Tsitsabuli 143
143
Eyokhusaba obureesibwi nobwimililwa
Itsabuli yaDaudi.
1E OMWAMI, ohulile okhusaaya khwanje;
oreche amarwi khukhusaaya khwanje;
mubwisiikwabwo ungalusie, nomubulunjishibwo.
2Oranzinjilila isie omusumbawo itookho ta;
okhuba mubali mwoyo abulaho ouli omulunjishi imbeliwo.
3Okhuba omusuku wayayiima;
watubuliile obulamu bwanje hasi;
wayamenyia habundu hamali ti, shinga abo abafwa khale.
4Niko akachila iroho yanje yatoreelela mwisie;
omwoyo kwanje mukari mwisie nikung'ang'aasibwa.
5Enzitsulila tsindaalo tsiakhale;
enganila khubikholebio biosi;
eyililisia khumilimo chiamakhonoko.
6Ekhukalishila amakhono;
omwoyo kwanje kuliibwa obuloho khululwo,
shinga eshialo eshihangalafu.
7E OMWAMI, ungalusiemwo bwangu; iroho yanje yihweelelela;
orambisa obwenibwo ta,
endeshe okhuba shinga abo abeekha mubuko.
8Embulile akobuheelibwo oburalilu mumabwibwi,
okhuba niwe owa ndisiikanga.
Umanyie injila eya ekhoyile okhuchendelakhwo,
okhuba ekhuchinguulila omwoyo kwanje.
9E OMWAMI, ureesie mubasuku banje;
ekhwilushila mbu umbise.
10Unzechesie okhukhola aka wenya; okhuba niwe Nyasaye wanje;
Rohowo omulayi yanzimilile habundu haleng'aafu.
11E OMWAMI, uninde khulwa eliiralio;
khulwa obulunjishibwo urusie mumatinyu.
12Khulwa obuheelibwo oburalilu obaakamie abasuku banje
nobatibia bosi abasandinjia;
okhuba endi omusumbawo.
Currently Selected:
Tsitsabuli 143: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
