JOHN 10
10
Saaksokte Thakthô
1Jisu ma ngatwah, “Ngãma toangtang thôkoh ekah: Hẽn komĩn Saak heh tânâng kâsek pumma ladang lemhân ma makõ hû ako, epa ahuhte. 2Hẽnhẽn kâsek pumma luphû ekah a epa bã Saak sokte. 3Kâsek bêmte pumma terãng kâsek pa elaang koh a; ngãle tema saak hehnâng mînma rooko saak hehma ate kahrã pa etat a, ngãle tema esen chhõan a. 4Chenthû tema masen chhõan ako, saak heh mamako ate ekhoam a, ngãle saak hehmĩn ate diko ejûn khhoam a, chenrãngma ngãko thinma ate kahrã pa jîn ekah. 5Thinma mihhân di lajûn min; enôma, ere rãngrãng mihnyãn heh tâwah huhchhôan erẽ a, chenrãngma ngãko, thinma ate kahrã jînmah.”
6Jisu ma thin nâng are ngĩnthakthô pa thôkoh wah, rohkomĩn tema chenni nâng ngãekah a epa thinma jetmah.
Jisu Pa Saaksokte Sen
7Ephûmma Jisu ma wîen ngatwah, “Ngãma toangtang thôkoh ekah: Ngã a saak heh rãngma kâsek. 8Ngã mawah katte heh phangtang ahuh, ngãle mihwah nyîenkepte rohkomĩn saak hehma thin ngĩn tatmah. 9Ngã a kâsek. Hẽnhẽn ngã kâsekkaam pumma humkhhen nâng lupwãng ekah a ereheh khopê chohmin; thin a humkhhen nâng wãng lahma mĩn ngak loat chhõan lahma thinma phem echoh phhek a. 10Ahuhte heh ahuh rãng, ngãle ritphê rãng, ediko chhihsiet rãng lôlô ehûrah. Ngã a nêma rôandông chenmâm choh en ngãma hûerâng —chenni nângmĩn la thõam rôandông chenmâm choh en ngãma hûerâng.
11“Ngã a saaksokte sen, ngãle saak heh rãngma arit mĩn tarîî ang. 12Saaksokte ngãle saak tângte ladang thãkoh lahma thîen ekah mihnyãn pumma chenthû soan makhẽ ako tema saak heh phethîen lahma huhchhôan erẽ a; ephûmma soan hehma saak heh kek lahma ephan chhõan thuk a. 13Thã koh lahma thîen ekah mihnyãn pa huhchhôan erẽ a, chenrãngma ngãko te a thã nângbã moekah, tema saak heh rãngma patrîî mah. 14-15Ngã a saaksokte sen. Ewã ma ngã jet ehang rãngrãng, ngãma mĩn Ewã jet ekãng, ere rãngrãng jô ngãma ngã saak heh jet ang, ngãle ngã saak heh mamĩn ngã jet hang. Ngãmĩn ngã saak heh rãngma ritmĩn tarîî ang. 16Are saak chhãngko ladangte ngã saak ahân nângmĩn tonga. Ngãma erehehmĩn metkep siet hokmin; thinma mĩn ngã kahrã tat lahma#10.16 thinmĩn ehûrah; wanwantheh nang eko ehûrah ngãma raang ekah. saaksokte wantheh khhen nâng khũtheh dângtû min.
17“Wãma ngãnâng hûn ehang, chenrãngma ngãko ngãma ngã rôandông pa koh ekãng. Ngãma ade dittheh ngakchoh rãng ngã rôandông pa koh ekãng. 18Hẽnma mĩn ngã rôandông pa ngã ngewah ta nyên mah hang. Ngãma ngã dede hûngsi ma koh ekãng. Ngãma akoh mĩn takoh ang, ngãle ngakkep mĩn tarẽ ang. Ngãwã ma ngãnâng aroh moatrãng chîen ehang.”
19Ediko mĩn are jabkhab jũnko thin tung nâng mâmâ khũkhũ dângjâ wah. 20Mẽlâng mihnyãn hehma tenâng ngatwah, “juchhih lup ekah! Ngãle apâ rẽ ekah! ate ngĩn chenrãngma kep ekẽn a?”
21Rohkomĩn khãka hehma ngatwah, “Juchhih lupte mihnyãn ma are rãngrãng jîenjab mah! Juchhih ma mihnyãn mitdoak pa chenroh jîen sensiet koh a?”
