Mako 6

Aba Nazaaleesi bakugaana okwikiriza oYesu

(Mat 13:53-58; Luk 4:16-30)

1OYesu nʼazwa omu kitundu ekyo, nʼayaba omu nsi ya waabwe, nʼabeegesebwa baamwe ni baaba naye. 2Ekiro kya Sabbiiti nikyaikire, nʼatandika okwegesya omwikumbaaniro. Abantu abaingi abaaliwo nibaawuliire byakwegesya, ni bawuniikiira! Ni bakoba bati, “Bini byona byona yabiiyire ayi? Amagezi gani geyawairwe ga ngeri ki? Era akukola atyai ebyamaano bini? 3Oni ti niye omubaizi, omutaani wa Malyamu era omuganda wa Yakobo nʼoYusufu, nʼoYuda, nʼoSimooni? Era abanyaanya tibabba kuni naiswe?” Awo ni bagaana okumwikiriza. 4OYesu nʼabakoba ati, “Omulangi ateebwamu ekitiinisya woona woona, okutoolaku omu kibuga kya waabwe, nʼomu kika kyamwe, nʼomu nyumba ya waamwe.” 5Era eni oYesu tiyakoleireyo byamaano, okwiyaku okutambayo abalwaire abadoolidooli, nakubakwataku. 6Yeewuunyire muno kubba abantu baayo tibaalina kwikiriza. Awo nʼayaba nakwegesya omu byalo ebyerereirewo.

OYesu akutuma abeegesebwa baamwe eikumi nʼababiri

(Mat 10:5-15; Luk 9:1-6)

7Awo oYesu nʼayeta abeegesebwa baamwe eikumi nʼababiri, ni baiza waali, nʼabatuma babiri babiri, era nʼabaweerya obuyinza obwa kupeka emizumu. 8Era nʼabakunkuniza ati, “Omu lugendo luni mutayaba nʼakantu gonze akamwei, okwiyaku omwigo. Mutatwala mere, gonze ensawu, gonze empiiya. 9Muzwale mpuuju, era buli omwei atatwala ekizwalibwa ekyakabiri.” 10Era nʼakoba ati, “Buli eka eyaakubatangiiranga, mwikalenge omwo okwica nimuliriga omu kibuga ekyo. 11Nimwikanga omu kifo ni batabatangiira, oba ni bagaana okubawuliirya, muzwangayo. Era nimubbanga mukuzwayo, ocuucu abba abakwaite oku magulu gaanywe mumwekubbaigulyangaku, leke abbe nkʼobujuurwa oku bo.” 12Awo abeegesebwa ni baaba ni babuulira leke abantu beenenye ebikolwa byabwe ebibbi. 13Ni bapeka emizumu gingi oku bantu. Ni basiiga abalwaire amagita ni babatamba.

OYokaana oMubatiza akwitibwa

(Mat 14:1-12; Luk 9:7-9)

14Awo oMukama oKerode omufugi wa Galiraaya nʼawura oYesu byeyaali akukola era nʼokwegesya kubba yaali akubazibwaku woona woona. Abamwei ni bakoba bati, “OYokaana oMubatiza ayimbookere, nikyo abbeereire nʼobuyinza okukola ebyamaano.” 15Baitu abandi ni bakoba bati, “Oyo Eriya.” Nʼabandi bati, “Omwei oku balangi abairai.” 16OKerode ni yabiwuliire nʼakoba ati, “OYokaana oMubatiza gwe natemereku omutwe, niye ayimbookere!” 17Kubba oKerode omwenyenere niye yaali alagiire, oYokaana akwatibwe era aigaarwe omu nkomyo, okusemeerya oKerodiya, gweyaali abandwire, namwiyire oku mugande oFiripo. 18OYokaana oMubatiza yakobanga oKerode emirundi gingi ati, “Tikiikirizibwa kubandula muka mugandaawo.”#Lev 18:15; 20:21 19Olwʼekyo oKerodiya nʼata enzugu oku Yokaana, nʼayendya okumwita, baitu nʼatasobola. 20OKerode yatiinanga oYokaana, nʼamaite nti musaiza omwikiiri era akwera; nikyo yamulindiire aleke kwikibwaku kabbi. Yanyumirwanga okumuwuliirya, baitu buli lweyamuwuliiryanga, nʼasoberwanga muno.

21Ale ekiro kimwei oKerodiya natunga akakisa. Akakisa ako kaizire oku kiro kya bugenyi bwa kubyalibwa kwa Kerode. Oku bugenyi obwo oKerode nʼayeta abakungu baamwe, nʼabakulu bʼabasirikale, nʼabantu abakulu omu Galiraaya oku bugenyi. 22Omwala wa Kerodiya nʼayaba nʼabina, nʼasemeerya muno oKerode nʼabagenyi baamwe. Awo omukama nʼakoba omwala ati, “Nsaba kyona kyʼokwendya, nakikuweerya.” 23Nʼalayira nʼokulayira ati, “Kyona kyona kyʼewansaba nakikuweerya, Gonze wayendya obukama bwange tubugabanirya akati.” 24Awo omwala nʼawuluka, ni yeebuulya oku nyina ati, “Kiki kyemba nsaba?” Onyina nʼairamu ati, “Omutwe gwa Yokaana oMubatiza nigwo obba osaba.” 25Amangu ago omwala nʼalabukaku okwira egiri omukama, nʼamusaba ati, “Kyenkwendya, nikwo okumpeerawo omukaire kani, omutwe gwa Yokaana oMubatiza, nigutairwe oku sowaani.” 26Kini ni kiinaza muno omukama, baitu olwakubba nga yaali alayiire, era nga nʼabagenyi baamwe baawuliire, nʼatayendya kumwima kyʼasabire. 27Amangu ago omukama nʼatuma omusirikale omulindi wa nkomyo okuleeta omutwe gwa Yokaana. Gwe yatumire, nʼayaba omu nkomyo nʼatemaku oYokaana omutwe, 28nʼaguleetera oku sowaani, nʼaguweerya omwala, nʼomwala nʼaguweerya onyina. 29Abeegesebwa ba Yokaana nibaakiwuliire, ni baaba ni batwala omulambo gwamwe, ni baguziika.

