Tsitsabuli 147
147
Eyokhwitsoomia khulwa obukoosia bwOMWAMI khuYerusalemu
1Mumwitsoomie OMWAMI,
okhuba okhwimbila Nyasaye weefwe nokhumwitsoomia nokhulayi;
nokhukaasu; khandi obwitsoomii bukhoyeele.
2OMWAMI yoombakhanga Yerusalemu;
akhung'aasinjia abaIsiraeli abo abaarwa.
3Ahoninjia abo aba emioyo chiabwe chiyenguushile,
naboha amafumire kabwe.
4Abasinjia tsinyininyini obunji bwatsio;
atsikulikhanga tsiosi ameera katsio.
5Omwami weefwe nomukhongo; obunyalibwe nobukhongo;
obumanyilisiibwe shibuchelekha ta.
6OMWAMI aleetelela abasandi;
akwisia ababii hasi.
7Mumwimbile OMWAMI halala nokhuupa orio;
mumwimbile Nyasaye weefure mubukhana.
8Neniye oufuunikhanga amaleesi khwikulu;
oukasilinjia eshibala ifula; oumesinjia obunyasi khubikulu.
9Aheelesinjia tsisolo ebiliibwa biatsio,
kata nende ebisosole biamakhookho ebimutsiulila.
10Shiasangaalila amaani keifarasi,
kata ebilenje biomundu shibimuchamisia ta.
11OMWAMI achamanga abo abamuria,
abo abanaayilanga mubuheelibwe oburalilu.
12Yitsoomia OMWAMI, iwe Yerusalemu;
yitsoomia Nyasayewo, iwe Sayuni.
13Shichila atinyisinjia tsikolil tsiebilibwabio;
aheelesinjia abaanabo ikhabi mukari mwiwe.
14Aleeranga omulembe mushialoshio;
akhwikusinjia ingano indayi yene.
15Aruma iilakolie khushialo;
likhuwalie liilukhanga tsimbilo.
16Ahaananga itsaluchi eyiingana obwoya bwamakondi amalafu;
amiitsanga isakitu shinga likoshe.
17Afuubanga ibarafuye shinga tsimbungulusi;
niwina owakhanyala okhwema imbeli wobushindubwe?
18Aruma likhuwalie, nabisalulusia;
ahuutsia omuyekakwe, amatsi nikabira.
19Yamanyia Yakobo likhuwalie;
yamanyia Isiraeli aka yalachiiisia, nobukhalachibwe.
20Shiyakholela lihanga lindi liosi ario ta,
kata obukhalachibwe, shikabumanya tawe.
Mumwitsoomie OMWAMI!
Currently Selected:
Tsitsabuli 147: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
