Mako 4

Olufumo lwa musigi wa busigo

(Mat 13:1-9; Luk 8:4-8)

1Awo oYesu nʼatandikate okwegesya nali oku nyanja eya Galiraaya. Ekibiina kyʼabantu abaamukumbaaniireku nikyakaliriirye obukooto, nʼatemba omu bwato obwali oku maizi nʼaikala, bo abantu ni basigala oku lukalu. 2Nʼabeegesya ebintu bingi nakukolesya enfumo. Era omu kwegesya kwamwe, nʼakoba ati, 3“Muwuliirye! Omusigi yayabire okusiga. 4Niyaali akumiisa, obusigo obumwei ni bugwa oku ntando wa muwanda, ebinyonyi ni biiza ni bibulya bwona bwona. 5Obundi ni bugwa okwitakali erya ku lwazi. Amangu ago ni bumera, kubba eitakali rimpi. 6Eisana niryayakire omuno, obusimbo ni buwotoka. Era olwakubba ngʼemizi gyabwo gyali gimpi, ni bwoma. 7Obundi ni bugwa omu mawa. Ni gakula, ni gabuliriira ni butayera. 8Nʼobundi ni bugwa omwitakali erisai. Nibumera, ni bukula, ni bwera ebyana. Ebumwei ni bibbaamu ensigo amakumi asatu; ebindi ensigo nkaaga; nʼebindi, ensigo kikumi.” 9Awo oYesu nʼakoba ati, “Alina amatwi aga kuwura, awure.”

Ekigendeerwa omu lufumo

(Mat 13:10-17; Luk 8:9-10)

10Awo oYesu niyaali asigaire yenkai, abeegesebwa eikumi nʼababiri, na bantu abandi abaali nabo, ni bamusaba abasoboore ebikwata oku nfumo. 11Ye nʼabakoba ati, “Nywe mwaweereibwe okumanya ekyama ekifa oku bukama bwa Kanca. Baitu abantu abandi, buli kintu kibakoberwa mu nfumo, 12nkʼebyawandiikiibwe nibikoba,

‘Barolenge

baitu ni batakubona,

bawuliiryenge,

baitu nibatakweteja,

kubba nibaakukoore ebyo baakwenenyeze

ni basaasirwa ebibbi byabwe.’#Isa 6:9-10 ”

OYesu akusoboora amakulu ga lufumo

(Mat 13:18-23; Luk 8:11-15)

13Awo oYesu nʼababuulya ati, “Nimwabba mutakweteja lufumo luni mulisobola mutyai okweteja olufumo olundi lwona lwona? 14Omusigi niye muntu asiga ekigambo kya Kanca omu bantu. 15Abantu abamwei baisana obusigo obwagwire oku ntando wa muwanda. Ekigambo nikibasigibwamu, bakiwura, baitu amangu ago oSetaani nʼaiza nʼakibaiyamu. 16Abandi baisana obusigo obwagwire omwitakali erya ku lwazi. Nibawura ekigambo, amangu ago bakitangiira nʼokusemeerwa. 17Baitu kubba baisana ebimera ebitalina mizi girai, bamalawo akaire kadooli. Obusuume oba okwasayasanizibwa olwa kigambo kya Kanca ni kwiza, amangu ago ni bagwa. 18Abandi baisana obusigo obwagwire omu mawa. Ekigambo bakiwura, 19baitu olwa kumaara omwoyo oku bintu bya nsi nʼokwendya obuguuda bibagaana okukola ebisai. 20Abandite baisana obusigo obwagwire omwitakali erisai. Bawura ekigambo, ni bakiikiriza era nibeera ebyana amakumi asatu, obundi nkaaga, nʼobundi kikumi.”

