Evikholwa 14

Paulo nende Baranaba nivali Ikonio

1Khanu olu vali Ikonio, vamala vengira musinagogi ya Avayahudi mana valomaloma muwungi vialomba avanju avangi nivalimo Avayahudi nende Avagiriki vasuvira. 2Nausa Avayahudi vachasuvira valecha owuchwanjwania muvanju Avachali Avayahudi mana vavonona enganakani mbo valekhane namakhuwa ka avasiefwe avo. 3Khanu vekhalayo khulwesikha esileyi nivalomaloma namaani khulwomwami. Omwami naye kekesa mbo amakhuwa aka vawolanga okhulondana nesisa sisie kali kang'ali okhuvichira evimanyiro nende amangayimwa aka vakholanga. 4Avanju vetookho elio vamala vakawukhana, valala veyamana nende Avayahudi navandi valonda akavachumwa. 5Avayahudi nende Avachali Avayahudi alala navemirisi vawe vatema mbo vavawe esinyasio mana vavakhupe amakina vaveche, 6olu avachumwa vawulira vachio verukha vachia mumatookho ka Listra nende Derbe akali Lukaonia nende muvialo viaambi ao. 7Eweneyo yosi verwachayo Injili.

Paulo nende Baranaba Nivali Listra nende Derbe

8Listra eyo omunju mulala kaliyo owakwa ekacha okhuchula wana mana sikali nanyala okhukenda tawe. 9Kekhala ao kachekeresa Paulo nalomaloma. Olu Paulo kamulengera wulayi wene, kawona mbo ali nesuvira mana anyala okhuwonisiwa. 10Kawola nomwoyo kwamukulu, “Yinyokha weme khumakulu kako.” Kenyokheramo mana kanja okhukenda. 11Olu avanju vawona ako vanja okhukhupa oluyoka mululomo lwawe Olukawonia, nivawola, “Avanyasaye vachwichiye mukondo liavanju!” 12Valanga Baranaba vachi Zeu, ne Paulo naye vamulanga vachi Herme, esikira mbo njowali omulomalomi mukali. 13Omukuhani wa nyasaye Zeu, oyu Etemperi lilie liali wusa alwanyi wetookho elio, kalecha eng'ombe nende amauwa musiriwa sietookho nikenya okhukhola esitiso alala navanju khuvachumwa. 14Olu avachumwa Baranaba nende Paulo vawulira akavali nivenya okhukhola, vosula enguo chiawe vekhupa musituma nivalira. 15“Vanju enywe, mbo sina nimukhola kano? Efwe fwesi khuli wusa vanju ngenywe, mana khuvalecheye amakhuwa malayi mbo muchule muvinju via wusa vino, mukoolere Nyasaye olimwoyo, owalonga ekulu nelova, alala nenyanja nende viosi evilimo. 16Munyinga chia khale kalekhula wulisialo siakhola akasienya, 17nausa sikalekhakho okhweyekesa khwinywe ta. Kachianakana okhuvakholera amalayi, kavawa efula okhuchula mwikulu nundi kavawa nende enyinga chieviamo. Kechusa esiokhulia nende owusangafu mumioyo kienywe.” 18Ata nivakhawola amakhuwa kano, sivialikho eviangu okhukania avanju okhuvakholera esitiso ta.

19Avayahudi valala vachao okhuchula Antiokia nende Ikonio vaveyeresia avanju vasangana navo vakhupa Paulo amakina mana vamukhwesulula vamuchusa erwanyi wetookho elio nivapara vachi afwiye khale. 20Nausa olu avalondi vacha aakali, kenyokha kengira mwitookho; ne olutalo lwalondakho vachia nende Baranaba mwitookho lia Dabe.

Okhukoola mwitookho lia Antiokia, Siria

21Olu vali nivakherwacha Injili mwitookho omwo, nundi nivakhanyola avalondi avangi, vamala vakoola Listra nende Ikonio mana vachia Antiokia. 22Vatinyirisa emioyo kiavalondi nokhuvawolera mbo vachianakane mwisuvira, vavawolera mbo kenyekha wusa khuvichire musinyasio kho khwingire muwami wa Nyasaye. 23Olu vali nivakhavawulira avasakhulu muwuli kanisa, okhuvichira mwisala nende okhweyimana okhulia, vavayira emberi wa Omwami oyu vasuvira.

24Vamala vavichira musialo sia Pisidia vola Pamfulia. 25Verwacha ekhuwa awunju mbo Perga vakerao vachia Atalia. 26Okhuchula eweneyo, vachira mumeri vola Antiokia, eyi vali nivachaywe mumbavasi chia Nyasaye khulwemilimo eki vali nivakhamala. 27Olu volayo, vawusa ekanisa alala vavawolera kosi aka Nyasaye kali navakholeye, nundi nga kali nikekuliye Avachali Avayahudi omuliango kwesuvira. 28Vamala vekhala alala navalondi khusikha esileyi.

Currently Selected:

Evikholwa 14: LNTPP

Highlight

Copy