Obufwimbuli 17
17
Eshiina shiomutamba omukhongo
1Mana mulala owokhubamalaika abo musaafu abali nibali nende tsindaabo musaafu niyeetsa, nasungana ninasi, niyamboolela ari Yitsa hano, ekhumanyie eshiina shiomutamba omukhongo oyo owikhaale hekulu khumatsi amanji. 2Abaruchi beshialo baheya ninaye; kata abo abamenya mushialo bameelela idivai yobuheyibwe. 3Niyanjinga muRoho niyambila mushitsiimi; nindola omukhasi niyeekhaale khusolo inzakhanyu eyali niyiitsuulemwo ameera kamanyeko, niyili nemirwe musaafu netsinzika ekhumi. 4Omukhasi oyo yali niyeefwalile tsingubo tsieisambarau, netsiranzayi, niyeesiayile ebieitsahaabu, netsinyuma tsiobukusi obutinyu, netsilulu; yali neshikombe shieitsahaabu mumukhono eshieetsulamwo ebisinyo nende emisilo chiobuheyibwe. 5Ne khubwenibwe eliira liahandiikwa, elili neshisina shiamabiswi; mbu BABELI LIKHONGO, NYINA ABATAMBA NENDE EBISINYO BIOSI BIOMUSHIALO. 6Nindola mbu omukhasi yali nameelile amabanga kabatakatifu, khandi amabanga kaabo abarumbula akobuloli khuYesu. Ne olwa ndamulola, ndahuka okhuhuka khwamakana.
7Malaika oyo niyareeba mbu Ohukanga mbushiina? Nekhuboolele akelibiso liomukhasi oyo, nende elieisolo eya aniinilekhwo, eyili nemirwe echio musaafu netsinzika ekhumi. 8Isolo eyo eya oluutsi yalinjiho mwoyo, ne bulaano shiyiliho ta; ne yili okhutikulukha okhurula mubuko niyitsia mubutibi. Nabo abamenya mushialo, abo aba ameera kabwe karahandiikwa mushitabu shiobulamu okhurula khumusuule ta, balahuka olwa balalola isolo, shinga olwa yalinjiho, ne bulaano shiyiliho ta, ne yili okhwitsa.
9Hano naha omwoyo kwobuchesi kwenyelungwa. Emirwe echio musaafu nichio ebikulu musaafu ebia omukhasi yeekhaalekhwo; 10khandi nichio abaruchi musaafu; baraano khubo bamala okhukwa; mulala bulaano arukanga; oundi ashili okhwitsa; ne olwa aleetsa, akhoyile okhubaho eshise eshitiiti. 11Nayo isolo eyalinjiho, ne bulaano niyiraliho ta, yo neyomunaane; khandi yili khumusaafu abo; nayo yitsia mubutibi. 12Natsio tsinzika ekhumi etsia oluutsi, nitsio abaruchi ekhumi abarashialiakhwo obwami ta; ne baheebwa obunyali bwoburuchi halala nende isolo eyo, eshise shieisaa ndala. 13Abo bali namapaaro malala; ne balaheelesia isolo eyo obunyali bwabwe nende oburuchi bwabwe. 14Balaseera Likondi; naye Likondi alabahula, shichila niye Omwami wabaami, khandi Omuruchi wabaruchi; nende abo aba ali ninabo, abalanje khandi abalobole khandi abeesiikwa, bosi bala hula.
15Mana niyamboolela ari Amatsi aka oluutsi, aha omutamba oyo yeekhaale, niko abandu, nemikanda, namahanga, nende tsinimi. 16Natsio tsinzika ekhumi etsia oluutsi, halala nende isolo tsana, ebio bilamukiya omutamba oyo, nibimukwisia omubisandu, abe eshihechenye; bilalia bulia inyama yomubilikwe nibimusamba nomulilo pe. 17Shichila Nyasaye yabiitsusia okhukhola aketsiyemitsie, mbu okhuba ebiamapaaro malala, nibiheelesia isolo eyo obwami bwabio, okhuula olwa amakhuwa kaNyasaye kakhaba nikoosiibwe. 18Naye omukhasi owa oluutsi niye litookho elo likhongo, elirukanga abaruchi beshialo.
Currently Selected:
Obufwimbuli 17: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
