JOHN 6
6
Jisu Ma Hahjat Bengâ Mihnyãn Nâng Phhekchhahthuk
(Mt 14.13-21; Mk 6.30-44; Luk 9.10-17)
1Ediko Jisu Galilee Josi rãnka nâng dânwâng wah (bã, eko Tiberias, ngãma mĩn ngatwah). 2Jisu ma khoanchhette heh patritli mêsiet pa khẽ lahma jahmõang mihnyãn heh ate diko jûnkhôam wah. 3Jisu hahhôkho nâng wãng lahma ate dijûnte heh demnâng tôngwâng wah. 4Ere sanpoat ko Dânkhôam lõkuh thâng nẽmnẽm dâng wah. 5Jisu ma tûmlit phõangsû tah pa mihnyãn heh ate tânâng jahmõang hû lahma khêwah, ephûmma tema Philip nâng chhîen wah, “Are mihnyãn hehnâng lânle phhekchhah thukroh chenwah phhekchhah chohri ea?” 6(Tema apa Philip hûng thaksok rãng ngatwah; lĩnlin ko tema chenni moatmin a epa jet dâng wah.)
7Philip ma dânthâng wah, “Angã ngãma chhupru lânle chhahroh phhekchhah riak rãngmĩn chânîî ngũn#6.7 ngũnpha: ngũnpha phatheh pa jâtheh dekbĩ thã dâng wah (Mt 20.2 tasû e). nôma ajah lêmmin.”
8Dijûnte ahân wãtheh Simon Peter phõ Andrew ma ngatwah, 9“Dela chha wãtheh nâng wongwah hôan wah baankên wanbengâ ngãle ngah lãnîî kep lahma tonga. Rohkomĩn epa are mihnyãn hehrãng lemah.”
10Jisu ma thin nâng ngatwah, “Mihnyãn heh tongthuk en,” (Ere theko hin jahmõang dâng wah) Ephûmma mihnyãn heh phangtang tongwah; eko mihnyãn heh hahjat bengâ rãng dâng wah. 11Jisu ma baankên pa sem lahma Joban nâng dangkoh a ngat rangsôam sôam lahma ekowah tôngte mihnyãn hehnâng phênkoh wah. Ngãle tema ngah lãnîî pamĩn eroh sôam lahma kohwah, ngãle thinma chentô tachhah ekah a etô angã ngãma chhah wah. 12Thin phangtang phoatphoat chhah diko, Jisu ma ate dijûnte hehnâng ngatwah, “Bâ achâ heh phangtang khhôantõan en, chhuptheh mĩn nek phahwa en.” 13Ephûmma mihnyãn hehma phhekchhah tah baankên wanbengâ kowah bâ achâ heh phangtang khhôantõan lahma echhi phânîî chõngchõng dâng wah.
14Jisu ma are patritli moatlem moat pa khẽ lahma ekowah mihnyãn hehma, “Lĩnlinjô apa mõng#6.14 mõng: 1.21 ko tasû e. hahtokkhoh ko katte pa dângmin ngãma ngatwah!” 15Jisu ma jet dâng wah, mihnyãn heh kã lahma thin lowang rãng metkep dângmin jôbã ngãma ekhetlõ hang ngãma; eroh wah ate lôlô hahhôkho nâng ngakwâng wah.
Jisu Jokhoh Nâng Khôam
(Mt 14.22-33; Mk 6.45-52)
16Sanhêmthah ko Jisu dijûnte heh Galilee josi ngenâng katwah, 17Ngãle khhôankho ko chhang lahma josi rãnka wah Capernaum hah ngenâng wângwah. Rangnyek komĩn thin tânâng Jisu lahû dâng wah. 18Ere poatko pông chân mõang pong lahma josi pamĩn phôang wah. 19Dijûnte heh meerem belîî rãng chhôan diko thinma Jisu jo khoh pumma thin khhôankho tâko khoamkã lahma khêwah, ngãle epa khẽ lahma thin achê rêwah. 20Jisu ma thin nâng, “Nekche en, apa Ngã ê!” ngãma ngatwah. 21Ediko thinma khhôankho ko khũhah nâhah chhângthuk wah, ngãle khhôankho pa lemlîen ma thin wângrãng ngãekah theko chepkat wah.
Mihnyãn Hehma Jisu Lêm
22Edijâko josi rãnka wah mihnyãn hehma khhôankho pa phangtheh lôlôbã etonga ngãma thônghûn wah. Te a dijûnte heh demnâng lajoh chhõan ma ate lôlô phethîen tah ngãma thinma jetwah. 23Khhôankho ahân Tiberias wah katte heh, Teso ma Joban nâng dangkoh a ngãma ngat rangsôam sôam lahma jahmõang mihnyãn hehma phhekchhah chhah tah josi kah ko chepkat wah. 24Chenthû mihnyãn heh Jisu le ate dijûnte heh ere theko lakhẽ dâng phûmma, khhôankho ko chhang lahma ate lêmsok Capernaum hah ngenâng kat wah.
