Yokaana 19
19
1Awo oPiraato nʼalagira abasirikale batwale oYesu leke bamusuunye. 2Abasirikale ni baluka ekondo yʼamawa ni bagimuta oku mutwe. Ni bamuzwalisya ekizwalibwa ekya kikingo 3era ni baaba egyali emirundi nʼemirundi nibakumukiina bati, “Mamaala, omukama wʼaBayudaaya!” Ni bamupaaya omu busyo.
4OPiraato nʼairamu okuwuluka nʼayaba egiri abeebemberi bʼaBayudaaya nʼabakoba ati, “Abange, kammubawulukirye ani leke mumanye nti ndoowo nsonga gyenkusigikiraku okumujunaana.” 5OYesu niyawulukire nazwaire ekondo yʼamawa nʼekizwalibwa ekya kikingo, oPiraato nʼabakoba ati, “Omusaiza ngoni.”
6Abakabona abakulu nʼabakungu baabwe nibaakamuboine, ni bakokooma bati, “Mubambe! Mubambe!”
Baitu oPiraato nʼabairamu ati, “Nywe mumutwale, mumubambe, baitu nje tinkubona musango gwairye okumujunaana.”
7Abeebemberi bʼaBayudaaya ni bamwiramu bati, “Tulina eiteeka, era okusigikira okwiteeka eryo, ateekerwe kwitibwa, kubba yeeyetere Mwana wa Kanca.”
8OPiraato niyawuliire kini, ni yeeyongera okutiina 9Nikwo okwirayo omu kikaali nʼabuulya oYesu ati, “We wazwire ayi?” Baitu oYesu nʼatamwiramu. 10OPiraato nʼamubuulya ati, “Ogaine okunyiramu? Tomaite nti ndina obuyinza okukutaisya oba okukubamba?”
11OYesu nʼamwiramu ati, “Tiwaakubbaire na buyinza oku nje, nibutaakukugabiirwe Kanca ali omwiguru. Olwʼekyo ampaireyo gyoli niye alina ekibbi ekikukiriira kimwei obukooto.” 12Okuzwa omu bwire obwo, oPiraato nʼagezangaku okutaisya oYesu, baitu abeebemberi bʼaBayudaaya ni beeyongera okubaziranga aiguru bati, “Niwataisya omusaiza oyo nʼayaba, waabba otacaali munywani wa Kaisaali. Kubba buli eyeeyeta omukama, abba akulwanisya Kaisaali”
13OPiraato niyawuliire bini, nʼawulukya oYesu era nʼaikala oku ntebe ya bulamuli omu kifo ekimanyiibwe nkʼaMabbaale aGaaliire (omu Lwebbulaniya, ekimanyisya Gabbasa). 14Kyali kiro kya kuteekaniza Bugenyi bwa Kwakalibwaku; omwiyangwe.
OPiraato nʼakoba aBayudaaya ati, “Omukama waanywe ngoyo.”
15Baitu ni bakokooma nibakukoba bati, “Mwite! Mwite! Mubambe!” OPiraato nʼababuulya ati, “Mbambe omukama waanywe?” Abakabona abakulu ni bairamu bati, “Titulina mukama, okutoolaku oKaisaali.”
16Awo oPiraato nʼabakwatisya oYesu leke bamubambe.
OYesu akubambwa
(Mat 27:32-44; Mak 15:21-32; Luk 23:26-43)
Awo abasirikale ni batwala oYesu 17niyeetiikire omusaalaba gwamwe, nibamwikya omu kifo ekyetebwa Kyangala. (Omu Lwebbulaniya ekifo kini kyetebwa Gologoosa). 18Ani nigyo baamubambiire nʼabantu abandi babiri, omwei oku buli rubaju, ye oYesu nali akati.
19OPiraato nʼawandiikisya ekiwandiiko; ekiwandiiko ekyo ni kikomeerwa oku musaalaba nikikukoba kiti, “oyesu owa nazaaleesi, omukama wʼabayudaaya.”
20ABayudaaya baingi abaasomere ekiwandiiko kini kubba ekifo oYesu we yabambiirwe kyali nikyerereire ekibuga, era ekiwandiiko kyali nikiwandiikirwe omu ndimi isatu: oLwebbulaniya, oLulatini nʼoLuyonaani. 21Abakabona abakulu abʼaBayudaaya ni bawakanisya oPiraato nibakukoba bati, “Otawandiika nti, ‘Mukama wʼaBayudaaya.’ Baitu wandiika nti, ‘Omusaiza oni yeeyetere mukama wʼaBayudaaya.’”
22OPiraato nʼabairamu ati, “Ekyempandiikire nikyo mpandiikire.”
23Abasirikale nibaamaare okubamba oYesu, ni batwala ebizwalibwa byamwe ni babita omu miteeko enai, buli omwei nʼatwalaku gumwei niwasigalawo kanzu yonkai. Ekanzu yaali tebaziriirwe baitu nga yoona yoona etatiibwe okuzwa aiguru okwika ansi.
