak nyũ demko lekchep lahma phêthîen wah. 10Jisu ma tõanchep lahma dihiak nyũ ko ngatwah, “Mihnyãn heh chenko dang ekah a? nangnâng achhih ngatrãng wãtheh mĩn ahõtû nẽ?”
11Dihiak nyũ pumma, “Hêthôte, hẽnjô ahõtû,” ngãma dânthâng wah.
Phûmma Jisu ma ngatwah, “Sen a, eroh madang ako, ngãma mĩn nangnâng achhih ngãmih. Chhõan oh, rohkomĩn pap kaam nek ngakmo tû.”]#8.11 ajahthêm nyapraang nâng ngãle ama nâng raang wah hehma apa raang mah (8.1-11); ahân hehma apa Jn 21.24 diko raang ekah; ngãle ahân hehma apa Luk 21.38 diko raang ekah; ahân wãtheh pumma Jn 7.326 diko raang ekah.
Jisu Hahtokkhoh Rãngma Wẽnphiak
12Jisu ma Pharisee hehnâng wîen ngat wah. “Ngã a hahtokkhoh rãngma wẽnphiak,” “Hẽnhẽn ngã diko jûnkhhoam ehanga erehehma rôandông wẽnphiak pa echoh a ngãle thin chenthû mĩn rangnyek nâng lakhoam min.”
13Pharisee ma tenâng ngatwah, “Nangma nang dede rângthôrit hûn eko; eroh wah nangma chenni thôekoh a ereheh sekhõtã.”
14Jisu ma dânthâng wah, “Eroh dangmah, phûmma ngã dedejô marâng thôrîî ang komĩn, ngãma chenni thôekãnga ereheh tongtang, chenrãngma ngãko, ngã chenwah hû erânga ngãle ngã chenko chhôan min a ereheh ngãma jet. Phûmma nêma ngã chennâng wah hû erânga bã chennâng chhõan ekãnga epa jetmah hah. 15Nêma mihnyãn nyũchha hûng arĩn jũnko rẽn ekẽn; phûmma Ngãma hẽn nâng mĩn rẽnmek. 16Rohkomĩn Ngãma marẽn angko, ngãma toangtang ko erẽn ang, chenrãngma ngãko epa ngã lôlôma rên dangmek; Ngã chîenkatte ngãwã mĩn ngã demko tonghang. 17Nãng Nîem nâng aroh raang lahma tonga, chenthû hâkhi wãnîî mahõng tah ko, thinma chenni thô ekah a epa toangtang. 18Ngãma ngã dede rângthô rîî ekãng, ngãle ngã chîenkatte ngãwã mamĩn ngã jôbã rângthô ehang.”
19Phûmma thinma, “Nang Wã pa chenko a?” ngãma thôngphâ wah.
Jisu ma dânthâng wah, “Nêma ngã jetmah hah, ngãle ngãwã mĩn jetmet,” “Nêma ngãjet ngãko, ngãwã mĩn chenjet tet.”
20Jisu ma are chentô pa Rangsôamhum wah ngũn pêra thîen ekah theko thin nâng hêthô nungma ngatwah. Rohkomĩn hẽnma mĩn ate lõ khhek hõ, chenrãngma ngãko ate sanpoat pa mãhû dâng wah.
Ngã Chenkoh Dang Ekãnga Eko Ne Tachhõanmet
21Ediko mĩn Jisu ma thin nâng ngatwah, “Ngã chhôan erẽ ang; phûmma nêma ngã elẽmsû hah, rohkomĩn nê a nê pap jũnko erîî en. Ngã chennâng dang ekãnga ere theko nê tachhõan met.”
22Ephûmma Jews heh thôte jabte hehma ngatwah, “Ate chenko dang ekah a ere theko nãng lata chhõan min ngãma ngãekah. Apa ate dede ritphê rit rãng ngãekah”
23Jisu ma dânthâng wah, “Nê a rangkhhen kowah are hahtokkhoh thiak, rohkomĩn ngã a rangkho wah kãerâng. Nê a are hahtokkhoh kowah, rohkomĩn ngã a are hahtokkhoh wah dangmek. 24Eroh wah ngãma nê a nê pap demko erîî en ngãma thôkoh ekah. Ngãle ‘NGÃ, HẼN NGÃ A’ ngãma ngãrîî ekah ko lapũtẽ dâlem kẽn ko nê pap khhen kojô erîî en.”
