Tsinjelo 29
29
1Ouloshelungwa khase khase niyumia likosi alafunakwa meetsukhana, butswa ario oburahona ta.
2Abalunjishi olwa bali nobunyali, abandu basangaala;
ne omundu omutamaanu olwa aruka, abandu babinda.
3Ouheelanga obuchesi asangaasinjia samwana;
ne ouchendanga nabatamba asasinjia emianduchie.
4Omuruchi aralisinjia eshialo nobukhalachi bwatoto;
ne oyo oubukulanga ebiomufuusi ashikwisinjia.
5Omundu oulombelesinjia owashie arekanga olurimba khubilenjebie.
6Mubwonooni bwomundu omubii eshireko shilimwo;
ne omulunjishi yeembanga nasangaala.
7Omulunjishi ahendelanga abamanani;
ne omutamaanu shiali nokhumanyilisia mbu akamanye ta.
8Abakokonyi bahambinjia litaala omulilo;
ne abandu abachesi babeerulanga oburima.
9Omundu omuchesi naba nafunaana likhuwa nende omusilu,
naye kata nalula kata natsekha, shinakhubeho okhuyeela tawe.
10Abali abaangu okhuraatsia eshitsayi bakiyanga ouli habwene;
ne abakololofu balindanga obulamubwe.
11Omuyingwa abisulanga oburimabwe bwosi;
ne omundu omuchesi abwikalilanga nabuhoolesia.
12Omuruchi naba narechelesinjia khukobubeeyi,
kho abakalibe bosi baba abatamaanu.
13Omundu omumanani nende omusakanii baakaananga halala;
OMWAMI alabinjia tsimoni tsiabwe bombi.
14Omuruchi oukhalachilanga abamanani habwene,
eshifumbishie shiobwami shilaralila inziayo.
15Olusaala nende obulosheli bihaananga obuchesi;
ne omwana oulekhwa khububwe afwimbinjia nyina omurwe.
16Obunyali bwabatamaanu olwa bumeetekha, obwonooni nabwo bumeetekhanga;
ne abalunjishi balalola okhukwa khwabwe.
17Chesiyia omwanawo, naye alakhuheelesia obuhuluushi;
yee, alachuchamisia omwoyo.
18Aha libisulo libula, abandu bakholanga aka abeene beenya;
ne oyo oulindanga ameebaalo, noweikhabi.
19Omusumba womundu shianyala okhuchesiyibwa namakhuwa ta;
okhuba kata naba nahulila, shialafuchiilila ta.
20Koo: ololanga omundu ourimukhanga mukhuboolakhwe noho?
Omuyingwa yakhanyala okhukaasa okhushila ye.
21Outembelesinjia omukholiwe okhurula khubwanabwe,
olunyuma alakwa omwanawe.
22Omundu omuraasi abuusinjia obusoolo,
khandi omundu woburima ashilananga mubwonooni.
23Obwikhulumamii bwomundu bulamwisia hasi;
ne owomwoyo omwituutuyi alanyoola oluyali.
24Ouchendanga nomwibi yeekiyanga omwene;
ahulilanga ebilaka-munwa, ne shiabuulanga tawe.
25Okhuria abandu khuleeranga eshireko;
ne ouba niyeesiikanga OMWAMI alaba shisale.
26Abanji barunanga okhuheelwa nomuruchi,
ne obukhalachilwi bwatoto burulanga khuMWAMI.
27Omundu omushiamu neshisinyo khubalunji,
ne ouli omukololofu munjilaye neshisinyo khumutamaanu.
Currently Selected:
Tsinjelo 29: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
