Rom 2

1జేతి దూస్రేర్ నేవ్ కరేవాళో మన్క్యా తూఁ కూణ్ రస్తోయీ సదా హనూ కరేన తోన ఛాజేనీ. తూఁ దూస్రేర్ నేవ్ కరన్, తూఁ సదా ఊజ్ కామ్ కరస్తో, తార్ తూంజ్ దోషి కన్ నేవ్ ఠెరాలేరోచి కసెన కతో నేవ్ కరేవాళో తూఁ సదా అసె కామజ్ కర్రోచి కోనిక?

2అసో కామ్ కరేవాళేన నేవ్ కరే వాళేన, దేవ్ సతేన పక్డన్ నేవ్ కర్రోచ కన్ అప్ణేన మాలమ్.

3మన్క్యా, కేర్ కార్ణే తూఁ దూస్రేన నేవ్ కర్రోచీకో ఊజ్ కామ్ తూఁ సదా కర్రోచీ. దేవేర్ నేవ్ తపాలుఁ కన్ తూఁ కేలేరోచీ కాఁయిఁ?

4దేవేర్ దయా తూఁ దల్ బద్లాలేణో కన్ దేవ్ కూంత్రోచ కన్ మాలమ్ న కర్లస్ జూఁ ఓర్ అనుగ్రహమెన, సహనేనన్ శాంతేన త్రుణీకార్ కరేచిక?

5పణ్ తార్ దల్ కఠీన్ భాటా సరీకో ఛ. జేతి దేవేర్ రీసన్, న్యాయేర్ నేవ్ బార పడజే ఓ దాడ దేవేర్ న్యాయేర్ నేవో బార పడజే దాడ రీసేన తార్ తూఁజ్ జాదా కర్లేరోచీ.

6కసెనకతో హర్యేకేన ఓ కిదేజకో కామేర్ ఫళ్ దేవ్ ఉందేన దచ.

7ఆచ్చే కామేన ధీరేతి కర్తే, మహిమాన, మోట్పణేనన్ హమేషా రేర్ జీవేన ఢూండేవాళేన. దేవ్ ఉందేన శాశ్వత్ జీవ్ దచ.

8థోడ్సేక్ ఉందేర్ ఖాస్ ఫాయెదేవాస ఆచోరజేన ఛోడన్, ఖరాప్ వాటేమా చాలచ. ఉందేపర్ దేవ్ ఓర్ రీసేన ఠలావచ.

9ఖరాప్ కామ్ కరేవాళేన సేన, అగ్డి యూదావాళేన, పచ్చ గ్రీస్ దేశేవాళేన దుఃఖన్, భావేటీ రచ.

10పణ్ ఆచో కామ్ కరజే సేన ఆంగ యూదా వాళేనన్ పచ్చ పరల్ జనూన సదా దేవ్ మహిమా, మొట్పణన్ శాంతి దచ.

11కసెనకతో దేవ్ సేన ఏకజ్ తీరేతీ నేవ్ కరచ.

12ధరమ్ శాస్త్ర్ ఛేని జూఁ పాప్ కరేవాళ్ సే, ధరమ్ శాస్త్ర్ ఛేని జూంజ్ నాష్ వేజాచ; ధరమ్ శాస్త్ర్ రేన్ సదా పాప్ కరేవాళ్ సే ధరమ్ శాస్త్రేన పక్డన్ నేవో పావచ

13కసెనకతో ధరమ్ శాస్తర్ సామ్ళే వాళ్ ఆద్మీ దేవేర్ నంజరేమా నియత్ దార్ వేనీపణ్, ధరమ్ శాస్త్రేనపక్డన్ చాలేవాళోజ్ నియత్దార్ కన్ కేరావచ.

14అన్య జనూన ధరమ్ శాస్తర్ ఛేని, పణ్ ఓ ఉందేర్ మనేర్ చలావ్ణీన పక్డన్ ధరమ్ శాస్త్రేమా ఛజూఁ చాలతో, ఉందేన ధరమ్ శాస్తర్ న రతోయీ ఉందేర్ ఓజ్ ధరంశాస్త్రరేర్నాఁయిఁ ఛ.