25Thinma tenâng, “Nanga hẽn a?” ngãma chhîen wah.
Jisu ma dânthâng wah, “Ngãma khhabâng ma chenni thôko tah a.#8.25 Ngãma khhabâng ma chenni thôko tah a; bã Ngãma nê nâng chenrãngma rânjab min a? 26Ngãma nê nâng ajahthêm thôkoh thĩn tonga, ngãle ajahthêm achhih ngat thĩn mĩn tonga. Ngã chîenkatte pa toangtang, ngãle ngãma ate wah chenni chohtat ekãnga epa hahtokkhoh ko thôkoh ekãng.”
27Jisu ma thin nâng Joban Wã jũnma thôkoh ekah epa thinma jetmah. 28Ephûmma tema thin nâng ngatwah, “Chenthû nêma Mihnyãn Chha pa machõangpe tet ko ‘NGÃ, HẼN NGÃ A’ ngãma ngatritte pa ejet en; ediko ngã hûngsi ma chenni mĩn momek ngãma ejet en, rohkomĩn Wã ma chenni jabrãng thôkoh ehanga epa jôbã jab ekãng. 29Ngãle ngã chîenkatte pa ngã demko tonga; tema ngã lôlô thînphe mah hang, chenrãngma ngãko ngãma rôantang ma tema chenni hûn ekah a epa lôlô moekãng.”
30Jisu ma are jab ekah pa chohtatte heh ajahthêm ma tenâng pûtê dâlêm wah.
Toangtang Pumma Elaangphe Hen
31Ephûmma tenâng pûtê dâlêmte hehnâng Jisu ma ngatwah, “Ngãma hethô ekah pa nêma makep enko, nê a lĩnlin ngã dijûnte; 32Nêma toangtang pa ejet en, ngãle toangtang pumma nê elaangphe hen.”
33Thinma ngatwah, “Ni a Abraham chhũ achha” “ngãle ni a hẽnhũ hẽnhaa mĩn mãthat dang ekĩ. ‘Nê elaangphe hen’ ngãma nangma chenni ngatthiak jab eko a?”
34Jisu ma thin nâng ngatwah, “Ngãma nê nâng toangtang thôkoh ekah: Hẽnhẽn ma pap moekah a ereheh pap haa. 35Haa heh hẽn hum nâng mĩn rôantang rôanjêng rãng dangmah, rohkomĩn humkâ kowah dela chha pa bã rôantang rôanjêng rãng tôngte. 36Chha pumma nê malaangphe hen ko bã, nê a lĩnlin rãng laangphe ehen. 37Ngãma jet nê a Abraham chhũ achha. Rohkomĩn nêma ngã ritphê rãng hûn ehah, chenrãngma ngãko ngãma hethô ekah pa nêma kep hûnmet. 38Ngã Wã ma chenni khêsok thanga epa ngãma thôekãng, rohkomĩn nêma nêwã ma chenni thôkoh thhen a epa moeken.”
39Thinma tenâng dânthâng wah, “Niwã pa Abraham.”
Jisu ma dânthâng wah, “Nê a lĩnlinjô Abraham chhũ achha dâng nôma ko, nêma mĩn#8.39 Nê a lĩnlinjô nêma moatmin wah; wanwantheh ma raang ekah Nê a moatmin wah. tema motah rãngrãng chenmo tet. 40Ngãma Joban wah chohtat tek toangtang ngĩn pa nê nâng thôkoh ekah, rohkomĩn nêma ngã ritphê rãng hûn ehah. Phûmma Abraham ma are rãngrãng mohõ! 41Nêwã hehma chenni motah a epa nêma mĩn moekẽn.”
Thinma ngatwah, “Niwã wãtheh lôlôbã tonga, epa Joban, ngãle ni a ate chha lĩnlin.”
