Tsinjelo 8
8
Obuchesi nobulayi, khandi nobwobumeli
1Obuchesi shibuchinga omwoyo noho,
okhuchimanyilisia nakhwo nikhuyiibukha?
2Habundu aheechingu hanjila,
khandi mumasanganjila, newa businjilanga.
3Habilibwa, habwinjililo bwelitaala,
habwinjililo bwemiliango, newa bulanjilisinjia.
4Abasaatsa inywe, ninywe aba enanganga,
omulango kwanje kuli khubaana babandu.
5O abahuma amachesi inywe, mumanyilisie obwitembelesii;
ninywe abayingwa, mube abarechelefu.
6Hulile, okhuba nemboole akakaasila elala;
mumunwa kwanje mularulamwo amakhuwa kahabwene.
7Okhuba omunwa kwanje kulaboola akatoto;
ne obumayaanu nomusilo khumunwa kwanje.
8Amakhuwa kosi komunwa kwanje nakobuluniishi;
shikalimwo amashiamu nohomba akobukaatii tawe.
9Kosi kali amakololofu khu oyo oumanyilisia,
nakahabwene khubo abanyoolanga obumanyi.
10Mutiile obuchesiyi bwanje, ifeetsa ta;
nende obumanyi, okhushila itsahaabu inzelule.
11Okhuba obuchesi nobulayi okhushila tsinyuma tsinzakhanyu;
nebindu biosi ebiakheenywa shibili ebiokhuchelasibwa ninabwo tawe.
12Isie obuchesi ekholile oburechelefu eshimenyo shianje,
nirunilisia obumanyi nende obwitembelesii.
13Okhuria OMWAMI nikhWO okhukiya obubii;
toto, obwikhulumamii, nende isunga, nende injila imbii,
nende omunwa kwobukhayi, embikiyanga biosi.
14Ameebaalo nakanje, nende obuchesi bwahabwene;
nisie omwene obumanyilisii, amaani nakanje.
15Nisie ouchilanga abaruchi nibaruka,
khandi abakhulundu nibalaka akahabwene.
16Nisie ouchilanga abaami nibaamiha,
nende abakhongo, kata nende abakhalachi bosi abomubialo.
17Abaheelanga isie, nasi embaheelanga;
nabo abakhaabanga neshinani balanyoola.
18Obuyinda nende oluyali endi ninabio;
yee, emiandu echiyindilanga, nende obulunjishi.
19Ebiamo bianje nebilayi okhushila itsahaabu, yee, okhushila itsahaabu inzele;
neinganga yanje okhushila ifeetsa inzelule.
20Enjendanga munjila yobulunjishi,
hakari wemihanda chiobukhalachi bwatoto.
21Abo abambeelanga, embayindihasinjia nemiandu,
khandi enzitsusia amabiishilo kabwe.
22OMWAMI yanenga mubuchaachilo bwebikholebie,
imbeli wemilimochie chiakhale.
23Ndeemekhwa okhurula bukhulu nabutselele, okhurula khukhuchaaka,
eshialo nishirashiabaho ta.
24Tsisiba nitsiraliho tawe, isie ndeebulwa;
kata tsisebele etsieetsula amatsi nitsihumaho.
25Tsingulu nitsishili okhuralisibwa,
ebikulu nibishili okhubaho, isie ndeebulwa;
26olwa yali nashili okhulonga eshialo, kata ebitsiimi,
nohomba obuchaachilo bwolukuushi lweshialo.
27Olwa yakasia likulu, isie ndali nindiho;
olwa yakhupa ingara khulusiba;
28olwa yaraho amaleesi akokhwikulu;
olwa tsisebele tsiamatsi tsiolusiba tsiatinyisibwa.
29Olwa yaraho olwakho lweinyanza,
mbu amatsi karasiira lilakolie tawe;
olwa yaarula omuse kweshialo;
30olwenolwo ndali ninaye, shinga oukoosibwa nmaye;
ndali nimuchamisinjia khatsotselo,
nisangaalanga imbeliwe tsindaalo tsiosi;
31nisangaalilanga eshialoshie eshimenyungwamwo;
omwikhoyo kwanje kwalinji khubaana babandu.
32Kho bulaano, baana banje, mumbulile;
okhuba nabeikhabi abo abalindanga tsinjila tsianje.
33Hulile obuchesiyi, mana mube abachesi,
ne murabuleka tawe.
34Noweikhabi omundu oyo oumbulilanga, nabeetsangaho meeso habilibwa bianje khatsotselo,
nalindiililanga habiyindi biemiliango chianje.
35Okhuba ounyoola isie anyoola obulamu,
ne alanyoola obukoosia khuMWAMI.
36Nebutswa oyo ouranyoola ta, yeesaalisinjia omwene;
bosi abakiyanga baheelanga okhufwa.
Currently Selected:
Tsinjelo 8: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