Etaala tebbisibwa

(Luk 8:16-18)

21Awo oYesu nʼabakoba ati, “Etaala tereetebwa kubbisibwa mu kiibbo, oba okuteekebwa omu ntabbu, baitu ewanikibwa ku kikondo kyayo. 22Kubba buli kintu ekibbisiibwe, kiriiyibwayo. Era buli kyama kirimanyibwa. 23Ale muwure, nimwabba mukwendya okuwura.” 24Era nʼabakoba ati, “Mwegendereze ebintu byemuwura! Olulengo lwemukolesya okupimira abandi, nirwombe lulikolesebwa okupimira nywe, baitu nʼobwandi bwingi muno. 25Kubba buli alina alyongerwaku leke abbe na bingi muno. Baitu buli atalina, aliiyibwaku nʼakadooli kaali nako.”

Olufumo lwa busigo nka nibukula

26OYesu nʼayongera okukoba ati, “Obukama bwa Kanca bwisanisibwa omuntu asiga obusigo omwitakali. 27Abbasya obwire, nʼasisimuka emisana nʼayaba nʼakola ebindi, baitu obusigo obwo bumera era ni bukula natakumanya. 28Eitakali oku bwaryo ryonkai niryo rimeresya ekimera ni kikula ni kigwisya. Ekimera kini kyekeera kuleeta kikoola, ni kiiryaku ebitwe. Ale oluzwannyuma omu bitwe ebyo, ni mubbaamu empuule. 29Empuule ni zengeire, obwo omuntu nʼakesa, kubba eikesa ribba riikire.”

Olufumo lwʼakasigo ka kaladaali

(Mat 13:31-34; Luk 13:18-19)

30OYesu nʼakobate ati, “Obukama bwa Kanca tusobola kubwisanisya ki? Oba lufumo ki lwetusobola okukolesya okubusoboora 31Tusobola okubwisanisya akasigo ka kaladaali. Kani niko kasigo akasingira kimwei obudooli omu nsigo zoona zoona oku nsi. 32Baitu nikasimbwa, kamera ni kakula ni kazwamu ekimera ekisingira kimwei ebimera ebindi byona byona obukooto. Kaleeta amataagi agakooto, ebinyonyi ni byombokaku ebinyumba, nʼokwikala omu kiituuru kyakyo.” 33OYesu yakolesyanga enfumo ezikwisana zini zingi okubuulira abantu ekigambo kya Kanca, okusigikira oku kyebaasobolanga okweteja. 34Tiyabazire nabo kintu kyona kyona atakyakairye mu nfumo, baitu niyasigalanga nʼabeegesebwa baamwe, bo nʼabasoboora byona byona.

OYesu akugwagwania ompungo

(Mat 8:23-27; Luk 8:22-25)

35Awo ekiro ekyo ekyenyenere eigolo, oYesu nʼakoba abeegesebwa baamwe ati, “Tusomoke twabe enseeri.” 36Awo abeegesebwa baamwe ni baliga mu kibiina kyʼabantu, ni basaabala omu bwato oYesu mweyaali, ni baaba naye. Baitu nʼabantu abandi ni basaabala omu maato agandi boona ni baaba naye. 37Ompungo owʼamaani nʼaimuka, ebinyege ebikooto ni bigwa omu bwato, era bwato ni bubulaku kadooli okwizula amaizi. 38OYesu yaali mu kifo ekya mabega omu bwato nabbasirye, niyeesagwire ekyesigato. Abeegesebwa baamwe ni bamusisimula, ni bakukoba bati, “Mwegesya, tokufaayo nga tukulika?” 39OYesu nʼaimuka nʼayamira ompungo, era nʼalagira ebinyege ati “Sirika, teeka!” Ompungo nʼasirika enyanja nʼeteekera kimwei. 40Awo oYesu nʼakoba abeegesebwa baamwe ati, “Lwaki mutiinire? Mucaali kubba na kwikiriza?” 41Baitu bo ni batiina muno, ni bakobangana bati, “Oni muntu wa ngeri ki? Okubona nʼompungo yeena amuwura!”

Currently Selected:

Mako 4: RUULI-NYALA

Highlight

Copy