42Jisu ma thin nâng ngatwah, “Joban pa lĩnlin nêwã dâng nôma ko, nêma ngãnâng ahûn rêmin wah, chenrãngma ngãko ngã Joban tâwah kãerâng, ngãle athâng heh ako tongang. Ngã a ngã dede chânko kat dangmah râng, tema chîenkat lahma bã kãerâng. 43Ngãma jab ekãng pa nêma chenrãngma lajet rẽkẽn a? Apa nêma ngã ngĩn pa la nyoak tat jũnko dang ekah. 44Nê a nêwã joak chha, ngãle nêwã ma chenni hûn ekah a ere jũnko kep ekẽn. Rangbêng hahbâng thû ma ate a mih ritphête, ngãle te a toangtang lemkhô ko chenthû mĩn mãthat khoam ekah, chenrãngma ngãko tenâng toangtang ahõ. Tema mõthô thô ekah pa, mõthô thôtejat dâng phûmma thô ekah, chenrãngma ngãko te a mõthô ngãle mõthô khôanglep heh wã. 45Rohkomĩn ngãma toangtang thôkoh ekah, eroh wah nêma ngãnâng pũtẽ dâlem mahhah. 46Nê wah hẽnma ngãma pap mo lakma thatkhẽ thah ã? Ngãma toangtang mathô angko, nêma ngãnâng chenrãngma lapũtẽ dang ehah a? 47Hẽnhẽn Joban tâwah kãerah a erehehma Joban ngĩn pa ejetat a. Rohkomĩn nê a Joban tâwah dangmet, eroh wah nêma Joban ngĩn ko lajetat dang ekẽn.”
Jisu Ngãle Abraham
48Thinma Jisu nâng ngatwah, “Nanga Samaritan jat ngãle nangnâng juchhih lup ehoh. Nima epa punngã ekĩle?”
49Jisu ma dânthâng wah, “Ngãnâng juchhih lupmah hang, Ngãma ngãwã sôangraang ekãng, rohkomĩn nêma ngã sôangraang mahhah. 50Ngãma ngã dede mîndông pa hûnmek. Rohkomĩn ngãmîn dôngthuk hûnte wãtheh tonga, ngãle tema ngã rãngma ejab a. 51Ngãma nê nâng toangtang thôkoh ekah: Hẽnhẽn ma ngã ngĩn kep ekah a ereheh chenthû mĩn larîî min.”
52Thinma Jisu nâng ngatwah, “Athâng heh nima lĩnlin lâjettih nangnâng juchhih lâlup thoh! Abraham mĩn rîîtah, ngãle mõng hehmĩn rîîtah, rohkomĩn athâng heh nangma ngãnâng hẽnhẽn ma pũtẽ dâlem ehanga ereheh larîî min ngãeko. 53Niwã Abraham rîîtah; Nanga Abraham, nôma mĩn adong thonghûn rîî eko ã? Ngãle mõng hehmĩn erohjô rîîtah. Nanga hẽn ngãma thonghûn rîî eko a?”
54Jisu ma dânthâng wah, “Ngãma ngã dede marâng thôrîî angko, epa sekhõtã dângmin. Ngã rângthôte pa ngãwã —eko jôbã nêma mĩn ni Joban ngãma ngãekẽn. 55Nêma ate mãthatjet ekẽn, rohkomĩn ngãma ate jet ang. Ngãma ate jetmek ma ngã angko, ngãmĩn nê rãngrãng mõthô jôbã. Rohkomĩn Ngãma ate jet ang, ngãle ngãma ate ngĩn kep ekãng. 56Nêwã Abraham ma ngãkat sanpoat pa khẽlak malê ngãma thonghûn lahma khũhah nâhah dâng wah; Epa tema khẽ lahma khũhah wah.”
57Thinma tenâng ngatwah, “Nanga rangpâ roak bengâ mĩn mãdang eko —phûmma nangma Abraham khẽtoh õ?”#8.57 nangma Abraham khẽtoh õ? wanwantheh ma Abraham ma nang khẽthoh ã ngãma raang ekah?
58Jisu ma dânthâng wah, “Ngãma toangtang thôkoh ekah, Abraham mako ‘NGÃ’ dâng wah.”
59Ephûmma thinma tenâng lõngma petrãng lõng tôanwah, rohkomĩn Jisu huhtong lahma Rangsôamhum wah loatchhôan wah.
Currently Selected:
JOHN 8: Nokte
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
