Evikholwa 16

Timoteo Achia alala nende Paulo ni Sila

1Paulo kamala avichire Dabe nende Listra eyi kanyola omulondi mulala mbo Timoteo, omwana womukhasi Omuyahudi, ne yesi kali kasuvira. Papa wuwe naye kali Omugiriki. 2Timoteo kali nefuma engali muvasiefwe vali Listra nende Ikonio. 3Paulo kava nelienya mbo Timoteo achie naye, ne kamukheva sikira Avayahudi vosi avali musialo omwo vali vamanya mbo papa wa Timoteo kali Omugiriki ne sikenya vanyakhane mumioyo ta. 4Nga vakendanga mumatookho ako, vaweresanga avawule veweneyo amalako aka avachumwa navasakhulu vali vafukiriye nokhulakirisa mbo vakalonde. 5Amakanisa kachianakana okhwomira mwisuvira, mana vametekhanga wusia nawusia.

Paulo Awona Elola nali Troa

6Vavichira embeka chia Frugia nende Galatia, sikira Roho Muchwenufu kali avakanisie mbo vacherwacha ekhuwa mu Asia tawe. 7Olu vola khulwakho lwawunju mbo Musia, vatema okhuchia awunju mbo Bithunia, nausa Roho wa Yesu sikavasiwula vachieyo tawe. 8Khanu olu vavicha Musia, vachia mwitookho lia Troa. 9Amalola kachira Paulo musiro: kawona omunju mulala owa Makedonia kemire emberi wuwe namwesaya nokhuwola, “Sima wambukhe Makedonia ochukhonye.” 10Olu kali ni kakhawona amalola ako, khwenyokha lwangulwangu khwachia Makedonia, khwamanya wusa mbo Nyasaye kali achulangire mbo khwirwachire avanju veweneyo Injili.

Okhuwoniwa khwa Ludia nivali Filipi

11Nikhuchula mwitookho lia Troa khwachira muliacho mana khweteka mwikinga lia Samothrake. Olutalo lwalondakho khwachia mwitookho lia Neapoli. 12Okhuchula eweneyo khwachia Filipi, etookho ekali elia Makedonia eyali yichukwa nende Avaroma. Khwekhala mwitookho elio khunyinga chiolanire. 13Olutalo lwesabato nilwakhola, khwachulira mumuliango kuli aambi nomwalo, aa khwapara mbo Avayahudi vawukananirangao khulwesala. Khwekhala aasi kwanja okhulomaloma nende avakhaye vali nivewusiseo. 14Mulala khu avachuchekeresa kali omukhasi mulala owalangwa Ludia, okhuchula mwitookho lia Thuatira. Kakholanga owukhala wokhukusia enguo chioluyali, echierangi yesambarau mana kenamiranga Nyasaye. Omwami kekula omwoyo kukwe keyama amakhuwa aka Paulo kali nawola. 15Niye alala nende avenju yiye nivakhavatiswa, kachwesaya nawola, “Nimuwene mbo ndi musuvirwa emberi wa Omwami, yiche mwikhale munju yange.” Kamala kavengisa munju wuwe.

Paulo nende Sila Musiwoo

16Olutalo lulala nga khwali nikhuchia awunju aakhusaliranga, khwawukanana nende omukhana muambe mulala owali nende roho yowufumu mana kalecheranga avakali vave owukhala owukali khulwokhulakulanga avanju navawolera akacha emberi. 17Kalonda khu Paulo ninafwe nayokera nokhuwola, “Avanju vano vakhalavani va Nyasaye Owamukulu Muno, vanaverwachiranga engira yokhunyola owuwonia.” 18Kakhola achio khulwenyinga enyingi okhwola Paulo kasinyikha mana kakalukhana nokhuwolera roho eyo, “Khualavira mulicha lia Yesu Kristo mbo omuchulemo lwangu!” Siamuchulamo evise vienevio. 19Olu avakali vave vawona mbo owunyolero wawe wukochire, vatira Paulo nende Sila vavakhwesulula vavacha awulafu emberi wavami. 20Olu vavosa emberi wavayaali vawola, “Avanju vano Vayahudi mana vananyasanga etookho liefwe. 21Vanekesanga emima eki Avaroma khuchenyekha khweyame nao khukilonde tawe.” 22Esituma siavanju siemetakho okhuvatula, avayaali vavosula enguo chiawe mana vasiwula avanju vavakhupe nesimbo. 23Nivakhavakhupa wuvi wene, vavayira musiwoo vawolera owesiwoo avalinde owulayi. 24Olu kawulira esikhalako esio, kavengisa musiwoo siomukachi mana kavawoa amakulu kawe khusiiro chiali musiwoo omwo.

25Niyenya khwola musiro akachi, Paulo nende Sila vali vasala nivemba enyembo chiokhufumia Nyasaye avawoe vandi nivavachekeresa. 26Awene nawene, esialo siachenga okhwola siachengesa esiwoo. Awene nawene, emiliango kiesiwoo kiekukha kiosi ne emikoye kiali nikivawoyire kiosi kikangulukha. 27Omukali wesiwoo olu kenyokha kawona emiliango kiesiwoo nikikukhire, kachusa olung'esi lulwe katakha okhweyicha omwene napara achi avawoe verukhire. 28Paulo kayula, “Ochewumisa tawe, khuli wusa muno fwesi.” 29Kalangirisa vamulechere etaa mana katima kengira, kakwa Paulo nende Sila mumakulu nariye nokhuchenga, 30kavachusa erwanyi nokhuwola, “Avakali, ese kholanjie khomboniwe?” 31Vamuwolera, “Suvira mu Omwami Yesu mana onawoniwa alala nenju yiyo.” 32Vamuwolera ekhuwa lia Omwami alala nende vosi avali munju yiye. 33Kavawukula evise vienevio eviesiro, kavoka amakonjo kawe mana kamala kavatiswa evise evio alala nende enju yiye yosi. 34Kavayira munju wuwe, kavalechera esiokhulia mana kekhoya alala nende avenju yiye mbo asuviye mu Nyasaye.

35Olu yola musiteche, avayaali vachuma avamahe nivawola, “Lekhula avanju avo vachie.” 36Omukali wesiwoo kawolera Paulo amakhuwa ako, “Avayaali vachumanisie mbo khuvalekhule muchie, khanu chule muchie mumulembe.” 37Paulo kavawolera, “Vachukhupire awulafu ne sivachunyoyekho nekoso ta, nefwe khuli Avaroma. Ne nundi vachuchaye musiwoo ne khanu venya okhuchulekhula muwekisi! Efwe ta, lekha vache wusa avene vachuchuse.” 38Avamahe vayira amakhuwa kano khuvayaali mana varia muno olu vawulira mbo avanju vano vali Avaroma. 39Vacha vavasava owulekheri khovavachusa erwanyi nokhuvasava mbo vachule mwitookho omwo. 40Vachula musiwoo mana vachia munju ya Ludia. Eweneyo valomaloma nende avasiefwe nivavatinyirisa kho vamala vachekukha vachia.

Currently Selected:

Evikholwa 16: LNTPP

Highlight

Copy