Tsinjelo 18
18
1Owiyahulanga yeenyanga obwikombibwe omwene,
ne alulilanga obuchesi bwosi bwahabwene.
2Omuyingwa shiasangaalila obumanyilisii tawe,
habula yeenyanga mbu akomumwoyokwe karumbushe.
3Olwa obumayaanu bwitsanga, okhufwola nakhwo khwitsanga,
ne halala nokhuchaywa tsisoni tsiitsanga.
4Amakhuwa komunwa kwomundu kali shinga amatsi akolusiba;
isebele yobuchesi yili shinga omuchela kwomulaakha.
5Shibuli bulayi okhukoboshela akomumayaanu,
kata okhushiamia eshiina shiomulunjishi mubukhalachi ta.
6Omunwa kwomuyingwa kumwinjisia mumayinje,
khandi omunwakwe kwilanjilanga tsikhoba.
7Omunwa kwomuyingwa nobusasishibwe,
khandi omunwakwe neshireko shiomwoyokwe.
8Amakhuwa komutswanzwanii kali shinga ebironje ebinulu khandi keenjililanga elala munda mukari.
9Naye ouli omukara khumilimochie abeetsanga omwana wabwe oyo owonooninjia.
10Eliira liOMWAMI nomunaara kwamaani;
omulunjishi yeelushilangamwo, mana aba shisale.
11Obuyinda bwomundu nelitaalalie litinyu,
khandi buli shinga olukoba olurambi, mubuyililisibwe omwene.
12Okhukwa nikhushili okhubaho, omwoyo kwomundu kwilolanga;
ne obwituutuyi buranjililanga oluyali.
13Oyo oukalusinjia likhuwa nashili okhulihulila,
kabeetsanga obusilu nende tsisoni khuye.
14Omwoyo kwomundu kuleefwila mubulwalebwe;
ne owa omwoyokwe kufwile, yakhanyala arie okhwisimilisia?
15Omwoyo kwomurechelefu kunyoolanga obumanyi;
ne eshirwi shiomuchesi shienyanga obumanyi.
16Eshihaanwa shiomundu shimwiyanjilinjia,
ne shimusitinjia imbeli wabandu abakhongo.
17Ouranjilila okhuboola ebifunebie alolekhanga shinga omulunjishi;
mana oundi niyeetsa, namukhwenya.
18Ikha yakaminjia amayinje, niyikabukhasia abamaani.
19Owomweenywe owonooneelwe nomutinyu okhushila litaala liolukoba,
nobusoolo buli shinga emiyinjiilo chielitookho.
20Inda yomundu yileetsula ebiamo biomunwakwe;
aleekura obumeeteshi bwomunwakwe.
21Okhufwa nende obulamu bili mubunyali bwolulimi;
nabo abaluheelanga balalia ebiamo bialwo.
22Ounyoola omukhasi anyoola eshindu eshilayi,
nanyoola okhukoosibwa nende OMWAMI.
23Omumanani arumishilanga okhusaaya;
ne omuyinda akalusinjia nobutinyu.
24Baliho abeetsa abakhaaba butswa akolubuutso,
ne aliho omwitsa oubeelanga ahambi ninawe okhushila owomweenywe yesi.
Currently Selected:
Tsinjelo 18: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
