Yokaana 18
18
Okukwatwa kwa Yesu
(Mat 26:47-56; Mak 14:43-50; Luk 22:47-53)
1OYesu niyamaare okusaba, nĘĽawuluka nĘĽabeegesebwa baamwe ni basomoka akagera Kidurooni. Enseeri waako waaliyo endumiro ya misaale egyĘĽoliva, ye nĘĽabeegesebwa baamwe ni bagingiramu. 2OYuda eyaliiraine oYesu, yeetejanga ekifo kini kubba oYesu nĘĽabeegesebwa baamwe baitiranangayo.
3Awo oYuda nĘĽaiza omu ndumiro nĘĽakabinja kĘĽabasirikale nĘĽabakungu bĘĽabakabona abakulu nĘĽaBafarisaayo nibakwaite etooki, etaala za birawuli nĘĽebyakulwanisya.
4Olwakubba oYesu yaali nakumanya ebikwaba okumubbaaku, nikwo okuligayo nʼababuulya ati, “Mukutoolya naani?” 5Bo ni bamwiramu bati, “OYesu owa Nazaaleesi.” OYesu nikwo okubairamu ati, “Niye nje gwemukutoolya.” (OYuda omuliirani, yaali ayemereire nabo.)
6OYesu niyabakobere nti, “Niye nje,” ni baira ennyuma ni bagwa ansi. 7OYesu nʼairamu nʼababuulya ati, “Baitumbe mukwendya naani?” Ni bairamu bati, “OYesu owa Nazaaleesi.”
8OYesu nʼairamu ati, “Mbakobere niye nje. Nimwabba mukutoolya ninje, ale abandi mubaleke baabe.” 9Kini yakibazire leke ebigambo byeyeekereire okubaza biikiire, ebikukoba biti, “Timbuurweku muntu gonze omwei oku bewampaire.”#Yok 6:39
10Awo oSimooni Peetero eyaalina empirima, nĘĽagikozolayo, nĘĽasalaku okutwi okulyo okwa mwiru wa oSaabakabona. (Omwiru oyo yayetebwanga Maluko.)
11Awo oYesu nʼalagira oPeetero ati, “Irya empirima omu kiraato kyayo! Mukulowooza tinteekerwe kunywa kikopo kya kubonaabona oIte wange kyeyanteekaniriize?”
OYesu akutwalwa omu maiso gĘĽAnasi
(Mat 26:57-58; Mak 14:53-54; Luk 22:54)
12Awo akabiina kĘĽabasirikale nĘĽomuduumiri waako amwei nĘĽabakungu aBayudaaya ni bakwata oYesu ni bamubbwa, 13ni beekeera okumutwala ewa Anasi eyaali oisibyala wa Kayaafa, oKayaafa niye yaali oSaabakabona omwaka ogwo. 14OKayaafa niye yaali awaire abeebemberi bĘĽaBayudaaya amagezi nti kyakuli kisai omuntu omwei okufeereera abantu boona.
OPeetero akwegaana oYesu omulundi ogukwekeera
(Mat 26:57-58; Mak 14:53-54; Luk 22:54)
15OSimooni Peetero nĘĽomwei oku beegesebwa, ni basengeerya oYesu. Olwakubba omwegesebwa oni yaali amanyiibwe oSaabakabona, yaingiire nĘĽoYesu omu lubuga lwa Saabakabona oyo, 16baitu oPeetero nĘĽalindira enzai oku mulyango. Omwegesebwa odi owondi eyaali amanyiibwe oSaabakabona nĘĽawuluka nĘĽabaza nĘĽomuzyana omulindi wa mulyango, nĘĽomuzyana nĘĽaingirya oPeetero.
17Omuzyana omulindi wa mulyango nʼabuulya oPeetero ati, “Weena oli omwei oku beegesebwa ba musaiza oyo?” OPeetero nʼairamu ati, “Bbe, tindi mwegesebwa waamwe.”
18Abairu nĘĽabalindi baali bawembere omuuro nibeemereire awo bakwota kubba obwire obwo bwali bwa mulombe. NĘĽoPeetero yaali ayemereire nabo nakwota.
OSaabakabona akubuulya oYesu
(Mat 26:59-66; Mak 14:55-64; Luk 22:66-71)
19Awo oSaabakabona nʼabuulya oYesu ebikukwata oku beegesebwa baamwe nʼoku kwegesya kwamwe. 20OYesu nʼairamu ati, “Nje nabazanga lwatu egiri buli muntu era ni nyegesyanga omu makumbaaniro oba mwiramyo, aBayudaaya egyebakumbaaniranga. Ndoowo kintu kyenabazire omwibbise. 21Alete lwaki mukumbuulya? Mubuulye abo abampuliiryanga. Mananu bamaite buli kyenabazire.”
