Tsinjelo 30
30
Obuloli bwaAkuru
1Amakhuwa kaAkuru waYake, oweMasa.
Omundu tsana yaboolela Itsieli, yee, yaboolela Itsieli nende Ukali, ari
2Toto mwene isie endi eshinasolo okhushila abandu bosi,
kata shindi nokhumanyilisia shia omundu ta.
3Shindayeka obuchesi,
kata shindamanya oyo Omutakatifu ta.
4Niwina ouniinile mwikulu, khandi wishile?
Niwina oufumbara omuyeka mufuusi?
Niwina ouboyile amatsi kosi keshialo mushiifwaloshie?
Niwina ouralisiye tsindulo tsiosi tsieshialo?
Eliiralie niwina, khandi eliira liomwanawe niwina, noba nomanyile?
5Buli likhuwa liaNyasaye liateemwa;
niye ingabo khubamwisiikanga.
6Orameeta likhuwa khumakhuwake tawe;
yakhakhuloshela, mana nonyoolekha noli omubeeyi.
7Ekhusabile amakhuwa kabili;
oranyimana nishili okhufwa ta.
8Akobukaatii nende obubeeyi obiyile ehale, birule aha endi;
orambeelesia obumanani nohomba obuyinda ta;
undiisie eshiokhulia eshimbelile;
9ndakheekura, mana nikhwambakhana, nimboola mbu OMWAMI niye wina?
Nohomba ndakhamananiha, ninziba,
mana nirala eliira liaNyasaye wanje shifwabwi.
10Orachiikha omukholi khumwamiwe ta;
yakhakhufwola, mana eshiina nishikhufwila.
11Luliho olwibulo lwabandu abanyekanga abasaabwe,
khandi abaralaamilanga abanyinabwe ikhabi ta.
12Luliho olwibulo lwabandu abasiiyikhu mumoni tsiabwe abeene,
ne shibayosibwa khushifwabwi shiabwe ta.
13Luliho olwibulo lwabandu, O mako! tsimoni tsiabwe shinga olwa tsieechinga!
Ebisiche biatsio nabio biayeechinga.
14Luliho olwibulo lwabandu, olwa ameeno kabwe kali shinga tsinganga, namacheko kabwe shinga emibano,
okhuhulula abamanani pe okhurula khushialo, nende abatakha okhurula mubandu.
15Likhukhuuni lili nabaana abakhaana babili ababoolanga bari Mbe, mbe!
Biliho ebindu bitaru ebireekuranga ta;
yee, nibine ebiraboolanga biri Bihelile, ta;
16Mbiebino, mbu Makombe; nende inda ingumba;
nende liloba elireekuranga amatsi,
nende omulilo, okuraboolanga kuri Bihelile! tawe.
17Imoni eyikokonyelanga samwana,
niyichaya okhuhulila nyina,
amakhookho akomulubanda kalachitsomola,
ne tsingosia tsindoro tsilachilia.
18Biliho ebindu bitaru ebili ebiamakana ebirambile,
yee, nibine ebia ndaramanyile ta;
19mbiebino, mbu injila yeinditsu mwikulu;
nende injila yeinzokha khulwanda;
nende injila yeliaro munyanza hakari;
nende injila yomusiani nomukhaana.
20Injila yomukhasi omuheyi, nolwa yili;
mbu aliitsanga, mana yeeya omunwakwe,
naboola ari Shikholile obutamaanu bwosi ta.
21Kaliho amakhuwa kataru akachilanga eshialo nishitechela,
kata nikane, aka shiranyala okhwisimilisilia tawe;
22ngakano, mbu omusumba olwa akwa omuruchi;
khandi omuyingwa olwa yeekuure ebiokhulia;
23khandi omukhaana oweshibindi olwa aleerwa;
khandi omukhaana omukholi olwa alia obulaame bwomukhaye owa yakholelanga.
24Biliho ebindu bine ebili ebituutu mushibala,
nebutswa nebichesi okhushila.
25Mbu tsindukusi nelihanga elirali liamaani ta,
ne kata kario tsirechekhanga ebiokhulia biatsio mwichesa;
26amacheneli kali butswa lihanga liteshele,
ne kalombanga ebimenyo biako mutsinyanda.
27Tsisiche shitsili nomuruchi tawe,
ne tsisamulanga tsiosi mumikanda chiatsio.
28Libaakala, elia onyala okhutiila namakhono,
nebutswa lili munzu tsikhulundu tsiabaruchu.
29Biliho ebindu bitaru ebieinjenda yeing'oono,
yee, nibine ebichendanga neing'oono;
30mbu italanyi, eyili namaani mutsisolo tsiosi,
eyireekwenyelanga eshindu shiosi ta;
31nende itaywa yolukungu; kata imbusi ikhole khandi;
nende omuruchi, niyeemilila abandube.
32Noba nokholile obuyingwa niwichinga,
nohomba noba nopaarile obubii,
ra omukhonokwo khumunwa.
33Okhuba okhusatsa amabeele khuleeranga amafura;
ne okhuborola amoolu khuleeranga amabanga;
nindio okhunichilisia oburima khuleeranga obusoolo.
Currently Selected:
Tsinjelo 30: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
