Yokaana 20
20
Okuyimbooka kwa Yesu
(Mat 28:1-8; Mak 16:1-8; Luk 24:1-12)
1Ekiro ekiiriira eSabbiiti, omu kibbambya nibucaali kubonia, oMalyamu Magudaleena nʼayaba oku mbi nʼabona ngʼeibbaale rigalanzwirwe okuzwa oku mulyango gwa mbi. 2Olwʼekyo nʼairuka nʼayaba ewa Simooni Peetero nʼomwegesebwa odi oYesu gweyayendyanga omuno nʼabakoba ati, “OMukama waiswe bamwiyire omu mbi era titumaite gyebamutaire!”
3Amangu ago oPeetero nʼomwegesebwa odi ni baaba oku mbi. 4Bakali babiri ni bairuka baitu omwegesebwa odi owondi nʼasinga oPeetero okwiruka nʼamwekeera okwika oku mbi. 5Nʼainama nʼasungeerya omu mbi nʼabona ngʼengoye za liiri ziri awo, baitu ye tiyaingiire.
6OSimooni Peetero eyaali akumuzwaku ennyuma niyaikire nʼaingira omu mbi yeena nʼabona engoye za liiri niziri awo; 7nʼabona nʼekitambaala ekyali kibbwerwe oku mutwe gwa Yesu. Ekitambaala kini kyali kitatairwe amwei nʼengoye baitu kyali kizingirwe nikitairwe kyonkai. 8Awo nʼomwegesebwa odi owondi eyeekereire okwika oku mbi ale yeena nʼaingira era niyaroore nʼaikiriza. 9(Baali bacaali kweteja ekyawandiikiibwe ekikoba nti oYesu yaali nateekerwe okuyimbooka.)
10Awo abeegesebwa ni bairayo gyebaabbanga.
OYesu akubonekera oMalyamu Magadaleena
(Mat 28:9-10; Mak 16:9-11)
11OMalyamu yaali ayemereire enzai wa mbi nakukunga. Niyaali acaakunga, nʼainama nʼarola omu mbi, 12nʼabona abamalaika babiri abazwaire engoye ezikwera, nibaikaliire omu kifo omulambo gwa Yesu wegwali, omwei emisago nʼowondi emirambi. 13Abamalaika ni babuulya omukali bati, “Mukali we, okukungira ki?” Yeena nʼabairamu ati, “OMukama wange bamutwaire era tinkumanya egyebamutaire!” 14Niyakamaare okubaza ati, nʼayinduka nʼabona oYesu nayemereire awo, baitu nateeteja nti niye Yesu. 15OYesu nʼamubuulya ati, “Mukali we, okukungira ki? Okutoolya naani?”
OMalyamu yaali akulowooza nti oni yaali mukama wa ndumiro, era nikyo yamukobeire ati, “Sebo, niwaabba wamwiyirewo, nkobera egyewamutaire nyabe mmutooleyo.”
16OYesu nʼamukoba ati, “Malyamu!” Awo oMalyamu nʼayindukira gyali nʼamukoba omu Lwebbulaniya ati “Rabboni” (ekimakinyisya nti “Mwegesya”) 17OYesu nʼamukoba ati, “Otanyekwataku kubba ncaali kwirayo ewa Ite wange, baitu yaba omu baganda bange obakobe oti, ‘Nkwirayo ewa Ite wange era oIte waanywe, oKanca wange era oKanca waanywe.’”
18OMalyamu Magudaleena nʼayaba egiri abeegesebwa nʼabakoba ati, “Mboine oMukama!” Era nʼabasubiira nʼebigambo oYesu byamukobeire.
OYesu akubonekera aBeegesebwa baamwe
(Mat 28:16-20; Mak 16:14-18; Luk 24:36-49)
19Omu kasweko ka kiro ekikwekeera omu wiiki, abeegesebwa nibaali bakumbaine amwei omu nyumba nga nʼenyiige zibbwerwe olwa kutiina abeebemberi bʼaBayudaaya, oYesu nʼaingira nʼayemeera akati omu bo nʼabakoba ati, “Emirembe gibbe naanywe!” 20Niyamaare okubaza bini, nʼabalanga ebiganja nʼembaju zaamwe. Abeegesebwa nibaaboine oMukama ni basemeerwa muno. 21OYesu nʼairamu nʼabakoba ati, “Emirembe gibbe naanywe! NkʼoIte wange niyantumire, njeena nkubatuma.”
22Niyamaare okubakoba ebyo nʼabafuuwaku omwika nʼabakoba ati, “Mutunge oMwoyo Akwera. 23Nimwakusaasiranga omuntu yeena yeena ebibbi byamwe, ebibbi ebyo byakusaasirwanga, baitu nimutaabisaasirenge bikwiza kubbanga bitasaasiirwe.”
OYesu akubonekera oTomasi
24OTomasi, omwei oku beegesebwa baamwe eikumi nʼababiri ayetebwa Didimo (ekimanyisya nti “Mulongo”), tiyaali na baira baamwe oYesu weyaiziire. 25Abeegesebwa badi abandi ni bamukoba bati, “Tuboine oMukama!”
Baitu nʼabakoba ati, “Okutoolaku nimboine ebiwuta bya misumaali omu biganja byamwe; ni mbikuuwamu ekyala kyange era okutoolaku ninkwaiteku omu mbaju zaamwe, nzira kwikiriza.”
26Niwaakairewo ewiiki gimwei, era bwona abeegesebwa nibali omu nyumba nʼoTomasi, enyiige nizibbwerwe, oYesu nʼaingira nʼabeemeera akati nʼabakoba ati, “Emirembe gibbe naanywe.”
27Awo oYesu nʼakoba oTomasi ati, “Ta ekyala kyamu ani era rola omu kiganja kyange. Golola omukono gwamu okwate omu mbaju zange. Lekera awo okugulucaguluca era ikiriza.”
28OTomasi nʼamukoba ati, “Niiwe Mukama wange era oKanca wange!”
29OYesu nʼamukoba ati, “Oikiriize kubba omboineku; balina omukisa abaikiriza bataboineku!”
Ekigendeerwa kya kitabo kya Yokaana
30OYesu yakoore obubonero obwewuunyisya bwingi omu maiso ga beegesebwa baamwe, ebitaawandiikirwe mu kitabu kini. 31Baitu bini byawandiikiibwe leke mwikirize nti oYesu niye oKurisito, oMwana wa Kanca, era nimumwikiriza mwalitunga obwomi omu ye.
Currently Selected:
Yokaana 20: RUULI-NYALA
Highlight
Share
Copy
Want to have your highlights saved across all your devices? Sign up or sign in
