Tsitsabuli 144
144
Eyokhusaba obuhonibwi nobukaasu
Itsabuli yaDaudi.
1OMWAMI, olwanda lwanje, yeetsoomibwe,
oweechesinjia amakhono kanje okhuseera,
netsinzala tsianje okhulasana.
2Niye obuheeli bwanje oburalilu khandi olukoba lwanje;
olukoba lwanje olwokhushikulu nomuhabini wanje;
ingabo yanje, khandi obwilushilo bwanje;
neniye oureetsanga abandu banje muburuchi bwanje.
3OMWAMI, omundu nishiina, iwe okhumupaarakhwo,
kata omwana womundu, iwe okhumwitsulilakhwo?
4Omundu yeengana omuuya;
tsindaalotsie tsili butswa eshiinikha eshibira nishihwaho.
5E OMWAMI, yinamia likulu, wishe;
otiilekhwo khungulu, natsio natsituume omwosi.
6Henusia oluhenu, nobasalaasia;
rusie ebiselebio, nobakoyaasia.
7Okhurula ikulu onyiile omukhonokwo;
ureesie, niumbonia mumatsi amanji,
mumakhono kabarende,
8aba eminwa chiabwe chiboolanga akobubeeyi;
omukhono kwabwe musaatsa nomukhono kwobukaatii.
9Nekhwimbile olwimbo oluyia, e Nyasaye;
nenyimbe nikhwitsoomilia mubukhana bwetsinzaha ekhumi.
10Neniye ounyalilanga abaruchi okhuhula,
oureesia Daudi omusumbawe.
11Ureesie khulukanga olubii, niumbonia mumakhono kabarende, aba eminwa chiabwe chiboolanga obubeeyi;
omukhono kwabwe musaatsa nomukhono kwobukaatii.
12Abaana beefwe abasooiiili beengane emimela echitendeema;
abakhaana beefwe nabo shinga tsisiilo etsiomukoona etsiabaatsilwa emitsu emikhulundu;
13ebiachi bieefwe bibe nibiitsuule, nibirulamwo imele yetsimbia tsiosi;
amakondi keefwe keebule ebikhumila, kata ebikhumila amakhumi, mubwayilo bweefwe;
14tsing'ombe tsieefwe tsiitsule bulayi, ne tsileshenje okhuhuusa;
tsimbungu tsileshe okhuhuliilikha muluyia.
15Nolweikhabi oluyia lwabandu oluli lurio;
toto, nolweikhabi oluyia lwabandu olwa Nyasaye wabwe niye OMWAMI.
Currently Selected:
Tsitsabuli 144: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
