Rom 3
3
1హనూవతో పరల్ జనూతీ యూదులేన ఛజకో మోట్పణ్ కాఁయిఁ? సున్నతేర్వడీతి ఫాయెదోకాఁయిఁ?
2సొగ్ళీ సేమాసదా జాదాజ్. అగ్డి దేవ్ ఓర్ ధరమ్ శాస్తరెన యూదా వాళేన దీనో.
3ధోడ్సేక్ విశ్వాసి వేన్ రతో కాఁయిఁ? ఓ అవిశ్వాసి వేన్ రజేతి దేవ్ విశ్వాస్ కరెన నఛాజజుఁ వేజాయక? హనూకేర్ ఛేని.
4తార్ వాతేర్ వడీ తూఁ నీయత్దార్ కన్ కేరావస్ జూఁ, తూఁ దావోకరస్ జనా జీతస్ జూఁ కన్ లకన్ ఛజూఁ, హర్యేక్ ఆద్మీ లబార్ వతోయి, దేవ్ సత్తేదార్ వేన్ రచ.
5ఏకాద్ వణా ఆపణ్ ఖరాప్ నీయత్ దేవేర్ నియతేన ఉజ్జీ ఠేరాన్ దకాళతో ఆపణ్ కాఁయిఁ కేసకాఁ ? ఆపణేన సజా ఘాలజనా దేవ్ అన్యాయి కరే వాళో వేజాయక ? మన్క్యా వాతే కరజుఁ మ వాతే కర్రోంచుఁ.
6హనూ నకేణో, దేవ్ నియత్దార్ నవతో ఊ జగేన కూఁ నేవ్ కరచ?
7పణ్, మార్ లబారీర్ కార్ణే దేవేర్ సత్ ఉజ్జీ ఆచో వజాళెతీ దకావతో, మ పాపివేన్ ఛూఁ జూఁ కసెన నేవ్ పావ్ణో. ?
8ఆచోవేణో కన్ కీడ్ కరాఁ కన్ హమ్ కేరెంచాఁ కన్ థోడ్సేక్ జణా హమేన దూషణ్ కరన్ కేజూఁ హమ్ కసేన నకేణో? అసేవున ఆవజకోసజా న్యాయజ్.
9హన్ను వతో కాఁయిఁకాఁ? హమ్ ఉందేతి ఆచ్చే ఛాఁక? కమ్ ఛాఁ? అస్సలజ్ కోని యూదావాళ్ కాఁయిఁన్, అన్యజన్ కాఁయిఁ సెజ్ పాప్ కీదే కన్ ఏతి ఆంగజ్ దోష్ ఢోళ్మేలేచాఁ.
10యిందూర్ కార్ణే లక్మెలేజకో కాఁయికతో, -
11నియత్దార్ ఛేని, ఏక్ సదా ఛేని, మాలమ్ కర్లేవాళో ఏకీ ఛేని దేవేన ఢూండేవాళో కొయి ఛేని.
12సే వాట్ ఛోడన్ కామ్ దేని జూఁ వేగే భాలాయి కరేవాళో ఛేని, ఏక్ సదా ఛేని.
13ఉందేర్ ఘోగ్ వగాడ్మేలెజే మసాణేర్ నైఁ ఛ. ఉందేర్ జీబేతీ లబారీ కరచ, ఉందేర్ హొటేర్ హెట సాపేర్ వస్ ఛ.
14ఉందేర్ మూండో భరన్ సరాపెన్ కపట్ భరన్ ఛ.
15లోయి రేడేన ఉందేర్ పగే ధాఁసచ.
16నాశన్, భావేటీ ఉందేర్ వాటేమా ఛ.
17శాంతీర్ వాట్ఉందేన మాలమ్ ఛేని.
18ఉందేర్ ఆంకి ముణాంగ దేవేర్ డర్ ఛేని.
19హర్యేక్ మూండో బురాజావజూఁన్, సారి జగ్ దేవేర్ సజాన పావజూఁ ధరమ్ శాస్తరేమా కజకొసే ధరమ్ శాస్త్రేతి నవన్ ఛజేతి కేరొచకన్ మాలమ్.
20కసేన కతో ధరమ్ శాస్త్రరేర్ నైఁ చాల జేర్ కార్ణే కుణ్సీ ఆద్మీ దేవేర్ నంజరేమా నియత్ దార్ వేనీ. ధరమ్ శాస్తరేర్వడీతి పాప్ కజకోకాఁయిఁ కో మాలమ్ వచ.
21హను రజనా ధరమ్ శాస్త్రేతి నాళీ దేవేర్ నీయత్ బార పడ్రోచ; ఓన ధరమ్ శాస్త్రన్ ప్రవక్తా గవాయి దేరేచ.
22ఊ యేసుక్రీస్తూమా విశ్వాస్ కరజేన సేన మళ జకొదేవేర్ నీయత్ వేన్ ఛ.
23కుణ్సీ ఫరక్ ఛేని. ఆద్మీసే పాప్ కరన్ దేవేర్ మహిమాన పావ నజూఁ దూర్ వేగె.
24పణ్ విశ్వాస్ కరజకో సే దేవేర్ కృపాతీజ్, యేసుక్రీస్తూర్ వడీతి దజకో విమోచనేర్ కార్ణే ఫోకటజ్ నీయత్దార్ కన్ నేవో పాలచ.
25పేనా కీదేజకో పాపేన దేవ్ ధీరేతి ఖమ్లేన్ ఓన విశ్వాస్ కీదేజకో ఆద్మీర్ పాప్ మాఫ్ వేజావజూఁ కీదో జేతి ఊ ఓర్ నీయతేన దకాళ్ణో కన్
26కీస్తు యేసూర్ లోయిమా విశ్వాసేర్ కార్ణే ఓన మేరేర్ ఆధారేర్ నాఁయిఁ బారపాడో. దేవ్, ఏదాడూమా ఓర్ నీయతేన బార పాడ్ణొ కన్ ఊ నీయత్దారన్ యేసుపర విశ్వాస్ ఛజేన నీయత్దారేర్నాఁయి కరెన ఊ హన్ను కీదో.
27హనూవతో బడాయి కరేనకారణ్ కత్త? ఓన ఫాటో మార్దీనొ. కుణ్సొ న్యా యేన పక్డన్ ఓన ఫాటో మార్దీనె? కామెర్ న్యాయేన పక్డన్ క? కోని, విశ్వాసేర్ న్యాయేన పక్డనజ్.
28జేతి, ధరమ్ శాస్త్రేర్ వడీర్ కామేతి కోని పణ్, విశ్వాసేర్ వడీతీజ్ మన్క్యా నీయత్ దారేర్నాఁయిఁ నేవో పాలేరేచ కన్ కేలేరెంచాఁ.
29దేవ్ యూదవాళేరోజ్ దేవ్ క? అన్యజనూర్ సదా దేవ్ కొనిక? హావ అన్య జనూరోసదా దేవజ్.
30దేవ్ ఎక్కజ్, జేతి ఊ సున్నత్ ఛజేన విశ్వాసేర్ వడీతీన్, సున్నత్ ఛేని జేన విశ్వాసేర్ కార్ణే నేవో కరచ.
31విశ్వాసేర్ కార్ణే ధరమ్ శాస్త్రేన రధ్ కర్రేంచాఁక? హనూ కేర్ ఛేని, ధరమ్ శాస్త్రేనఘట్ కర్రెంచాఁ.
Currently Selected:
Rom 3: Lambadi
Highlight
Copy
Compare
Share
Want to have your highlights saved across all your devices? Sign up or sign in
© 2025, The Bible Society of India
All rights reserved
