Rom 1

1యేసు క్రీస్తూర్ దాసన్, అపోస్తలేర్నాఁయి రేనన్ దేవేర్ ఆచ్ ఖబరేన ప్రచార్ కరేన ఊ కూంతన్ బలాయోజకో,

2పౌలు కన్ కజకో మ, రోమామా ఛజకో దేవేర్ జనూన సేన, కతో పవిత్తర్ జీవ్ణో బంచాఁకన్ ఆయెజే సేన ఖొసళ్ కన్ కేన్ లకోజకో పత్ర్.

3అప్ణో బాప్ ఛజకో దేవన్ ప్రభు ఛజకో యేసు క్రీస్తూ తమేన కృపాన్ శాంతి దేదియ.

4దేవ్ ఓర్ బేటాన్ అప్ణో ప్రభూ ఛజకొ యేసుక్రీస్తూర్ వడీర్ ఈ ఆచ్ ఖబరేన ఘణ్ దాడే హెటజ్ ఓర్ ప్రవక్తాఁవూతి వాగ్దాన్ కిదో.

5యేసు క్రీస్తూ, నరేర్ నైఁ దావీదేర్ వలాదేమా హుయొ. ఊ మరన్ దేవేర్ బళేతీ ఫేర్ ఉటో జేర్ కార్ణే దేవేర్ బేటాకన్, దేవేర్ మహిమా ఘట్ హుయో.

6ఏర్ నామేర్ కార్ణే సే జాతేర్ జన్ విశ్వాస్ కరన్ నవన్ రజుఁ ఉందేన చలాయెన యేసు క్రీస్తూర్ అపొస్తలేర్ నైఁ రేరో నసీబ్ దేవ్ ఓర్ కన్నెతీ మన దీనో.

7రోమ్ శేరేమా ఛోజకో తమ్ సదా యేసుక్రీస్తూర్ జనూమా అవోకన్ దేవ్ బలాయొజేమా, తమ్ సదా ఛో.

8మ తామార్ సేర్ వాస ధర్ ఆగ్డి యేసుక్రీస్తూర్ వడితి మార్ దేవేన స్తుతీ కర్రోంచుఁ, కసెన కతో సారీజగ్ తమార్ విశ్వాసేర్ కార్ణే సామళ్రేచ.

9అబ్బ కూఁ వతోయి కుణ్సీ ఆడో నరజూఁ తమార్ కన ఆయెన దేవేర్ ఖాతరేర్వడీతి మన వకత్ మాళఛ కాఁయిఁకో కన్.

10మ అరజ్ కరుఁ జన్నా హర్యేక్ వణా ఓన నోరా కర్తో తమేన హర్దేలావూఁఛుఁ. ఏర్వడీ ఓర్ బెటార్ ఆచ్ ఖబరేర్వడీ మ మార్ ఆత్మామా సేవా కర్రోజకో దేవజ్ మార్ గవాయి.

11తమ్ కాటో రేణో కన్, కతో, అపణ్ ఏకేర్ విస్వాసేర్ వడీతి ఏక్ హిమ్మత్ పావ్ణో కన్,

12ఆత్మార్ వడీర్ కుణ్సీ కృపార్ వరమ్ తమేన దేన కనన్, తమేన దేక్ణో కన్ ఘణో కూంత్రోంచుఁ.

13మార్ భాయివో, మ దూసర్ ఛజకో అన్య జనూమా ఫళ్ పాయో జూఁ తమార్మా సదా కుణ్సీ ఫళ్ పావ్ణో కన్ ఘణ్ వణా మ తమార్ కన్న ఆవ్ణో కన్ కూంత్ లీదో పణ్, కాఁయికో ఏక్ ఆడో హర్యేక్ వణా ఆవుజ్ కీదో. జేతి మ ఆసకో కొని. ఈ తమేన మాలమ్ నరజూఁ రేర్ మన ఖాతర్ చేని.

14మ గ్రీస్ దేశే వాళూనన్, గ్రీస్ దేశే వాళ్ కోని జేన, జ్ఞానివూఁనన్ కాఁయిఁ కళేనీ జే సే జనూన రుణేతి ఛుఁ.

15జేతి మార్ వంగావ జేలగు రోమ్ శారేమా ఛజకో తమేన సదా ఆచ్ ఖబరేన ప్రచార్ కర్ణోకన్ తయార్ ఛూఁ.

16కసనకతో, ఆచ్ ఖబరేర్ కార్ణే మ లాజ్ కరేవాళో కోని, కూఁకతో, విశ్వాస్ కరజేన సేన, అగ్డి యాదులేన, పచ్చ గ్రీస్ దేశే వాళేన సదా రక్షణ్ దేన ఊ దేవేర్ జోర్ వేన్ ఛ.

17కసేన కతో-నీయత్ దార్ విశ్వాసెర్వడీతి బంచచ కన్ లకన్ ఛజూఁ విశ్వాసేర్ వడీతి ఉజ్జి జాదా విశ్వాస్ ఆవజూఁ దేవేర్ నీయత్ బార్ పడ్రోచ.

