JOHN 7
7
Jisu Ngãle Ate Naa Heh
1Ediko Jisu Galilee jaa nâng phôangkhôam wah; tema Judea ngenâng wâng pa lahûn dâng wah, chenrãngma ngãko Jews heh thôte jabte hehma ate ritphê rãng hûn wah. 2Tembuhum hôan lahma wângchhah lõkuh sanpoat pa thâng lahma dâng wah, 3Ephûmma Jisu naa hehma tenâng ngatwah, “Nanga are the kowah Judea nâng wãngoh, eroh kobã nangma chenni mo eko a ereheh nang dijûnte hehma ekhẽ a. 4Chentô ma chenjet hang ngãma ma thonghûn oko mihnyãn hehma thinma chenni moekah a ereheh huhriem mah. Nangma are chentô mo eko hehmĩn rangkhhen phangtang ma chenjet hoh!” 5(Ate naa heh mamĩn tenâng pũtẽ dâlem hõ.)
6Jisu ma thin nâng ngatwah, “Ngãma moatrãng sanpoat mãthang ekah. Rohkomĩn nê rãngma chenni sanpoat nângmĩn tamo en. 7Hahtokkhoh mihnyãn ma nê nâng jîen chhih choh mahhen, rohkomĩn ngãnâng chhihchoh ehang, chenrãngma ngãko ngãma thin moatlem pa achhih ngãekãng. 8Nê a lõkuh thĩn nâng wãngen. Ngã a are lõkuh ko#7.8 Ngã a are lõkuh ko; wanwantheh ma Ngã awâng mãthâng ekãng ngãma raang ekah. wãngmah râng, chenrãngma ngãko ngã rãngma sanpoat pa mãthâng ekah.” 9Tema aroh ngã lahma Galilee nâng jektông wah.
Jisu Tembuhum Wângchhah Lõkuh Thĩnnâng
10Ate naa heh lõkuh thĩn nâng wâng diko Jisu mĩn jûnwâng wah; rohkomĩn te a sansan ma laloat khoam ma, ahuhchha ma hokwah. 11Jews heh thôte jabte hehma lõkuh thĩn nâng ate lêmsok wah. Thinma, “Ate chenko a?” ngãma chhîen wah.
12Mihnyãn heh chhãngko ate jũnma nyahrãng phôanghuh jabmîn wah. Khãka hehma, “Te a mihnyãn sen” ngatwah, rohkomĩn khãka hehma, “Dangmah, Te a abaa apha” ngatwah. 13Rohkomĩn ate jũnma hẽnmajô laanglaang chĩnthô hõ, chenrãngma ngãko thin a Jews heh thôte jabte heh ranchê wah.
14Lõkuh khãka râchoan ko Jisu ma Rangsôamhum nâng wãng lahma hêthô wah. 15Jews heh thôte jabte heh nyahrãng patrîî lahma ngatwah, “Are mihnyãn pumma nyapweh nyapraang mĩn ahõ ma atô chenroh jîenjet ekah a?”
16Jisu ma dânthâng wah, “Ngãma chenni hethô ekãnga epa ngã dede wah hethô dangmek, epa ngã chîenkatte Joban ngewah hethô ekãng. 17Hẽnhẽn ma Joban ma chenni hûn ekah a epa moat hûn ekah a erehehma, ngãma Joban jũnko hethô ekãng ale ngã dede chânma jab ekãnga epa ejet a. 18Hẽnhẽn ma thin dede chân ko jab ekah a epumma ate dede mîndông pa ehûn a. Rohkomĩn hẽnma ate chîenkatte mîn dôngrãng hûn ekah a epa toangtang, ngãle tenâng chenni athẽjô ahõ. 19Moses ma nê nâng Nîem pa kohthhen, rohkomĩn epa hẽnma mĩn kepmet. Nêma ngã chenrãngma ritphê hûn ehah a?”