22OYesu niyamaare okubaza ebyo, omwei oku balindi ba iramyo eyaali ayemereire ampi nʼamupaaya omu busyo. Nʼamubuulya ati, “Eni nigyo ngeri gyoiramu oSaabakabona?” 23OYesu nairamu ati, “Niwaabba niwaliwo ekigambo kyembazire ekitaikire, kindange. Baitu ninaabba mbazire ekiikire, lwaki ompaayire?”
24Awo Anasi nĘĽasindika oYesu ewa Kayaafa, oSaabakabona.
OPeetero akwegaana oYesu omulundi ogwakabiri nĘĽogwakasatu
(Mat 26:71-75; Mak 14:69-72; Luk 22:58-62)
25Omu kiseera ekyo oSimooni Peetero yaali acaayemereire awo nakwota omuuro. Abamwei oku baali beemereire awo ni bamubuulya bati, “Weena oli omwei oku beegesebwa baamwe?” Ye ni yeegaana nakukoba ati, “Bbe, tindi mwegesebwa waamwe.”
26Baitu omwei oku bairu ba Saabakabona, nga waluganda lwa musaiza oyo oPeetero gweyasaareku okutwi nʼamulumiirya ati, “Tinakuboine naye nimuli omu ndumiro ya misaale gyʼoliva?”
27OPeetero nĘĽairamu niyeegaana, era omu kaire ako, onkoko nĘĽakooka.
OYesu omu maiso ga Piraato
(Mat 27:1,2,11-14; Mak 15:1-5; Luk 23:1-5)
28Awo abeebemberi bĘĽaBayudaaya ni baiya oYesu ewa Kayaafa ni bamutwala omu kikaali kya mufugi oMurooma omu kibbambya. Obutasiisa murwa gwa kweyerya, abeebemberi bĘĽaBayudaaya tibaingiire mu kikaali kubba baayenderye balye oBugenyi bwa Kwakalibwaku.
29Olwʼekyo oPiraato nʼayaba egyebali nʼababuulya ati, “Omusaiza oni mukumujunaana musango ki?” 30Ni bamwiramu bati, “Nataakubbaire na musango, titwakumuleetere egyoli.”
31OPiraato nʼabakoba ati, “Nywe mumutwale leke mumusaare omusango okusigikira oku mateeka gaanywe.”
Abeebemberi bʼaBayudaaya nibagaana nibakukoba bati, “Titulina buyinza bwa kwita muntu yeena yeena.” 32Kini kyabbairewo leke ebigambo ebikulanga enfa yaamwe, oYesu byeyabazire, biikiire.
33OPiraato niyaireyo omu kikaali, nʼayetesya oYesu nʼamubuulya ati, “Niiwe mukama wʼaBayudaaya?”
34OYesu nʼamubuulya ati, “Ekyo kirowoozo kyamu kanda aliwo ambazireku egyoli?” 35OPiraato nʼamubuulya ati, “Nje ndi Muyudaaya? Abantu ba iyanga ryamu nʼabakabona abakulu nibo baakundeeteire. Wairye musango ki?”
36OYesu nʼairamu ati, “Obukama bwange tibwa ku nsi kuni. Nikyakubbaire kityo, abaweereza bange baakulwaine okulemesya abeebemberi bʼaBayudaaya okunkwata. Obukama bwange ti bwa mpani.”
37OPiraato nʼamubuulya ati, “Nikwo okukoba oli mukama?” Awo oYesu nʼamwiramu ati, “Nka nobazirembe nimwo ndi. Mananu, nabyairwe ni nyiza omu nsi kumanyisya mananu. Buli abba omu mananu ampuliirya.”
38OPiraato nʼamubuulya ati, “Amananu nikyo kiki?”
OPiraato niyamaare okubuulya ekyo, nʼawuluka omulundi ogwakabiri nʼayaba egiri abeebemberi bʼaBayudaaya nʼabakoba ati, “Tinkubona nsonga yoona yoona gyenkusigikiraku okumujunaana. 39Baitu mwamanyiriire nje okubataisiryanga omubbwe omwei oku Bugenyi bwa Kwakalibwaku. Mukwendya mbataisirye omukama wʼaBayudaaya?”
40Ni bairamu nibakukokooma bati, “Bbe, otatutaisirya oyo, tutaisirye Balaba!” (OBalaba yaali nabbwerwe olwa kwemigira omu kwegunga.)
Currently Selected:
Yokaana 18: RUULI-NYALA
Highlight
Share
Copy
Want to have your highlights saved across all your devices? Sign up or sign in