24Awo abasirikale nibakobangana bati, “Ekanzu tutajoonolamu; tukubbe kalulu okubona naani eyagitwala.”
Kini kyabbairewo leke ebyawandiikiibwe biikiire ebikoba biti,
“Beegabainie ebizwalibwa byange
era ni babikubbaku akalulu.”#Zab 22:18
Era kini abasirikale nikyo baakoore.
25Ampi nʼomusaalaba gwa Yesu waali weemereirewo oma waamwe, omuganda wa ma waamwe, oMalyamu omuka Kulopaasi nʼoMalyamu Magudaleena.
26OYesu niyaboine oma waamwe nʼomwei oku beegesebwa baamwe gweyayendyanga omuno nayemereire ampi naye nʼamukoba ati, “Oni mutwalenge nkʼomutaani waamu.” 27Era nʼakoba omwegesebwa oyo ati, “Oni mutwalenge nkʼomaawo.” Okuzwa omu bwire obwo, omwegesebwa oyo nʼatwala oma wa Yesu ewaamwe.
Okufa kwa Yesu
(Mat 27:45-56; Mak 15:33-41; Luk 23:44-49)
28OYesu niyeetejerye nti buli kimwei kimaare okwikiira, nkʼebyawandiikiibwe nibikoba, nʼakoba ati, “Amalo gakunduma.”
29Awo waaliwo ekibya ekyalimu enkaatu ya mwenge gwa zabbibbu, abasirikale ni bakubbyamu ekyangwe ni bakibbwa oku kasaale akeetebwa yisopu ni bakiimula ni bakita oku munwa gwamwe. 30OYesu niyakombereku nʼakoba ati, “Kiweire!” Awo nʼainamya omutwe, nʼafa.
OYesu okusumutwa omu mbaju
31Ekiro ekyo kyali kya kuteekaniza, enceege nga Sabbiiti eyanjawulo. Olwakubba abeebemberi bʼaBayudaaya tibaayenderye mirambo kusigala ku misaalaba oku Sabbiiti, ni basaba oPiraato amagulu gʼabantu abaali babambirwe gayendebwe nʼemirambo giwanulweyo. 32Awo abasirikale ni baaba ni bayenda amagulu ga musaiza eyeekereire okubambwa amwei nʼoYesu ale ni bayenda nʼagʼodi owondi. 33Baitu nibaikire oku Yesu ni baaja nga yamaare irai okufa, ni batayenda magulu gaamwe. 34Baitu omwei oku basirikale nʼasumuta oYesu omu mbaju, amangu ago ni muzwamu omusaayi nʼamaizi.
35Buni nibwo bujuurwa obwʼoyo eyaboine nikikubbaawo, era obujuurwa bwamwe bwa mananu. Akimaite nti akubaza mananu era akuweerya obujuurwa buni nywena musobole okwikiriza.
36Ebintu bini byabbairewo leke ebyawandiikiibwe biikiire ebikoba biti, “Ndoowo oku magumba gaamwe gonze erimwei eririyendebwa.”#Kuz 12:46; Kub 9:12; 34:20 37Era nkʼekyawandiikiibwe ekindi nikikoba nti, “Balirola okwoyo gwebaasumutire.”#Zek 12:10
Okuziikwa kwa Yesu
(Mat 27:57-61; Mak 15:42-47; Luk 23:50-56)
38Bini nibyaweire, oYusufu owʼAlimasaaya nʼayaba nʼasaba oPiraato omulambo gwa Yesu. OYusufu yaali mwegesebwa wa Yesu, baitu mwibbise kubba yaali akutiina abeebemberi bʼaBayudaaya. OPiraato niyamwikiriize, nʼayaba nʼatwala omulambo gwa Yesu.
39OYusufu yasendeekereirweku ONikodemu, omusaiza eyaabire ewa Yesu obwire. ONikodemu yaleetaine ekiro amakumi asatu eza kiruube kya mira nʼalosi. 40Bakali babiri bani ni batwala omulambo gwa Yesu ni baguzinga omu ngoye za liiri nibatairemu nʼobuwoowo okusigikira oku mikiirokiiro gyʼaBayudaaya egya kuziika.
41Omu kifo oYesu mweyabambiirwe, mwalimu omusiri era omu musiri ogwo mwalimu embi egiyaaka eyaali eteziikwangamu muntu gonze nʼomwei. 42Olwakubba kyali kiro kyʼaBayudaaya ekya kweteekanirizaku Sabbiiti era nʼembi ngʼeyerereire ekifo oYesu weyabambiirwe, omwo nimwo baamutaire.
Currently Selected:
Yokaana 19: RUULI-NYALA
Highlight
Share
Copy
Want to have your highlights saved across all your devices? Sign up or sign in
