Yuda 1
1
Lishiesio
1Eyirula khuYuda, omusumba waYesu Kristo khandi omusiani wabwe Yakobo; yule khubalanje, abaheelwa muNyasaye Seefwe, nibabiishilwa Yesu Kristo.
2Tsimbabasi nomulembe nobuheeli bimeeteshenje khwinywe.
Eshiina shiabeechesia bobubeeyi
3Abaheelwa banje, olwa ndali nindeemanga neshinani okhumuhandiichila khumakhuwa kobuhonia obwa khusanjilanilangamwo, kambachia okhumuhandiichila nimuchesiyia okhulwanila obusuubili obwakaamilwa abatakatifu lulala lwonyene. 4Okhuba baliho abandi abeenjiile mabiswi, ne nibo aba khale bahandiichilwa eshiina shino; nabandu abaramuria Nyasaye ta, abakwisia obukoosia bwaNyasaye weefwe obwilaasi, nibeeyambakhana oyo ouli Omwami weefwe khandi Nabongo yenyene, mbu Yesu Kristo.
5Ne bulaano enzenya okhumwitsusia, kata olwa mumalile okhukamanya, shinga Omwami olwa yahonia lihanga liabandu nabarusia mushibala shiaMisiri, mana olunyumakhwo nabatibia abo ababula okhusuubila. 6Kata abamalaika abaratong'a muburuche bwabwe ta, ne barula mubimenyo ebiali ebiabwe, yababiishila eshiina shieinduukho eyo ikhulundu, mumbohe yobumeli, hasi weshiilima. 7Khandi kario Sodomu naGomora namatookho kandi akarondokhanaho olwa beehaana bario khubuheyi nobwilaasi bundi obucheni bwomubili, bareebwa imbeli weefwe mbu babe eshilolelo, khulwa obukuumwi bwabwe bwomulilo kwobumeli.
8Nebutswa bano bosi bario; khulwa amalooro kabwe boonooninjia omubili, nibaleka oburukwi, nibanyeka aboluyali. 9Nebutswa olwa Mikaeli, malaika omukhulundu oyo, yali nasoolananga nende Setani, nayinganila akomulambo kwaMusa, shiyatsaalikha okhumukhalachila eshiina shiobunyechi ta; habula okhuboola mbu Omwami akhukondeshele.
10Ne bano banyekanga amakhuwa kosi kosi aka bakorwa ebisina biako; ne akeenako aka bahulilanga shinga tsisolo nasolo etsibula obuchesi khulwa oburulanda bwabwe, mukeenako nimwo omwa batibilibwa. 11Woowe khubo! Shichila balonda khunjila yaKaini, ne khulwa inganga beelukha bwilukha mwikosa liaBalaamu, nibakorela munduli shinga Kora.
12Bano nibo abali ebiroonyelesi mumasabo keenywe kobuheeli olwa baliitsanga nineenyu halala; nabaayi abeeyaya abeene chiminiyai; nolucheka olubula ifula, oluchesibwa nomuyeka; nemisaala echiula khunduukho yachio, ne nichibula ebiamo, emifu shikhabili, echieehwa pe; 13namarunda amalulu akomunyanza akareekalilwa ta, akarusinjia ebifwimba-murwe shinga lifilo; netsinyininyini etsitiimatiimanga, ne eshia tsiabiishilwa inziayo neshiilima eshimali ti.
14Ne nibo aba Enoka, owali owolwibulo lwomusaafu okhurula khuAdamu, yalakulakhwo, naboola mbu Lole, Omwami witsile nemikanda chiabatakatifube ebikhumila nebikhumila, 15okhuyaasai bosi nokhubakhalachila ebiina bosi abaramuria Nyasaye ta khulwa ebikhole biabwe ebibula oburii ebia bakhola muburaria bwabwe, khandi khulwa amakhuwa amatinyu kosi aka aboonooni abaramuria Nyasaye ta bamufukuule ninako. 16Bano nibo ababuuluuli khandi abalilikanil; beeyila mubwikombi bwabwe; eminwa chiabwe chiboola amakhuwa amakhongo keisunga; beelanga mubandu khulwa okhwinyoolela ebindu.
Ameebaalo nakobuchesiyi
17Nebutswa inywe, abaheelwa banje, mwitsulile amakhuwa akaboolwa khale nabarume bOmwami weefwe Yesu Kristo 18shinga olwa bamuboolela bari Mushise shiobumaliilishi balibaho abakokonyi abachenda mubwikombi bwabwe nibarariitsanga Nyasaye ta.
19Bano nibo abaleeranga obukabukhani; nabomubili, ababula Roho. 20Nebutswa inywe, abaheelwa banje, mwiyumbashe khubusuubili bweenywe obuli obutakatifu, nimusaaya muRoho Omutakatifu; 21mwilindenje mubuheeli bwaNyasaye, nimulindiilila tsimbabasi tsiOmwami weefwe Yesu Kristo okhuula khubulamu bwobumeli.
22Baliho abakanakaninjia; mubabeele tsimbabasi; 23abandi mubayuulel mumulilo nimubahonia; abandi mubabeele tsmmbabasi noburii, nimukiya kata eshiifwalo eshilikhwo eshifwabwi shieshinamubili.
Okhusaaya okhuhelelesia
24-25Kho bulaano oluyali, nobukhulundu, nobunyali, nende oburuchi, bibe khu oyo ounyala okhumulinda muleshe okhwisichirala, nokhumusinjisia imbeli woluyalilwe aharali eshikha shiosi ta, mukhwikhoya okhukhongo; bibe khuNyasaye ouli mulala yenyene, Omuhonia weefwe, khulwa Yesu Kristo Omwami weefwe, okhurula olwa ebise biosi biali nibirashiabaho ta, nende bulaano, kata inziayo. Amina.
Currently Selected:
Yuda 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