15అసేఁవుర్ మన్ సదా గవాయి దేతోరజనా, ఉందెర్ సోంచ్ ఏకేపర ఏక్ గలత్ ఢోళ్తో, నవతో గలత్ ఛేని కన్ కేతో రజనా, ధరమ్ శాస్తర్ ఉందేర్ దల్లేమా లక్మెలెచ జుఁ ఉందేర్ దలేర్ చాలేతీ ఓ దకాళచ.

16దేవ్ మార్ ఆచ్ ఖబరేన పక్డన్ యేసు క్రీస్తుర్వడీతి మన్క్యార్ దల్లేమాఁయిర్ భేదేర్ సోంచేన నేవ్ కరజే దాడ హన్ను వచ.

17తూఁ యూదావాళో కన్ నామ్ పాల్డేన్, ధరంశాస్త్రరేన ఆస్రో లేన్ దేవేర్ కార్ణే బడాయి కర్రోచీకోనిక ?

18ఓర్ చలావ్ణీన మాలమ్ కర్లేన్ ధరమ్ శాస్త్రేమా ఉపదేష్ పాయోజకో వేన్ ఆచో ఛ కజేన మాన్లేరోచి కోనిక?

19జ్ఞానన్ సతెర్ రూప్ ఛజకో ధరమ్ శాస్త్రేవాళో వేన్- మ కాణేన వాట్ దకాళేవాళోన్, అందారేమా ఛజేన వజాళోన్.

20అక్కల్ ఛేనిజేన బోద కరేవాళోన్, నాన్క్యా ఛచ్యాబరేన శిక్షణ్ దేవాళో కన్ తార్ తూఁ కాటో విశ్వాస్ కర్రోచికోనిక?.

21తూఁ పర్లేన సికాయేచీ. తార్ తూఁజ్ బోధా కర్లే స్నిక? చోరి కర్మత్ కన్ ప్రకట్ కరస్జకో తూఁ చోరి కరేచిక?

22వఢాళో కర్మత్ కన్ కేఛీ, పణ్ తూంజ్ వఢాళో కరేచీకాఁయిఁ ? మూర్తెవూన ద్వేష్ కరెచీ పణ్ దేవళేమా ఛజేన చోరీ కర్లేచికాఁయిఁ ?

23దేవేర్ ధరమ్ శాస్తర్ మన ఛ కన్ బడాయి కర్రోచిజకో తూఁ పణ్ దేవేర్ హకమేన లంగన్ దేవేన హేటాల్ పాడేచి క ?

24లకన్ ఛజూఁ తమార్ కార్ణేజ్తో కాఁయిఁ దేవేర్ నామ్అన్య జనూర్ వచ్చ దూషణేర్ కారణ్ వేన్ ఛ ?

25తుఁ ధరంశాస్త్రరేర్ హకమేతీ నవన్ రస్తో, తార్ సున్నతేర్ కార్ణే తోన ఫాయెదో వచ, తుఁ హకమేన లంగస్తో తార్ సున్నత్, సున్నత్ నరజూంజ్ వేజావచ.

26జేతి సున్నత్ ఛేనిజకో అన్య జన్ ధరమ్ శాస్త్రేర్ హకమేతీ నవన్ నీయతేన పక్డన్ చాలతో సున్నత్ ఛేని జేన వతోయి సదా ఊ సున్నత్ లేల్దో జుఁ, లేకేమా ఆవచ కోనిక ?.

27ఉజ్జీ సున్నత్ ఛేని జకో పరల్ జన్ ధరమ్ శాస్త్రేన భర్పూర్ కరతో, జీవ్డార్ సున్నత్ కరాలీదో జకో తూఁ ధరమ్ శాస్త్రేన లంగన్ చాలస్ జేన తోన నేవో కరేనిక?

28బార యూదావాళో అసల్ యూదావాళోకోని బారేర్ జీవ్డార్ సున్నత్ కర్లీదోజకో సున్నత్ కొని.

29పణ్ దల్లేమా సున్నత్ కర్లేన్ రేవాళోజ్ సాసీ యూదావాళో, ఉజ్జీ సున్నత్ దలేర్ వడీతి వేన్ ఆత్మామా కామ్ కరచ పణ్ లకన్ ఛజే ధరమ్ శాస్తరేర్ నైఁ కొని, పణ్, అసె ఆద్మీన మన్క్యార్ వడీతీ కొని పణ్ దేవేర్ వడీతీ మాన్ మళచ.

Currently Selected:

Rom 2: Lambadi

Highlight

Copy

Compare