OYesu akuliisya abantu enkumi eitaanu

(Mat 14:13-21; Luk 9:10-17; Yok 6:1-14)

30Awo abakwenda oYesu beyaali natumire ni bairayo gyali, ni bamusubiira byona byebaali bakoore nʼebyebaali beegeserye. 31Ye nʼabakoba ati, “Mwize, twabe omu kifo mwetwasobola okubba iswenkai, muwumuleku.” Baali babuurwe nʼakaire okulya emere olwa bantu abaingi abaizanga we baali. Bani baabbanga bakuzwawo, abandite ni baika. 32Awo ni basaabala omu bwato, ni baaba bonkai, omu kifo ekitaalumu bantu. 33Baitu abantu baingi ni bababona ni bakwaba, ni babeeteja nti nibombe. Olwo ni bazwa mu bibuga byona, ni baakala oku lukalu, nga bakwaba bairuka, ni babeekeera omu kifo oYesu nʼabeegesebwa baamwe gyebaali bakwaba. 34OYesu niyaligire mu bwato, nʼabona abantu baingi abakumbaine, nʼabakwatirwa ekisa, kubba baali nkʼentaama ezinyambula muliisya! Awo nʼabeegesya ebintu bingi.

35Abeegesebwa nibaaboine ngʼobwire buli ampi okusweka, ni baaba awaali oYesu, ni bamukoba bati, “Ekifo kini kyenagire, nʼobwire mbuni bukusweka. 36Abantu balage baabe beeguure emere mu byalo nʼomu bubuga obwerereire ani.” 37OYesu nʼabairamu ati, “Niinywe mubba mubaweerye emere balye.” Bo ni bamubuulya bati, “Okwendya twabe tubaguure emigaati egya dinaari#6:37 Edinaari emwei nigyo yaabbanga empeera ya mupakasi eya kiro ekimwei. ebikumi ebibiri, tubaweerye balye?” 38Ye nʼababuulya ati, “Mulinawo emigaati gingai? Mwabe mubone” Nibamaare okwetegereza, ni bamukoba bati, “Etaanu nʼencwi ibiri.” 39Awo oYesu nʼalagira abeegesebwa okwikalisya abantu boona boona omu bubiina oku busubi. 40Ni baikala nibali mu bibiina, ebimwei ni birimu abantu kikumi-kikumi, ebindi amakumi ataanu ataanu 41OYesu nʼatwala emigaati etaanu nʼencwi ibiri, nʼaimula amaiso egiri eiguru, ni yeebalya oKanca. Nʼayendayenda emigaati, nʼagiweerya abeegesebwa baamwe bagigabire abantu. Era nʼencwi eibiri nʼaziyendayenda, boona boona ni bafuna. 42Boona boona ni balya ni baikuta. 43Abeegesebwa ni bakumbaania ebitundutundu bya migaati nʼebya ncwi ebyasigairewo, ni biizulya ebiibbo ikumi nʼabibiri 44Oku bantu abaaliire, omuwendo gwʼabasaiza gwali enkumi etaanu.

OYesu akutambula oku maizi

(Mat 14:22-33; Yok 6:16-21)

45Amangu ago oYesu nʼalagira abeegesebwa baamwe basaabale mu bwato bamwebemberemu, baabe e Bbesusaida, enseeri wa nyanja, nga ye acaalaga abantu. 46Niyamaare okubalaga, nʼatemba oku lusozi okusaba. 47Obwire webwaswekeire, abeegesebwa baamwe baali mu bwato akati omu nyanja, oYesu ye nali yenkai oku lukalu. 48Awo nʼabalengera ni bakugada okugimba obwato, kubba ompungo yaali akubuzwa mu maiso. Obwire nibwali buli ampi okuca, nʼayaba gyebali nakutambuura oku maizi. Nʼabba nkʼakwendya okubaakalaku. 49Baitu bo nibaamuboine nakutambula oku maizi, ni balowooza nti muzumu, Ni bakokooma, 50kubba boona boona baamuboine, ni batiina muno. Baitu amangu ago nʼabakoba nti, “Mugume omyoyo, ninje, mutatiina!” 51Awo nʼatemba obwato mwebaali. Ompungo nʼalekera awo okuwunga. Abeegesebwa baamwe ni bawuniikiira muno, 52kubba ekyamaano ekya migati baali bateetejerye makulu gaakyo. Emitima gyabwe gyali gibbani.

OYesu akutamba abalwaire e Genesareeti

(Mat 14:34-36)

53Nibaikire enseeri wa nyanja, omu kitundu ekya Genesareeti, ni baika oku lukeito. 54Ni bazwa omu bwato, abantu ni beeteja oYesu amangu ago. 55Ni bairuka ni baakalayakala buli wantu omu kitundu ekyo, ni baleeta abalwaire, nibabagingiire oku bwara, ni babatwala woona gyebaawuranga nti oYesu aliwo. 56Woona woona we yayabanga, omu butale, omu kibuga, aba mu byalo, abantu baatwaire abalwaire mu bifo ebikumbaanirwamu, ni bamwesengeerya aikirize akiri bakwate oku mugo gwa kizwalo kyamwe, era boona boona abaakikwaiteku, baawonere.

Currently Selected:

Mako 6: RUULI-NYALA

Highlight

Copy