20Mihnyãn hehma dânthâng wah, “Nangnâng juchhih tonghoh epumma nang ritphê hûn ehoh?”
21Jisu ma dânthâng wah, “Ngãma patritli moatlem wantheh moat ko, nê phangtang patrit rẽkẽn. 22Moses ma nê nâng dela chha heh khoankhhên nîem hôanrãng chîen wah (Epa Moses ma ladang nête nêwã hehma hôngmoat wah), ngãle eroh wah nêma dela chha heh Pîentông jâko khhoan khhên nîem hôan ekẽn. 23Dela chha pa nêma Joban Pîentông jâko khhoan khhên nîem hôan latma nêma Moses Nîem pa lachhihsiet madang enko, Ngãma khoanchhette mihnyãn pa Pîentông jâko senthêmthêm mêsiet rãngma ngã demnâng chenrãngma rĩnkhah ehah a? 24Khoankhoh nâng sû latma achhih asen ngãma rên pa jek rẽ en, toangtang ma rẽn en.”
Ate A Messiah Nẽ?
25Jerusalem wah mihnyãn khũtheh ma ngatwah, “Jews heh thôte jabte hehma ritphê rãng lẽm ekah mihnyãn pa apa ladang nẽ? 26Sûtan! tema nok atang heh chhãngko thôkoh ekah, rohkomĩn thinma ate lêlatnâng chenjô jabmah! Thin mamĩn te a lĩnlinjô Messiah ngãma jetthêm ekah? 27Rohkomĩn chenthû Messiah pa makã thah ko, hẽnma mĩn ate chenwah hûerah a epa lajetmin. Phûmma ate chenwah hûerah a epa nãng chentô ma jet e.”
28Jisu ma Rangsôamhum nâng hêthô poatko, tema chân mõang rakjab wah, “Nêma ngã lĩnlinjô jet hah, ngãle ngã chenwah hû erânga epa jet hah? Ngã a ngã dede chânko hok dangmah râng. Rohkomĩn, ngã chîenkatte pa toangtang. Phûmma epa nêma jetmet, 29Ngãle ngãma ate jet ang, chenrãngma ngãko ngã ate tâwah kãerâng ngãle tema chîenkat ehang.”
30Ephûmma thinma ate loat hûnwah, rohkomĩn hẽnma mĩn tenâng dek chĩnjâhõ, chenrãngma ngãko ate sanpoat pa mãhû dâng wah. 31Rohkomĩn mihnyãn heh chhãngwah mẽlâng ma tenâng pũtẽ dâlem lahma ngatwah, “Chenthû Messiah makã thah ko, are mihnyãn pumma moekah nôma mĩn ajahthêm patritli heh emo a?”
Jisu Loatkhhek Rãng Sîpâhi Chîenkat
32Mihnyãn hehma Jisu jũnma huh thô mîn pa Pharisee hehma laptat wah, ephûmma thin ngãle sôam aroakte hehma Jisu loatkhhek rãng sîpâhi heh chîenkat wah. 33Jisu ma ngatwah, “Ngã nê demnâng poattheh rãngbã etongang, ngãle ediko ngã chîenkatte tânâng ewãng ang. 34Nêma ngã elẽmsû hah, rohkomĩn nêma lachohkhẽ min, chenrãngma ngãko ngã chenrẽ theko chhõan ekãnga ere theko nêkhũ lata wãngmin.”
35Jews heh thôte jabte heh thin dede tungko jabmîn wah, “Nãngma lachohlẽm thĩn nâng ate chenko chhôanrãng ngãekah a? Nãng lẽmrũ Greek heh sõng ekah hah nâng kã lahma Greek hehnâng hêthô kat rãng la ngã ekah ã? 36Tema ngãekah, nãngma ate elẽmsû e, rohkomĩn nãngma ate lachohkhẽ min, ngãle ate chenko chhõan ekah a ere theko nãng lata wãngmin. Tema chenni jũnko jab ekah a?”