Jisu Pa Rôandông Phhekchhah
25Chenthû mihnyãn hehma Jisu josi rãnka nâng chohkhê phûmma thinma tenâng ngatwah, “Hêthôte, nang are theko chenthû kãtoh a?”
26Jisu ma dânthâng wah, “Ngãma nê nâng toangtang thôkoh ekah: Nêma baankên phoatphoat chohphhek jũnko ngã lẽm ehah, ngãma patritli moatlem motek pa jetloat jũnko lêm dangmah hah. 27Achhihjâ thĩn phhekchhah rãngma nekmo en; enôma rôantang rôanjêng rôandông chohthĩn phhekchhah rãngma mo en. Are rãngrãng phhekchhah pa Mihnyãn Chha ma nê nâng ekoh hen, chenrãngma ngãko Joban Wã ma tenâng epa moatrãng chânkoh ekah.”
28Ephûmma thinma tenâng thôngphâ wah, “Joban ma hûn ekah moatlem moatrãng nima chenni moat min a?”
29Jisu ma thin nâng dânthâng wah, “Joban ma hẽn chîenkat thah a eko chen pũtẽ dâlem a ngãma hûn ehen.”
30Thinma dânthâng wah, “Nima khẽ lihma nangnâng jîen pûtê dâlêm rãng nangma chenni patritli moatlem khêsok hĩ a? Nangma chenni mo oa? 31Nite niwã hehma sẽ hah kho nâng manna chhahwah, Joban nyapraang ma aroh ngãekah, ‘Tema thin nâng rangkhhethung wah phhekchhah koh wah.’”
32Jisu ma ngatwah, “Ngãma toangtang thôkoh ekah,” “Moses ma chenni kohthhen a epa#6.32 Moses ma chenni kohthhen a epa; bã nê nâng ere kohte pa Moses dangmah. rangkhhethung wah phhekchhah dangmah; Ewã ma bã rangkhhethung wah phhekchhah lĩnlin pa nê nâng koh ehen. 33Chenrãngma ngãko Joban ma koh ekah phhekchhah pa rangkhhethung wah kã lahma hahtokkhoh nâng rôandông chohkohte pa.”
34Thinma chhîen wah, “Hêthôte, ninâng are phhekchhah pa rôantang rôanjêng ma kohhĩ.”
35“Ngã a rôandông phhekchhah pa,” ngãma Jisu ma thin nâng thôkoh wah. “Hẽnhẽn ngã tânâng hûerah a ereheh rêm larîî min; ngãle hẽnhẽn ma ngãnâng pũtẽ dâlem ehanga ereheh jolân mĩn larîî min. 36Ngãma nê nâng thôkoh ekah, nêma ngã khẽthah rohkomĩn nêma ngãnâng pũtẽ dâlem mahthah. 37Ewãma ngãnâng hẽnhẽn koh ehanga ereheh ngã tânâng ehûrah. Hẽnhẽn ngã tânâng hûerah a ereheh ngãma chenthû mĩn lajûnlõ min, 38Chenrãngma ngãko ngã rangkhhethung wah ngã hûngsi ko moatrãng kat dangmah râng, ngã chîenkatte hûngsi ko moatrãng kãerâng. 39Ngãle ngã chîenkatte pumma hûn ekah pa tema ngãnâng hẽnhẽn kohthanga erehehwah wãtheh mĩn lamahphe rãng hûn ekah, athhôanjâ rangwô ko ngãma ereheh phangtang hînsiet min. 40Chenrãngma ngãko Ewã ma hûn ekah pa hẽnhẽn ma Chha pa khẽ lahma tenâng pũtẽ dâlem ekah a erehehma rôantang rôanjêng rôandông chohrãng hûn ekah. Ngãle athhôanjâ rangwô ko ngãma thin engak hinsiet ang.”
41Tema “Ngã a rangkhhethung wah katte phhekchhah pa” ngãma jab phûmma mihnyãn heh ate lêlatnâng nyahrãng chhihjab wah. 42Ephûmma thinma tenâng ngatwah, “Apa Joseph chha Jisu ladang nẽ? Nãngma ate nyõng awã nîîmĩn jet e. Phûmma tema ngã rangkhhethung wah katte phhekchhah ngãma chenroh jîenjab ekah a?”
43Jisu ma dânthâng wah, “Nê dede tungko phôang chhihjab pa jek rẽ en. 44Ngã chîenkatte Ngã Wã ma lasiet hû erah ko mihnyãn heh hẽnmĩn ngã tânâng lata hû min; ngãle ereheh ngãma athhôanjâ rangwô ko engak hinsiet ang. 45Mõng hehma raangwah, ‘Joban ma angã ngã nâng hêthô min.’ Ngãle hẽnhẽn ma Wã ngĩn kep lahma ate wah he ekah a ereheh ngã tânâng ehûrah. 46Rohkomĩn apa hẽnma komĩn Wã lâchoh khẽ tah ngãma ngat dangmah; hẽn pa Joban tâwah kãerah a epumma lôlôbã Wã pa lâchoh khẽ tah. 47Ngãma toangtang thôkoh ekah: hẽnhẽn ma pũtẽ dâlem ekah a ere heh nâng rôantang rôanjêng lathhôan rôandông tonga. 48Ngã a rôandông phhekchhah. 49Nête nêwã hehma sẽ hah kho nâng manna chhah wah, rohkomĩn thinmĩn rîîtah. 50Phûmma rangkhhethung wah kãerah phhekchhah kowah hẽnhẽn ma chhah ekah a ereheh larîî min. 51Ngã rangkhhethung wah katte ahîn rôandông phhekchhah. Hẽnma komĩn are phhekchhah kowah chhah ekah a epa rôantang rôanjêng rãng hînmin. Ngãma tenâng kohmin phhekchhah pa ngã ngem pa, ngãma ere koh ekãng pa hahtokkhoh wah mihnyãn heh ahîn ma tôngrãng koh ekãng.”