Jisu Nâng Thãjô
22Apa rangpaa nâng dâng wah, ngãle Jerusalem wah Rangsôamhum wâng nîem hôan lõkuh dâng wah. 23Rangsôamhum wah Solomon Kânthong ngãma ngãekah theko Jisu phõang khoam lahma dâng wah, 24Mihnyãn heh ate tûmlit ko khhôanhû lahma tenâng chhîen wah, “Nangma ni chentô lek tûngmaang thuk min a? Ninâng laangthô koh ehĩ: Nanga Messiah dangoh le?”
25Jisu ma dânthâng wah, “Ngãma nê nâng râthô kotah, rohkomĩn nêma ngãnâng pũtẽ dâlem mahhah. Ngãma Ewã ma chîen ehang moatlem moekãng pumma ngã rãngma jab ekah; 26rohkomĩn nêma pũtẽ dâlem met, chenrãngma ngãko nê a ngã saak dangmet. 27Ngã saak hehma ngã kahrã pa tat ekah; Ngãma mĩn thin jet ang, ngãle thinma ngã dijûn ehang. 28Ngãma thin nâng rôantang rôanjêng rôandông koh ekãng, ngãle thin chenthû mĩn larîî min. Hẽnma mĩn thin a ngãdek wah lata nyênchhõan min. 29Ngãwã ma ngãnâng chenni koh ehanga epa#10.29 Ngãwã ma ngãnâng chenni koh ehanga epa adong thhôan; wanwantheh ma Thin ngãnâng kohte Ngãwã pa, adong thhôan ngãma raang ekah. chenni nôma mĩn adong thhôan, ngãle hẽnma mĩn Wã dekwah lata nyênchhõan min. 30Ewã chhenîî a wantheh.”
31Ediko mihnyãn hehma tenâng petrãng lõng tôanwah. 32Jisu ma thin nâng ngatwah, “Wãma ngãnâng mothuk thang moatlem sen ajahthêm nê mathah ko mokotah; erehehwah chenrẽ moatlem sen moatthã nêma ngã ritpet hûn ehah a?”
33Thinma dânthâng wah, “Nima nangnâng moatlem sen moatthã ritpet hûn dangmih, nangma Joban thãsê jabkhab jabthã bã ritpet rãng ngãekĩ! Nanga mihnyãn dang lohma, nang dede Joban dângrit hûn eko!”
34Jisu ma dânthâng wah, “Nê Nîem nâng, Joban ma tenâng ‘Nanga Joban’ ngãma raang lahma tonga. 35Nãngma jet Joban nyapraang ma chenni ngãekah a epa rôantang rôanjêng rãng toangtang; ngãle Joban ma ate ngĩn thôkotah mihnyãn hehnâng joban ngãma ngãekah. 36Ngã dang ekãng, Wãma rẽn lahma hahtokkhoh ko chîenkat ehang. Phûmma ngãma ngã a Joban Chha ngat rãngma nêma ngãnâng chenroh Joban thãsẽ eko ngãma jîen ngã ehah a? 37Ewã ma mothuk ehang moatlem pa ngãma lamo madang angko ngãnâng nek pũtẽ dâlem hah. 38Rohkomĩn ngãma erehehjô mamo ang komĩn nêma ngãnâng pũtẽ dâlem mahhah, ngã nângjô lapũtẽ dâlem ehah komĩn, ngãma moekãng moatlem hehnâng pũtẽ dâlem latma ko, nêma Ewã pa ngã demnâng ngãle ngã a Ewã demnâng ngãma chenjet tet.”
39Ediko mĩn rektheh thinma Jisu loatrãng hûnwah, rohkomĩn thin dek wah Jisu pêchhôan wah.
40Ediko Jisu Jordanjo rãnka wah John ma baptijem koh ekah theko ngakwâng wah, ngãle ate ere theko tôngwah. 41Ere theko ate tânâng ajahthêm mihnyãn hokwah. Thinma ngatwah, “John ma chenni patritli moatlem jô momah, rohkomĩn tema are mihnyãn jũnma chenni ngãtah a ereheh phangtang toangtang.” 42Ngãle ajahthêm mihnyãn hehma tenâng pûtê dâlêm wah.
Currently Selected:
JOHN 10: Nokte
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
