Tsinjelo 7
7
Obuchesichesi bwomutamba
1Mwana wanje, linda amakhuwa kanje,
nobiikha amalako kanje obe ninako.
2Linda amalako kanje obe omulamu;
khandi ameebaalo kanje shinga indolelo yeimoniyo.
3Okabohe khunzalatsio;
okahandiiche khukhabaho khomwoyokwo.
4Boolela obuchesi mbu lwe oli mbootswa;
nolanga okhumanyilisia mbu Omwikho wanje.
5Kho bikhwikalile khumukhasi omuheyi,
khumutamba oulombelesia namakhuwake.
6Okhuba mushianzwi shieinzu yanje ndahenjela mumwanga,
7nindola mubeenabo abahuma amachesi,
ninzahukhasia mubasooliili,
omusooliili mulala ouhuma oburechelefu,
8nabiranga khumuhanda hamasanganjila ewa omukhasi oyo yamenya,
mana nalonda injila yokhunzuye,
9isi niyiiling'ananga, khubwiile,
mushilo, mushiilima ti.
10Ne lola, omukhasi yamwakaanila,
owifwalile ebiifwalo biomutamba, omupele mumwoyokwe;
11owobuyoka, owomurwe omuumu;
nebilenjebie shibiikhalanga munzuye tawe.
12Bulaano ali mumihanda, bulaano ali muluyia,
nakoneshelanga habuli masanganjila.
13Mana omukhasi tsana yamutiila, namutsunzuuna,
namuumila imoni, namuboolela ari
14Endi nomusango;
inyanga yino ehesiye ebiitsubo bianje.
15Khulwako erulile elwanyi okhukhwakaanila,
nikhuruna neshinani, ne ekhunyoolile.
16Enzalile eshitali shianje nemito emilayi,
netsingubo tsiemikhoosi tsieikitani yeMisiri.
17Enyululusiye eshitali shianje amalesi keshing'aari kamanemane, neisubili, nomutalasini.
18Chenda khunyalishe obuheeli okhuula olwa bushia;
khwisangaasilie obuheeli.
19Okhuba omwene taala shiali hango ta;
atsiile oluchendo lwehale.
20Atsiile neliboho liamapeesa mumukhono;
ne yakhachelele omwesi nikuhangalile.
21Khulwa amakhuwake amanji amabuulu achilanga nashiama,
namunichilisia nobulombelesi bwomunwakwe.
22Habwenaho omusooliili oyo aholola nalondakhwo,
shinga isurusi eyitsi mushisinzilo,
nohomba shinga imbongo eyitiilwa mushifuulwa,
23okhuula olwa olusele luchilasa tsolo mushini;
shinga iminyi eyiiyuulanga muluchili,
niyiramanya mbu nolukosia obulamu bwayo ta.
24Kho bulaano, baana banje, mumbulile,
nimurechelesia amakhuwa komunwa kwanje.
25Omwoyokwo kurashiama okhutsia khunjilatsie,
kata orakorela mumihandachie ta.
26Okhuba yafumira abanji nabakwisia;
yee, aba yeera nomukanda omukhongo.
27Inzuye neinjila eyitsia eMakombe,
eyikholomokha enabisika biokhufwa.
Currently Selected:
Tsinjelo 7: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