52Are jũnko thin tungko nyahrãng rĩnkhah lahma chhiakmîn wah. Thinma ngatwah, “Are mihnyãn pumma ate ngem pa nãngnâng chenroh jîen phhekthuk hĩ a?”
53Jisu ma thin nâng ngatwah, “Ngãma toangtang thôkoh ekah: Nêma Mihnyãn Chha ngem kowah la phhek kẽn ko, ngãle ate hẽ lajok kẽn ko, nê dedema rôandông lata choh min. 54Hẽnhẽn ma ngã ngem kowah phhek ekah a, ngãle ngãhẽ jok ekah a erehehma rôantang rôanjêng lathhôan rôandông echoh a, ngãle athhôanjâ rangwô ko ngãma engak hinsiet ang. 55Chenrãngma ngãko ngãngem pa phhekchhah lĩnlin; ngãle ngãhẽ pa jok thĩn lĩnlin. 56Hẽnhẽn ma ngãngem kowah phhek ekah a ngãle ngãhẽ jok ekah a ereheh ngã demnâng dângmin, ngãle ngãmĩn thin demnâng edangang. 57Ngã a ahînte Wã ma chîenkat ehang, ngãle ere jũnwah ngãmĩn ahîn dang ekãng. Ere rãngrãng hẽnhẽn ma ngã phoang kowah phhek ekah a erehehmĩn ngã jũnma ahîn edanga. 58Are phhekchhah pa rangkhhethung wah kãerah; apa nête nêwã hehma chhah lahma khhadi ko arit rẽtah rãngrãng dangmah. Hẽnhẽn ma are phhekchhah pa chhah ekah a ereheh rôantang rôanjêng rãng hînmin.”
59Jisu ma apa Capernaum wah synagogue ko hêthô nungma ngatwah.
Rôantang Rôanjêng Rôandông Chohthĩn Jabkhab
60Ajahthêm ate dijûnte hehma are ngĩn pa tat lahma ngatwah, “Are hethô ehĩ pa nyahrãng alat. Apa hẽnma tâkep min a?”
61Jisu nâng hẽnma mĩn lathô koh majô thinma phõangjab ekah pa jetwah, ephûmma Jisu ma thin nâng ngatwah, “Are ngĩn pumma nê pûtê dâlêm thînphê hûn thuk ehen ã? 62Thonghûn tan, Mihnyãn Chha pa khhama ko ate chenko tongtah a ere theko ngakwãng lahma khê pa? 63Rôandông pa Joban Ju ma koh ehĩ; hẽ angem phoang pa chenjô dangmah. Ngã nê demnâng jabmîn ekah jabkhab pumma Joban ngewah rôandông chohthĩn Ju kephû koh ehen. 64Rohkomĩn nê wah khãka pumma pũtẽ dâlem met.” (Hẽnhẽn ma tenâng lapũtẽ dâlem min a, ngãle hẽnma ate chên asêng min a epa Jisu ma jetwah.) 65Jisu ma ngatwah, “Are jũnko ngãma nê nâng thôkoh wah, Wã ma lahû thuk erah ko mihnyãn hẽn mĩn ngã tânâng lata hû min.”
66Are jũnko wah Jisu dijûnte heh ajahthêm ate demnâng lajoh chhõantû ngakchhôan wah. 67Ephûmma Jisu dijûnte echhi wãnîî ko thôngphâ wah, “Nêmĩn ngakchhôan hûn ekẽn ã?”
68Simon Peter ma tenâng dânthâng wah, “Teso, ni a hẽn demnâng echhõan ea? Nangnâng rôantang rôanjêng lathhôan rôandông kohthĩn jabkhab pa tong hoh. 69Ngãle ade phûmma nima lâpũtẽ dâlem tih, ngãle nanga Joban tâwah katte Asâthhôan pa ngãma lâjettih.”
70Jisu ma dânthâng wah, “Ngãma nê echhi wãnîî rẽn ekah, rohkomĩn nêwah wãtheh nâng juchhih tong hen!” 71Tema Simon Iscariot chha Judas rãngma jabwah. Chenrãngma ngãko, Judas pa echhi wãnîî dijûnte chhãng kowah wãtheh jô madang komĩn, tema Jisu chên asêng min.
Currently Selected:
JOHN 6: Nokte
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
