Obufwimbuli 20
20
Emiyika echio eshikhumila
1Mana ndalola malaika undi niyeekha okhurula mwikulu, nali neshibohololo shiobuko tsana, nende omunyololo omukhongo mumukhonokwe. 2Nahamba okuyokha, inzokha eyo yakhale, niyo Ibilisi, khandi Setani; namuboha emiyika eshikhumila, 3namusukuna mubuko tsana, nabwikala, nabuboha ikulu, mbu arakaatia amahanga khandi ta, okhuula olwa emiyika echio eshikhumila chiakhaba nichihweele; mana olunyuma lwa ako aliba nakhoyile okhubohololwa eshisekhwo.
4Mana nindola ebifumbi bioburuchi, nende abo abali nibeekhaalekhwo; nabo nibaheebwa bunyali okhuyaasia. Khandi nindola emioyo chia abo abali nibaremwa emirwe khulwa oburumbusi bwaYesu, khandi khulwa likhuwa liaNyasaye, nende echia abo abareenamiile isolo eyo kata eshifwanani shiayo ta, kata okhureebwakhwo eshimanyilo eshio khubweni bwabwe kata khushikalo shiomukhono ta; nabo nibalamukha, nibaruka halala nende Kristo emiyika eshikhumila. 5Abandi abokhubafwa shibalamukha ta, okhuula olwa emiyika echio eshikhumila chiba nichihweele. Khuno nikhwo okhulamukha okhwambeli. 6Omundu yesi ousanjila khukhulamukha khwambeli noweikhabi, khandi nomutakatifu; okhufwa khwakhabili shikhuli nobunyali bwosi khubeenabo ta; nebutswa balaba abakuhani baNyasaye nende baKristo, nibaruka ninaye halala emiyika eshikhumila.
7Ne olwa emiyika echio eshikhumila chilaba nichihweele, Setani alabohololwa arule mumbohe; 8ne alarula natsia okhukaatia amahanga akali mutsikoona tsine tiosi tsieshialo, banga Gogu nende Magogu, mbu bakhung'aane halala okhuseera lihe; nabo obunji bwabwe bwingana obunji bwomuyeshe kwokhulukuku Iweinyanza. 9Nibatikulukha nibaama khububambalifu bwosi bweshialo, nibabotokhana ikambi yabatakatifu tsimbeka tsiosi, nende litookho elo liheelwaomulilo nakwo nikwikha okhurula mwikulu, nikubalia. 10Naye Setani, owali nabakaatiye, nasukunwa munyanza eyo yomulilo namalesi keshiberiti, omwa isolo yosi nomunabii wobubeeyi bali; ne balasaalisibungwa eshilo neshiteere, ebisoni nebisoni.
Obuyaasii oburula khushifumbi shioburuchi
11Mana ndalola eshifumbi shioburuchi eshilafu eshikhongo, nende oyo owali niyeekhaalekhwo, owa eshialo nende likulu biilukhanga imbeliwe nibikhama; kata habundu wabio shihatong'akhwo ta. 12Nindola abafwa, abakhongo nabatuutu bosi, nibasinjiile imbeli weshifumbi shiobuyaasii, ebitabu nabio nibibambulwa. Khandi eshitabu shindi nishibambulwa; nashio nishio eshiobulamu. Abafwa nabo nibayaasilibwa amakhuwa akali nikandiikwa mubitabu ebio, shinga ebikhole biabwe olwa bialinji. 13Inyanza nayo yalekhuula abafwa abali muyo; nabio oluumbe nende Makombe nibilekhuula abafwa abali mubio; nibayaasibwa, buli mundu ebikholebie shinga olwa bialinji. 14Nabio oluumbe nende Makombe biasukunwa munyanza eyo yomulilo. Khuno nikhwo okhufwa khwakhabili, mbu inyanza eyo yomulilo. 15Kata omundu yesi ouranyoolekha niyahandiikwa mushitabu shiobulamu ta, yesi yasukunwa munyanza yomulilo.
Currently Selected:
Obufwimbuli 20: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
