Mako 5

OYesu akutamba omusaiza aliku omuzumu

(Bona Mat 8:28-34; Luk 8:26-39)

1Awo oYesu nʼabeegesebwa baamwe ni baika enseeri wa nyanja ya Galiraaya, omu nsi yʼaBagerasene. 2OYesu niyaali yaakazwa omu bwato, omuntu aliku omuzumu nʼazwa omu kifo kya mbi#5:2 EzʼaBaisirairi zaabbanga mpuku. ekyo, nʼamwitirana. 3Omuntu oyo eyaraaranga omu mbi ezo era ndoowo yaali acaasobola okumubbwesya ekintu kyona kyona gonze olujegere. 4Emirundi gingi yabbwebwanga emikono nʼamagulu, baitu empingu oku mikono nʼenjegere oku magulu nʼabitiicanga. Era ndoowo munyamaani nʼomwei eyasobolanga okumugwagwania. 5Buli kiro emisana nʼobwire, yatambulatambulanga omu bituulo nʼoku nsozi, nakukokooma era niyeesaare nʼamabbaale. 6Awo niyalengeire oYesu, nʼayaba gyali nakwiruka, nʼamukubbira amajwi 7nʼakokooma muno ati, “Okunjunaana ki, we Yesu oMwana wa Kanca Akira byona? Omwibara rya Kanca otambonaabonesya.” 8Yabazire atyo, kubba oYesu yaali alagiire omuzumu ati, “Muzumu we liga oku musaiza oni!” 9Awo oYesu nʼagubuulya ati, “Eibara ryamu niiwe naani?” Ni gwiramu guti, “Eibara ryange ninje Legiyooni#5:9 Kini kimanyisya Iye., kubba tuli baingi.” 10Ni gumwesengeerya muno guti, “Otatupeka mu kitundu kya nsi kini!” 11Oku lusozi awo waaliwo eigana rya mberege nizikulya. 12Emizumu ni gyesengeerya oYesu giti, “Tusindike omu mberege, nizo twingiremu.” 13Nʼagiikiriza, ni gizwa oku muntu, ni gingira omu mberege. Eigana eryali likwikamu emberege nkʼenkumi eibiri ni rijumbutuka, ni riwanaisuka aiguru oku mutwe gwa lusozi, ni ryenaga omu nyanja, emberege zoona ni zifa amaizi. 14Awo abaali bakuziriisya ni bairuka, ni baaba okukobera aba mu kibuga nʼaba mu byalo. Abantu ni baiza okubona ekigwirewo. 15Ni baika awaali oYesu, ni babona omuntu eyaabbangaku eiye rya mizumu. Baamwajirye aikaire, nazwaire era nakweteja kusai, ni batiina. 16Abo abaaliwo emizumu nigikuzwa oku muntu oni, era nigikwingira omu mberege, ni basubiira abantu abaizire. 17Olwo abantu ni beesengeerya oYesu azwe omu kitundu kyabwe. 18Niyaali akutemba obwato, omuntu eyapekerweku emizumu nʼamwesengeerya amwikirize ayakalenge naye. 19Baitu oYesu nʼagaana, era nʼamukoba ati, “Irayo e waanywe omu bantu baamu, obakobere byona oMukama byakukoleire, era nka nakukwatiirwe ekisa.” 20Awo omuntu oyo nʼayaba nʼatandika okukobera aba mu kitundu ekya Dekapooli, byona ebyamukoleirwe oYesu. Abaabiwuliire boona boona ni beewuunya.

Omwara wa Yayiro nʼomukali eyakwaite oku kizwalibwa kya Yesu

(Bona Mat 9:18-26; Luk 8:40-56)

21Awo oYesu nʼasaabala omu bwato, nʼairayo enseeri wa nyanja. Abantu baingi ni bakumbaanira waali, oku lukeito lwa nyanja. 22Awo omwei oku bakulu ba ikumbaaniro, ayetebwa oYayiro, nʼayaba. Niyaboine oYesu, nʼakubba amajwi ampi nʼamagulu gaamwe, 23nʼamwesengeerya muno ati, “Akaara kange kalemerwe, iza okateeku emikono, okatambe, katafa.” 24Awo oYesu nʼayaba naye. Abantu baingi muno ni bamusengeerya omu kamigo. 25Waaliwo omukali eyaali abonaaboine nʼobulwaire obwa kajwisyo, okumala emyaka ikumi nʼebiri. 26Yaali awaireyo ebintu byamwe byona omu basawo baingi abaamujanjabire, baitu nʼatatambwa, ni yeeyongerangambe okubba okubbi. 27Niyawuliire ebikufa oku Yesu, nʼayaba gyali omu kibiina kyʼabantu abaali bakumusengeerya nʼaiza e nnyuma wa Yesu, nʼakwata oku kizwalibwa kyamwe, 28kubba yalowoize omu mutima gwamwe ati, “Akiri ninakwatambe oku kizwalibwa kyamwe, natambwa.” 29Niyakikweiteku, amangu ago akajwisyo ni kakanga. Nʼawura omunda omu ye natambirwe obulwaire bwamwe. 30Omu kaire ako akenyenere, oYesu nʼawura amaani gaamwe agatamba nigamuligiremu. Nʼayindukira ekibiina kyʼabantu, nʼababuulya ati, “Naani akwaitenge oku kizwalibwa kyange?” 31Abeegesebwa baamwe ni bamwiramu bati, “Weena okubona akamigo koolimu, nʼoirate nʼobuulya nti, ‘Naani ankwaiteku?’” 32Baitu OYesu ni yeeyongera okurolarola okubona amukwaiteku. 33Awo omukali niyeetejerye ekimubbaireku, nʼayaba nakukankana olwa kutiina, nʼakubba amajwi mu maiso ga Yesu, nʼamukobera amananu. 34OYesu nʼamukoba ati, “Mwana wange, otambirwe olwa kwikiriza kwamu. Yaba mirembe, obulwaire bwamu buwonere kimwei” 35OYesu niyaali acaabaza, abakwenda abaazwire e wa Yayiro, omukulu wa ikumbaaniro, ni baaba, ni bakoba oYayiro bati, “Omwala waamu afiire, oMwegesya ocaamugadirya kite?” 36Ebigambo byʼabakwenda abo oYesu nʼatabitaaku mwoyo nʼakoba oYayiro ati, “Otatiina, ikirizambe.” 37Awo oYesu nʼagaana abantu abandi okwaba naye, okwiyaku oPeetero, oYakobo nʼoYokaana omuganda wa Yakobo, 38Nibaikire omweka ya mukulu wa ikumbaaniro, oYesu nʼasangawo olukungo, abantu nibakukunga era nibakukubba ebiboobo. 39Niyaingiire omu nyumba nʼakoba ati, “Olukungo nʼokukunga byaki? Omwana tafiire, awungukirembe.” 40Ni bamusekeera. Niyamaare okupekawo boona boona, nʼatwala ababyaire ba mwana, nʼabeegesebwa baamwe abasatu, nʼaingira nabo omu kisiika omwana mweyaali. 41Nʼakwata omwana oku mukono, nʼamukoba ati, “Talisa kumi,” ekimanyisya nti, “Kaala we, nkukukoba, imuka.” 42Amangu ago akaala ni keemeera, ni katambulatambulamu. Kaali ka myaka ikumi nʼebiri. Abaaliwo ni bawuniikiira muno! 43OYesu nʼabakunkuniza muno, kini obutakikoberaku bandi. Era nʼabalagira okuweerya omwana ekyakulya.

Currently Selected:

Mako 5: RUULI-NYALA

Highlight

Copy