Rôandông Kohthĩn Jokhô
37Lõkuh râjâ rangwô ngãle erejâ pa nyahrãng alẽm thhôan rangwô ko Jisu tõanchep lahma chân mõang rakjab wah, “Hẽnhẽn jolânrîî ekẽn a ereheh ngã tânâng hûrên, ngãle 38Hẽnhẽn ma ngãnâng pũtẽ dâlem ehanga erehehma jok en. Joban nyapraang ma ngãekah rãngrãng, ‘Ate phoangwah rôandông kohthĩn jokhô ehõng jenkã rah.’”#7.38 Jisu jabkhab vars 37-38 pa litraang min: “Hẽnhẽn jokhemlân rîî ekẽn a ereheh ngã tânâng hû latma jok hûrên. 38: Joban nyapraang ma ngãekah rãngrãng, ‘Ngãnâng hẽnhẽn ma pũtẽ dâlem ehanga ereheh sek khhen wah rôandông kohthĩn jokhô ehõng jẽn kã rah.’” 39Apa Jisu ma Ju jũnko jabwah, hẽnhẽn ma tenâng pũtẽ dâlem ekah a erehehma ere Ju pa chohmin. Ere sanpoat ko Ju pa mãkoh dâng wah, chenrãngma ngãko, Jisu Joban chân kep lahma ritwah mã ngak hin dâng wah.
Mihnyãn Heh Phôangphânjâ
40Mihnyãn heh chhãng wah khãka ma are jabkhab pa laptat lahma ngatwah, “Are mihnyãn pa lĩnlinjô mõng!”#7.40 mõng: 1.21 ko tasû e.
41Khãka hehma, “Te a Messiah!” ngatwah
Rohkomĩn khãka hehma, “Messiah pa Galilee wah lahû min! ngatwah, 42Joban nyapraang ma ngãekah, Messiah pa David Lowang chhũ achha wah dângmin ngãle te a David sõngtah hah Bathlehem nâng chhat min.” 43Eroh wah Jisu jũnko mihnyãn heh phôangphân jâ wah. 44Khãka hehma loat hûn wah, rohkomĩn tenâng hẽnma mĩn dek chĩnjâ hõ.
Jews Thôte Jabte Hehma Pũtẽ Dâlem Mah
45Chenthû abêmte sîpâhi heh ngakwâng phûmma sôam aroakte adong le Pharisee hehma chhîen wah, “Nêma ate chenrãng lalõwên dang erên a?”
46Sîpâhi hehma dânthâng wah, “Are mihnyãn pumma jab ekah rãngrãng hẽn mihnyãn mamĩn mãthat jab ekah!”
47Pharisee hehma thin nâng ngatwah, “Tema nê mĩn baaphhek thhen nẽ?” 48“Jews thôte jabte ma komĩn bã Pharisee ma komĩn watheh majô tenâng pũtẽ dâlem lahma nêma that jettet ã? 49Mihnyãn hehma Moses Nîem pa jetmah, eroh wah thin a Joban ma echhihsiet a!”
50Phûmma eko ama nâng Jisu demnâng chohmîn hokte Pharisee wãtheh ate mîn pa Nicodemus dâng wah. Tema ahân hehnâng ngatwah, 51“Nãng Nîem jũnko mihnyãn kowah mãchohtat ma, ngãle tema chenni chhihmo ekah a epa mãchoh khẽ ma hẽnnâng mĩn athẽ jîen ngã mih.”
52Thinma dânthâng wah, “Nangmĩn Galilee wah nẽ? Joban nyapraang maweh oko nangma ejet oh chenthû mĩn Galilee wah#7.52 chenthû mĩn mõng pa; wantheh nyapraang nâng mõng pa Galilee wah lahûmin ngãma raang ekah. mõng lahõng min.”
Currently Selected:
JOHN 7: Nokte
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
