Tsinjelo 6
6
Obuchesiyii okhwihaanya obukara nobubeeyi
1Mwana wanje, noba niwikholile omusingo khulwa owashio,
nikali iwe nende omurende mupataane amakhono;
2noba norecheelwe namakhuwa komunwakwo,
nohambilwa namakhuwa komunwakwo;
3kho bulaano okhole ori nanwa wihonokoshe, mwana wanje,
olwa wulile mumukhono kwowashio;
khola bwangu, otsie omulunyie owashio.
4Orafuchiilila tsimonitsio okhukona tsindoolo,
kata ebisiche okhurenjeetsa ta.
5Wihonokoshe shinga eshitsusu mumukhono kwomuyiitsi,
khandi shinga linyonyi mumukhono kwomurechi.
6Iwe omukara tsia khundukusi,
ohenje tsinjila tsiayo, mana ochesihale.
7Kata olwa yirali nomwami,
kata omunyapara, kata omuruchi ta,
8ne yiikasilinjia ebiliibwa biayo mushirumbi,
khandi yibunjelesinjia ebiokhulia biayo bwichesa.
9Iwe omukara, olakona okhuula liina?
Olabuukha liina mundoolotsio?
10Mbu orutoolo orutu, nokhurenjeetsa okhutu,
nokhwifumbeelela hatu khulwa okhuhuluukha;
11nindio obumananibwo bulakhwitsila shinga omunuuli,
nobutakhabwo shinga omundu owiboyile ebilasanilo.
12Omundu ourakaasila eshindu ta, omumayaanu,
achendanga naboola akobushiamu;
13asimilanga tsimoni, alolomelanga ebilenje,
khandi yeebaalanga netsinzala.
14Obukhayi buli mumwoyokwe, ahonjelanga okhurechekha amabii,
amiitsanga inzoka.
15Iihulwako amasilake kaleetsa meetsukhana;
alafunakwa meetsukhann, butswa ario oburahona ta.
16Biliho ebindu bisasaba ebia OMWAMI akiyanga,
yee, bili musaafu ebili eshisinyo khuye:
17mbu obuhenji bweisunga, olulimi olubeeyi,
namakhono akaraatsinjia amabanga kababula eshiuku;
18omwoyo okurechekhanga amayililisio amamayaanu,
nebilenje ebianguhanga okhwilushila amabii;
19omuloli omubeeyi ouboolanga akobubeeyi,
nende oyo oumiitsanga inzoka mubeebulani.
Obuchesiyii okhwihaanya obuheyi
20Mwana wanje, linda lilako liaso,
ne oralekha ameebaalo kamawo tawe.
21Okanyiche khatsotso mumwoyokwo,
nokaboha mwikosi.
22Olwa ochenda, kalakhwimilila;
nolwa okona, kalakhulinda,
nolwa osisimukha, kalaboolelana ninawe.
23Okhuba lilako nilio itaha;
nameebaalo niko obulafu;
nobulosheli bwobuchesiyinibwo injila yobulamu,
24okhukhulinda khumukhasi wabeene,
nende khukhulombelesia khwolulimi lomukhasi omuheyi.
25Mumwoyokwo oreekomba obulayi bwelikondolie ta;
kata orafuchiilila akhukhwese nebisichebie tawe.
26Okhuba omurungo kwomukhasi omutamba kuhela omukaate mulala,
ne omukhasi wabeene omuheyi ayiimanga obulamu bwene nobwene.
27Omundu yakhanyala okhuchinjila omulilo khushilifushie,
mana ebiifwalobie nibichweya okhuyia noho?
28Nohomba omundu yakhanyala okhuseena khumaanda akaang'alaale,
mana amalaaroke nikhachweya okhufululukha noho?
29Nindio ali owinjilanga omwa omukhasi wowashie;
ouba namutiilakhwo shiachweya okhukuumwa ta.
30Abandu shibaleka omwibi ta, naba niyeeba okhwiyikusia omwene olwa ali inzala.
31Nebutswa naba nanyoolwa, alakalusia eshimusaafu;
alarusia emiandu chiosi chiomunzuye.
32Nebutswa ouba naheya nomukhasi atakha oburechelefu;
oukhola ario yeeyonooninjia omwene.
33Alanyoola amakhupache, oluyalilwe nilwisibwa,
ne tsisonitsie shitsilasiliisibwa ta.
34Okhuba imbalikha yihambia omusaatsa oburima,
ne shialamubeela tsimbabasi khunyanga yeshikwoli ta.
35Shialafuchiilila eshiluuchi shiosi ta;
khandi shialahutsulukha ta, kata noba nohaana ebihaanwa ebinii.
Currently Selected:
Tsinjelo 6: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
