Evikholwa 15

Omukhung'ano kwa Ekanisa mu Yerusalemu

1Avanju valala vachula Yudea vanja okhwekesa avasiefwe avo vachi, “Nimuchakhewa okhulondana nende amalako ka Musa simunyala okhuwoniwa tawe.” 2Paulo nende Baranaba vayingana navo muno okhulondana nekhuwa elio mana vachoola Paulo nende Baranaba navanju vandi khuvali Antiokia mbo vachie Yerusalemu vawone avachumwa nende avasakhulu okhulondana nalio. 3Kho nivakhachumwa nekanisa, vavichira Foinike nende Samaria nivawola amakhuwa ka Avachali Avayahudi okhukoolera Nyasaye. Amakhuwa ako kasimisa avasiefwe muno. 4Olu vola Yerusalemu, vengisiwa nekanisa nende avachumwa alala navasakhulu mana vawola kosi aka Nyasaye kali navakholeye. 5Avasuvirwa valala avomukanda kwa Avafarisayo venyokha vawola, “Vienyekha mbo avanju Avachali Avayahudi vakhewe mana nundi valonde amalako ka Musa.”

6Avachumwa nende avasakhulu vakhola omukhung'ano okhulengera mwikhuwa lino. 7Ni vakhava namalomaloma amangi, Petero kenyokha kavawolera, “Vasiefwe, mumanyire mbo munyinga chiakhale Nyasaye kanjawula okhuchula mwinywe mbo okhuvichira khumunwa kwange, Avachali Avayahudi volane okhuwulira ekhuwa lia Injili mana vasuvire. 8Mana Nyasaye omanyire amaparo ka wulimunju kekesa mbo aveyamire, kavawa Roho Muchwenufu nga kachuweresa efwe. 9Sikawukhaniakho akachi wefwe navo ta, kachwenula emioyo kiawe mwisuvira. 10Khanu sikira sina nimwenya okhutema Nyasaye nimucha owusicho khumikongo kiavalondi, owusicho owu avakuka vefwa sivawukingakho ta, nundi fwesi khuchawukingakho ta? 11Nausa khusuvira mbo khuchia okhuwonisiwa wusa nganivo okhuvichira mumbavasi chia Omwami Yesu.”

12Omukhung'ano kwosi kwawulera, vachekeresa Baranaba nende Paulo nivawola khuvimanyiro nende amangayimwa aka Nyasaye kali nakholire okhuvichira khunivo mu Avachali Avayahudi. 13Nivakhamala okhulomaloma, Yakopo kachipa, “Vasiefwe njekerese, 14Simoni kawola nga Nyasaye kakenderera Avachali Avayahudi, okhuvichira khukhuchoola omunju mulala khunivo ave wuwe. 15Kano kafukirisania nende amakhuwa kavanabii nga kaandikwa,

16‘Kano nikakhavicha njia okhukoola,

mana njia okhwombakha owuyakha owumenyo wa Daudi owakwa.

Enjia okhucheresa amakunda kakwa,

mana ekombakhe owuyakha,

17mbo avanju vosi vatakhekho Omwami,

alala nende Avachali Avayahudi avalangwa mulicha liange,

18Omwami awola, owalonga evinju vino viosi viamanyikha okhuchula khale.’

19Khanu ese khalaka mbo khuchanyasa Avachali Avayahudi avacha khu Nyasaye ta, 20Nausa khuvaandikire ebarua khuvakanie okhulia eviokhulia evianirwe khuvifwananie ta. Khuvakanie esifwavi siowuheyi, nundi vachalia esolo yosiyosi eyemikire namwe okhunywa amalasire tawe. 21Esikira mbo okhuchula khale amakhuwa ka Musa kakherwachwa muwuli etookho nende avo avamwirwacha, sikira asomwa mumasinagogi wuli lutalo lwesabato.”

Ebarua yichira Avaerwa vachali Avayahudi

22Khanu avachumwa navakhulunju, nende vosi avali mukanisa vawona mbo wulayi vachoole avanju okhuchula munivo vavachume Antiokia alala nende Paulo ni Baranaba. Vachuma Yuda Barsaba nende Sila, avemirisi muvasiefwe. 23Vakinga ebarua yino: “Avasiefwe vosi, nikhulimo avachumwa nende avakhulunju, khuchuma emirembe khu Avachali Avayahudi avali Antiokia, Siria nende Kilikia, mulembe vosi. 24Khwawuliye mbo avanju valala vachulire mwifwe vacha okhuvanyasa namakhuwa aka khuchavachumire ta. 25Khulwako, fwesi alala khweyamanire khwawona mbo wulayi khuvachumire avanju alala navasime vefwe Baranaba nende Paulo, 26avacha owulamu wawe muwuyimwa khulwa Omwami wefwe Yesu Kristo. 27Khanu khuvachumiye Yuda nende Sila mbo vavawolere nomunwa amakhuwa akakhuandikire kano. 28Roho Muchwenufu alala nafwe khuwene mbo siwulayi khuvachekho omusiko kundi omukali tawe, nausa akenyekha: 29muchalia siosisiosi esitisiywe evifwananie ta, muchalia amalasire nende esolo yosiyosi eyi vamikire ta, mana mulekhane nesifwavi. Nimulekhana nakano munachianakana owulayi. Khuvenyera amalayi.”

30Nivakhasewulwa vavichira Antiokia vawusa avawule alala mana vavaweresa ebarua eyo. 31Olu vaisoma, vechula owusimi khulwekhuwa elio eliokhuvatinyirisa. 32Yuda nende Sila, avali avanabii, vawolera avasiefwe amakhuwa amangi akokhuvatinyirisa nokhuvawa amaani. 33Olu vali nivakhekhalao khulwevise violanire, avasiefwe va Antiokia vavasewula nemirembe mbo vakoolere avali nivavachumire. [34Sila kawona mbo wulayi asikaleyo.] 35Paulo nende Baranaba navandi avangi, vasikala Antiokia nivekesa nokhwirwacha ekhuwa lia Omwami.

Ekawukhana lia Paulo nende Baranaba

36Enyinga ni chiakhavichakho, Paulo kawolera Baranaba, “Yicha khukooleyo, khukenderere avasiefwe muwuli etookho elikhwerwachamo ekhuwa lia Omwami, khuwone mbo vachianakana vachie.” 37Baranaba kenya mbo vachie nende Yohana oyu valanganga vachi Mariko. 38Paulo kawola achi siwulayi okhuwukula omunju wali naverukhire olu vali Pamfulia ta, nundi sikali nachiye navo khumilimo ekio ta. 39Vamala vakhayana ne vakawukhana. Baranaba kawukula Mariko vachia naye musialo sia Kupro. 40Paulo naye kawukula Sila, olu avasiefwe vali nivakhamusavira ekhavi nowulindi wa Omwami, vamala vachekukha. 41Kavichira Siria nende Kilikia natinyirisa amakanisa.

Currently Selected:

Evikholwa 15: LNTPP

Highlight

Copy