18నరూర్ ఖరాప్ చాల్ దేవేర్ సత్ న దకావజుఁఆడే ఆవజకో జేతి నరూర్ సొగ్ళీ పాపన్ ఖరాప్ గోణేపర దేవేర్ రీస్ స్వర్గ లోకేతీ ఆరీచ.

19కసన కతో, దేవేర్ వడీ మన్క్యా మాలమ్ కర్లే సకజకో కాఁయికొ ఊ ఉందేర్ వచ్చ మాలమ్ వేన్ ఛ. దేవ్ ఊ ఉందేన మాలమ్ కర్దినో.

20దేవేర్ దకాయెనీ జకో గొణ్ కతో, ఓర్ హర్ ఘడీ రేర్ బళన్. దేవ్ పేదా కీదోజే హర్యేక్ చీజేవూన దేకన్ సొంచ్ కరతో ఊ మాలమ్ వేజాచ. జేతి ఓ కుణ్సీ జవాబ్ కెసకెనీ.

21ఉజ్జి ఓ, దేవేన మాలమ్ కర్లేన్ సదా ఓన దేవేన దేర్ మహిమా దీనె కోని, ధన్యవాదన్ స్తుతీ కర్ సకేకొని; పణ్ ఓ ఉందెర్ వాగ్-వివాదేమా కామ్ దేనిజూఁ వేగే.

22ఉందేర్ అజ్ఞానేర్ దల్ అందారేతి భరాగో హమ్ జ్ఞానీలోగ్ కన్ కేలేతే ఓ అక్కల్ ఛేనిజూఁ వేగే

23ఓ హర్ షుడి రజే దేవేర్ మహిమాన నాష్ వెజా జకో ఆద్మీరన్, పంకేరూర్, చార్ టాంగేర్ జీవ్రాసేరన్, సాపేర్ మూర్తేఁవూర్ రూపెర్నాఁయిఁ బద్లానాకే.

24జేర్ కార్ణే ఓ ఉందేర్ దలేర్ ఖరాప్ కూంతేన పక్డన్ ఉందేర్ జీవ్డావున ఏకేతి ఏక్ లాజ్ పావజూఁకర్లేన దేవ్ ఉందేన ఖరాప్ పణేన హవాల కర్దీనో.

25అస్ మన్క్యా దేవేర్ సత్తెన లబారీ కరన్ బద్లాన్ సృష్టీన పెదా కీదో జేన ఛోడ్దేన్ సృష్టీన పూజా కరన్ ధోకే. దేవజ్ స్తుతి పాయేన జగు జగు లగు ఛాజచ ఆమెన్.

26జేతి దేవ్ ఖరాప్ ఆశా కరెన ఉందేనహవాల కర్దీనో. ఉందేర్ బీరే సదా ఉందేర్ చాల్ ఛోడ్దేన్ దూసర్ తరీకార్ చాల్ చాలీ.

27హనూజ్ మరధ్ సదా బీరేవూన ఛోడ్దేన్, మర్దేతి మరద్ బేసర్మేర్ కామ్ కర్తే, ఉందెర్ పాపేర్ ఫళ్ పావ్తే ఏకేర్ వడీతి ఏక్ ఖరాప్ కూంతేతి తప్గే.

28ఉజ్జీ ఓ ఉందేర్ మనేమా దేవేన జాగ్ దినేకొని జేర్ కార్ణే, కరేజాయేని జస్ ఖరాప్ కావతే కరెన దేవ్ ఖరాప్ మనేర్ వడి ఉందేన హవాల కర్దినో.

29అసే ఆద్మీ సే తరీకార్ పాపేతీ, ఖరాప్ పణేతి, ఖరాప్ ఆసాతీ కప్టేతి దుష్ట గొణేతీ భరాన్, గర్బెతి, హత్యాతీ, లడాయితీన్, దుష్మణేతీ భరాన్ ఛ.

30చాడి వాతేతీ, వివాదేతి, దేవేన ద్వేష్ కరేవాళ్, హింసాతి అహంకారేతి మోట్పణ్ కరేవాళ్, ఖరాప్ కల్పణా కరేవాళ్ మాబాపేతీ న నవజూఁ రేవాళన్, అజ్ఞాని.

31వాత్ తపే వాళ్, దయాన్ ప్రేమ్ దకాళేనిజూఁవేగె.

32అస్ ఖరాప్ కావతేవున అభ్యాస్ కరేవాళ్ మ్వోతేన ఛాజచ. కన్ దేవేర్ హకమ్ ఉందేన మాలమ్ రతోయీసదా అసో కామ్ కర్రేచ. అత్రాజ్ కొని పణ్, అస్ కామ్ కరేవాళూన ఓ ఖుషీతీ పసంద్ కర్రేచ.

Currently Selected:

Rom 1: Lambadi

Highlight

Copy

Compare